ރައީސް ޔާމިންގެ އިސްތިއުނާފު ފޯމު އިސްލާހުކޮށް އަލުން ހުށައަޅައިފި

ކުރީގެ ރައީސް ޢަބްދުالله ޔާމިން ޢަބްދުލް ޤައްޔޫމްގެ މައްޗަށް ވ. އާރަށުގެ މުއާމަލާތާއި ގުޅިގެން ކޮށްފައިވާ 11 އަހަރުގެ ޖަލު ޙުކުމުގެ އިސްތިއުނާފު ފޯމުގައި އިސްލާހުކުރަން އެންގި ކަންކަން އިސްލާހު ކުރުމަށްފަހު އަލުން އެމައްސަލަ ހައިކޯޓަށް ހުށައަޅައިފި އެވެ.

ވ. އާރަށުގެ މުއާމަލާތާއި ގުޅިގެން ރައީސް ޔާމީންގެ މައްޗަށް އިއްވި 11 އަހަރުގެ ހުކުމް ހައިކޯޓުގައި އިސްތިއުނާފު ކޮށްފައިވަނީ މިދިޔަ ފެބްރުއަރީ މަހުގެ 21 ގައެވެ.

އިސްތިއުނާފު ބަލައިގަތުމާމެދު ގޮތެއް ނުނިންމާ ދެހަފްތާ ފަހުން ހައިކޯޓުން ވަނީ އެ މައްސަލައިގެ އިސްތިއުނާފު ފޯމުގައި 5 ކަމެއް އިސްލާހު ކުރުމަށް އަންގާ ފޯމު އަނބުރާ ފޮނުވާފައެވެ.

އެގޮތުން ވ އާރަށުގެ މައްސަލައަކީ އެއް ރިޕޯޓަކުން ޖަވާބު ދީފައިވާ މައްސަލައެއް ނަމަވެސް ދެ ޤަޟިއްޔާގެ އިސްތިއުނާފު ފޯމު ވަކިން ތާއްޔާރުކޮށް އިސްލާހު ހުށައެޅުމަށް ހައި ކޯޓުން އަންގާފައިވެއެވެ.

އޭގެ އިތުރުން ޝަރީއަތް ނިމުނު ގޮތުގެ ރިޕޯޓާއި މަޙްޟަރުތަކާއި ޑޮކިއުމެންޓްރީ ހެކިތަކުން ކެޕްޗާކޮށް ހުށަހަޅާފައިވާ ބައިތައް ލިޔެގެން ފޯމުގައި ހިމަނައިދިނުމާއި ، އިނގިރޭސިބަހުން ހުރި ބޭރުޤައުމުތަކުގެ ކޯޓުތަކުގެ ނިންމުން ދިވެހިބަހުން ތަރުޖަމާ ހުށައެޅުމުގެ އިތުރުން، ބޭރު ޤައުމުތަކުގެ މައްސަލަތަކުގެ ރިޕޯރޓުތައް ހުށައެޅުމަށް އަންގާފައިވެއެވެ.

އަދި ކުރިމިނަލް ކޯޓަށް ހުށަހެޅި އިސްތިއުނާފް ފޯމު ހައިކޯޓަށް ކްރިމިނަލް ކޯޓުން ފޮނުވިއިރު ބައެއް އެޓޭޗްމަންޓް އެ ފޯމުގައި ނެތުމުން އެ އެޓޭޗްމަންޓްތައްވެސް ފޮނުވުމަށް ހައިކޯޓުން ވަނީ އަންގާފައެވެ.

ރައީސް ޔާމީންގެ ޤާނޫނީ ޓީމުން ވަނީ ހައިކޯޓުން އަންގާފައިވާ ކަންކަން ފުރިހަމަ ކުރުމަށްފަހު އަލުން އެ މައްސަލަ ހުށައަޅާފަ އެވެ.

މި މައްސަލަ ހައިކޯޓަށް އިސްތިއުނާފު ކުރައްވަމުން އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު ވަނީ، ހައިކޯޓު މަރުހަލާއިން ރައީސް ޔާމީން މިނިވަންވާނެ ކަމުގެ ޔަގީންކަން ދެއްވާފަ އެވެ.

ރައީސް ޔާމީންގެ ފަރާތްޕުޅުން ހުށައަޅާފައިވާ އިސްތިއުނާފުގައި ދަށު ކޯޓުން ހަދާފައިވާ ބޮޑެތި ގޯސްތައް ފާހަގަކޮށްފައިވާނެ ކަމަށާއި، ހައި ކޯޓުން އެ ގޯސްތައް ދަމަހައްޓާނެ ކަމަށް ގަބޫލު ނުކުރައްވާކަމަށް ޑރ ޖަމީލު ވިދާޅުވެފައި ވެއެވެ.