ޢަލީ، ފައްޔާޟްއަށް: އަނބިދަރިންގެ ކުރިމަތީ މުސްލިމުންގެ އަބުރު ކަތިލި ދުވަސް ހަނދާން ނެތުނީތޯ؟

އަނބިދަރިންގެ ކުރިމަތީ އަވަގުރާނަ ގޮވައި މުސްލިމުންގެ އަބުރު ކަތިލި ދުވަސް ހަނދާން ނެތުނީތޯ އަހައި ޖަމިއްޔަތުއް ސަލަފްގެ ޗީފް މާކެޓިން އޮފިސަރު ޢަލީ ރަމީޒް ގެ ބަހުގެ ހަމަލާތަކެއް އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒް އިސްމާއިލަށް އަމާޒު ކުރައްވައިފި އެވެ.

ސިޔާސީ ހިޔާލުތަފާތުވުންތަކުގެ ތެރެއަށް އާއިލާ ވައްދައި، މަގުމަތިން އަނބިދަރިންނާ ދިމާކުރުން ބަލައެއްނުގަނެވޭ ކަމަށް ފައްޔާޒް ވިދާޅުވުމާއި ގުޅިގެން، ޢަލީ ރަމީޒް ކުރެއްވި ޓްވީޓެއްގައި އޭނާ ވަނީ އަނބިދަރިންގެ ކުރިމަތީ އަވަގުރާނަ ގޮވައި މުސްލިމުންނާއި ދިމާއަށް ކާޅަށް، ވަގަށް، ޓެރަރިސްޓަށް ގޮވައި، މުސްލިމުންގެ އަބުރު ކަތިލަމުން ދުވި ހަނދާން މިހާރު ނެތުނީތޯ ސުވާލު ކުރައްވާފައެވެ.

"އެދުވަހުވެސް، މިއަދުވެސް، ތިޔަދަފަ ލާއިންސާނީ، ލާދީނީ، މުޑުދާރު ޖަރީމާ ތަކާއި އަހަރެމެން ދެކޮޅެވެ." ޢަލީ ވިދާޅުވިއެވެ.

އެމްޑީޕީގެ ޕްރައިމަރީގެ ފޯރިގަދަވެ، ފައްޔާޒްގެ އާއިލާއާ މަގުމަތިން ދިމާކޮށްފައިވާ ކަމަށް ބުނެ އޭނާ ކަންބޮޑުވުންފާޅުކުރައްވައިފަ އެވެ. އަދި މަގުމަތިން އަނބިދަރިންނަށް އުނދަގޫ ނުކުރަން ކެމްޕޭން ޓީމަށް ނަޝީދު އިލްތިމާސްކުރެއްވީތީ ފައްޔާޒް ވަނީ އެމަނިކުފާނަށް ޝުކުރު އަދާކުރައްވައިފަ އެވެ.

އެމްޑީޕީގެ އިސް ދެ ފަރާތުން މިފަދައިން ވިދާޅުވެފައިވާއިރު، އެ ޕާޓީގެ ބައެއް ލީޑަރުންނަކީ މުޒާހަރާތަކާއި އެނޫންވެސް ޕޯޑިއަމްތަކުގައި ވަރަށް ހުތުރު ބަހުން ވާހަކަ ދައްކާ ބައެކެވެ. އެގޮތުން ދީނީ ޢިލްމުވެރިންނަށް ހަޖޫ ޖަހައި، ކުރީގެ ރައީސް، ޑރ. މުހައްމަދު ވަހީދު އާއި ދިމާއަށް ކާޅަށް ގޮވައި، ސުންނަތައް އުޅެން ތުނބުޅި ދިގުކޮށް މޫނުބުރުގާ އަޅާ މީހުންނަށް މަލާމާތް ކޮށް، އެއީ ޓެރަރިސްޓުންގެ ގޮތުގައި ލޭބަލް ކުރުންފަދަ އެތައް ކަމެއް އެ ޕަޓީގެ ލީޑަރުންގެ ފަރާތުން ވަނީ ފެނިފައެވެ.

ވުމާއެކު އަލީ ރަމީޒު މިފަދަ ޓުވީޓެއް ކުރައްވާފައި މިވަނީ އެފަދަ ކަންކަމާއި ގުޅިގެން ކަމަށް ބެލެވެއެވެ.