ރާއްޖޭގައި މާލެނޫން ތަނެއް އޮތްކަން އެނގުނު ވެރިއަކީ ހަމައެކަނި ރައީސް ޞާލިހު: ސަނީފު
ދިވެހިރާއްޖޭގައި މާލެ ނޫން ތަނެއްވެސް އޮތްކަން އެނގިވަޑައިގެން މަސައްކަތްޕުޅު ކުރެއްވި ހަމައެކަނި ވެރިއަކީ ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހު ކަމަށް ރައްޔިތުންގެ މަޖިލީހުގެ ތިނަދޫ ދެކުނު ދާއިރާގެ މެމްބަރު އަބްދުالله ސަނީފު ވިދާޅުވެއްޖެ އެވެ.
މެމްބަރު ސަނީފު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ކުޅުދުއްފުށި އުތުރު ދާއިރާގެ މެމްބަރު ޔާސިރު އަބްދުލްލަތީފް ހުށައަޅުއްވާފައިވާ ދިވެހިރާއްޖޭގައި ޤާއިމްކުރެވިފައިވާ ސަރަޙައްދީ ބަނދަރުތައް ބޭނުންކޮށްގެން ސަރަޙައްދީ ތަރައްޤީގެ ދުވެލި ހަލުވިކުރުމަށް ކުރަންޖެހޭ ކަންތައްތައް ދެނެގަނެ، އެ މަސައްކަތް ހަލުވިކުރުމަށް އެދި ގޮވާލާ ޤަރާރަށް ބަހުސްކުރައްވަމުން ނެވެ.
އެގޮތުން މެމްބަރު ސަނީފު ވިދާޅުވީ މިފަދަ ބަނދަރުތައް ތަރައްގީކުރުމަށް ޒަމާނުއްސުރެ އެކި ފަހަރުމަތިން ވެރިކަން ކުރެއްވި ބޭފުޅުންނަށް ފުރުޞަތުތައް ލިބިވަޑައިގެންނެވި ކަމަށެވެ.
އެހެން ނަމަވެސް މިހާތަނަށް އައި ހުރިހާ ސަރުކާރެއްގައި ވެސް ބެލީ މާލެ ސަރަހައްދު ތަރައްގީ ކުރުމަށްކަމަށް މެމްބަރު ވިދާޅުވިއެވެ. އަދި ވިދާޅުވީ ފުރަމާލެ ނޫން އެހެން ތަނެއް ރާއްޖޭގައި އޮންނަކަން އެނގިވަޑައިގެން، އެހެން ސަރަހައްދުތައް ވެސް މާލެއެކޭ އެއްގޮތަށް ތަރައްގީ ކުރެއްވުމުގެ މަސައްކަތްޕުޅު ކުރެއްވި ހަމައެކަނި ރައީސް އަކީ ރައީސް ޞާލިހު ކަމަށެވެ.
"ކޮންމެ ކަމެއް އައިސް ލައިޖެހެން ޖެހެނީ އެއް ތަނަކަށްތޯ؟ މާލޭގެ ކެޕިޓަލްއަށްތޯ ހުރިހާކަމެއް އައިއްސަ ޖަމާވާން ޖެހެނީ؟ މި ނޫން ނިޒާމެއް ދިވެހިރާއްޖޭގައި ވެރިކަން ކުރައްވާ ބޭފުޅަކަށް ނޭނގޭތޯ؟ ދިވެހިރާއްޖޭގެ ތާރީހުގައި ފުރަތަމަ ފަހަރަށް މިފަދަ ވެރިއެއްގެ ގޮތިގައި، މާލެ ނޫން އެހެން ސަރަހައްދުތަކަކީ އޮތްތަނެއް ކަމުގައި އެނގުނު ވެރިއަކަށް އައީ އިބްރާހިމް މުޙައްމަދު ޞާލިހު. އެ ނޫން ވެރިއަކު ދިވެހިރާއްޖޭގެ ތާރީހުގައި ހުފެނޭ ރާއްޖޭގެ ރަށްތައް ތަރައްގީކުރަން ޖެހޭކަން ދަނެގެން ބަނދަރުތަކާއި ނަރުދަމާތަކާއި އެހެން ކަންކަން އިންތިޒާމު ކުރަމުން ދިޔަ ވެރިއަކު ނުފެނޭ"
މަޖިލީހުގެ ތިނަދޫ ދެކުނު ދާއިރާގެ މެމްބަރު އަބްދުالله ސަނީފު
ސަނީފު ވިދާޅުވީ ރަށްތައް ތަފާތު ކުރުމެއްނެތި ތަރައްގީ ކުރާ ސިޔާސަތަކަށް ސަރުކާރުގެ ވާދަވެރިން ފާޑުކިޔަމުންދާ ކަމަށެވެ. އަދި އެ ސިޔާސަތު ގޯސް ކުރަމުންދާ ކަމަށެވެ.
ރައީސް އިބްރާހިމް މުޙައްމަދު ޞާލިހު ވެރިކަން ކުރައްވަމުން ގެންދަވަނީ އެމަނިކުފާނުގެ ވާދަވެރިންނާއި ހަސަދަވެރިން ވެސް ގޮވައިގެން ކަމަށާއި، އެފަދަ ބޮޑެތި ގޮންޖެހުންތަކާއެކު ހަމަހަމަ ކަމާއެކު ރަށްތައް ތަރައްގީކުރެއްވި ވެރިއަކު ތާރީހުގައި ވެސް ފެނިފައި ނުވާކަމަށް ސަނީފު ވިދާޅުވި އެވެ. އަދި ސަނީފު ވަނީ ރައީސް ޞާލިހުގެ އެ ސިޔާސަތަށް ވަރަށް ބޮޑަށް ހުޝާމަދު ކުރައްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
