ދައުލަތުގެ ހެކި ހާޒިރު ނުކުރެވިގެން ރައީސް ޔާމިނުގެ ފުއްގިރި މައްސަލައިގެ އަޑުއެހުން ކެންސަލްކޮށްފި

ރ ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ވާދަވެރި ސިޔާސީ ލީޑަރު ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅޭ ޝަރީއަތުގެ އަޑުއެހުމެއް އާދިއްތަ ދުވަހަށް ތާވަލުކުރުމަށް ފަހު ކެންސަލްކޮށްފި އެވެ.

އާދިއްތަ ދުވަހަށް ތާވަލުކުރި އަޑުއެހުން ކެންސަލްކޮށްފައިވަނީ އެ މައްސަލައިގައި ދައުލަތުން އުފުލާފައިވާ ދައުވާތައް ސާބިތުކޮށްދިނުމަށް މިއަދު ދައުލަތުގެ ފަރާތުން ކޯޓަށް ހުށައަޅަން ޖެހޭ ހެކި ހާޒިރު ނުކުރެވުމުން ކަމަށް ކްރިމިނަލް ކޯޓުން ވަނީ ބުނެފައެވެ.

އެ ހެއްކަކީ ރާއްޖެއިން ބޭރުގައި ހުރި ފަރާތަކަށް ވުމުން، މި މައްސަލައާއި ގުޅިގެން އެނެމް ފަހުން ބޭއްވި އަޑުއެހުމަށް ވެސް އެ މީހާ ވަނީ ހާޒިރުކުރެވޭ ގޮތް ނުވެފައެވެ.

މި މައްސަލައިގައި މިހާރު ކުރިއަށް ދަނީ ދައުލަތުގެ ފަރާތުން ހުށައަޅާ ހެކިންގެ ހެކިބަސް ނެގުމެވެ.

އެންމެ ފަހުން ބޭއްވި އަޑުއެހުމުގައި ދައުލަތުގެ ފަރާތުން ވަނީ ހެއްކެއްގެ ގޮތުގައި ހުށައަޅާފައިވާ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) ގެ ހެކިބަސް ނަގާފައެވެ.

ބޮންޑެއަކީ ފުއްގިރި މުއާމަލާތުގައި އޭރު އެރަށް ހޯދުމަށް މަސައްކަތް ކުރަމުންދިޔަ ބޭރުގެ ކްލަސިކް ސިޓީ ދުބާއީ ކުންފުނީގެ ފަރާތުން ދިވެހިރާއްޖެއަށް ކަނޑައަޅުއްވާފައިވާ މަންދޫބއްގެ ގޮތުގައި ހަރަކާތްތެރިވެފައިވާ ފަރާތެކެވެ.

އެގޮތުން އެ ދުވަހުގެ އަޑުއެހުމުގައި ބޮންޑެ ވިދާޅުވީ ފުއްގިރި ކުއްޔަށް ދޫކުރުމުގެ އަގަކީ 1.2 އާއި 1.5 މިލިއަން ޑޮލަރުކަމަށް ކަނޑައަޅާފައި ވަނިކޮށް ކުއްލިއަކަށް އެ އަގު 4 ހައްކައަށް ބަދަލުވެގެން ދިއުމާއި ގުޅިގެން ޝައްކުކުރެވޭ ކަންތައްތަކެއް ފާހަގަވާތީ ކުންފުނީގެ ސަމާލުކަމަށް އެކަން ގެނެސްފައިވާނެ ކަމަށެވެ.

އެހެން ނަމަވެސް ފަހުން ޓުއަރިޒަމް މިނިސްޓްރީން އަންގައިގެން ރަށް ކުއްޔަށް ދޫކުރުމުގެ އިނީޝިއަލް ޕޭމަންޓެއްގެ ގޮތުގައި 150،000 ޑޮލަރު ކުންފުނީގެ ފަރާތުން ދައްކާފައިވާނެކަމަށް ބޮންޑެ ވިދާޅުވި އެވެ. އަދި އޭނާ ވިދާޅުވީ އެ ލާރި ޖަމާކުރިތާ 6 ދުވަސް ބަހުން ނެގި ބޭންކު ސްޓޭޓުމަންޓެއްގައި ކުންފުނިން އެމްއެމްޕީއާރުސީއަށް ޖަމާކުރި ފައިސާ އެސްއޯއެފް ކިޔާ ކުންފުންޏަކަށް ޖަމާވެފައިވާކަން ދެނެގަނެވިފައިވާ ކަމަށެވެ.

އެ ހިސާބުން އެ ކުންފުންޏަކީ އޭރުގެ ޓުއަރިޒަމް މިނިސްޓަރު އަހުމަދު އަދީބާއި ގާތް ގުޅުމެއް އޮންނަ ބައެއްގެ ކުންފުންޏެއްކަން އެނގުނު ކަމަށާއި، އަދި ދައުލަތަށް ޖަމާވާން ޖެހޭ ފައިސާއެއް އަމިއްލަ ފަރާތެއްގެ އެކައުންޓަށް ޖަމާވިކަން އެނގޭތީ އެ މައްސަލަ އޭސީސީއަށް ވެސް ހުށައަޅާފައި ވާނެކަމަށް ބޮންޑެ ވިދާޅުވި އެވެ.

އޭނާ ކޯޓަށް ވިދާޅުވި ގޮތުގައި ފުއްގިރި ޚިޔާނާތް ހިންގިކަން އޭރު ސަރުކާރުގެ ވެރިންނަކަށް ނޭނގޭނެއެވެ. އެކަން ކޮށްފައިވަނީ ޓުއަރިޒަމް މިނިސްޓްރީ ތެރެއިން އަދީބުކަމަށް ބޮންޑެ ވިދާޅުވި އެވެ.

އެދުވަހުގެ އަޑުއެހުމުގައި ބޮންޑެ ވަނީ އަދީބު ކޯޓަށް ދޮގުހެކިދިން ކަންވެސް ހާމަކޮށްފައެވެ. އަދި ފުއްގިރީގެ އަގު ކަނޑައެޅުމަށް ކުރިއަށް ގެންދެވުނު އެއްވެސް ބައްދަލުވުމެއްގައި ބޮންޑެ ބައިވެރިވެފައި ނުވާނެކަމަށް އޭނާ ވަނީ ކޯޓުގައި ބުނެފައެވެ.

ފުއްގިރި މައްސަލައިގެ އަޑުއެހުމެއް ދެން އޮންނާނެ ސީދާ ތާރީހެއް އަދި ކަނޑައަޅާފައެއް ނުވެއެވެ. އެހެން ނަމަވެސް އެ މައްސަލަ އަވަސް ސްޕީޑުގައި ނިންމުމަށް ކްރިމިނަލް ކޯޓުން ދަނީ މަސައްކަތް ކުރަމުންނެވެ.