އަމާޒަކީ 2024 ވަނަ އަހަރު، އާރްޓީއެލް ޚިދުމަތުން މުޅި ރާއްޖެ ގުޅާލުން: ރައީސް ޞާލިހު

މިސަރުކާރުގެ އަމާޒަކީ ކުރިއަށް އޮތް 2024 ވަނަ އަހަރުގެ ތެރޭގައި، އާރްޓީއެލް ޚިދުމަތުން މުޅި ރާއްޖެ ގުޅާލުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރިޔާސީ ކެމްޕެއިނަށް މ އަތޮޅަށް ކުރައްވަމުންދާ ދަތުރުފުޅުގައި ރަތްމަންދޫއަށް ވަޑައިގެން އެ ރަށު ރައްޔިތުންނާ ބައްދަލު ކުރައްވާ ވާހަކަ ދައްކަވަމުން ރައީސް ޞާލިހް ވިދާޅުވީ ތަރައްގީގެ ވާހަކަ ދައްކަން ވާނީ ގައިން ތާހިރުވެ ތިބެގެން ކަމަށެވެ.

އަޅުގަނޑުމެން އަބަދުވެސް ދައްކާ ވާހަކައެއް. ތަރައްޤީގެ ވާހަކަ ދައްކަން ފަށަންވާނީ ގައިން ތާހިރުވެ ތިބެގެންނޭ. ފުރަތަމަ މީހާއަށް ސާފު ބޯފެނާއި، ނަރުދަމާ އާއި، ލަފާފުރުމުގެ ފަސޭހަ ކަމާ، ސިއްހީ ޚިދުމަތާއި، ދަރިންނަށް ތައުލީމް ދެވޭނެ ގޮތެއް ނެތި ދެން ކޮން ތަރައްގީގެ ވާހަކަ އެއްތޯ ދައްކާނީ؟

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހު ވިދާޅުވީ ކުދި އާބާދީ ތަކުގައި އެފަދަ އަސާސީ އެއްވެސް ޚިދުމަތެއް އެމަނިކުފާނުގެ ވެރިކަން ފެށުނުއިރު ނެތް ކަމަށެވެ. އެހެނީ ކުދި އާބާދީގެ ރަށްތަކަކީ ވޯޓުގެ ގޮތުން ބަލާއިރު މާ ގިނަ ވޯޓު ލިބޭނެ ރަށްތަކެއް ނޫން ކަމަށާ، އެހެން ނަމަވެސް، އެމަނިކުފާނުގެ ސަރުކާރުން މަސައްކަތް ކުރީ ވޯޓުދޭ މީހުންގެ އަދަދަށް ބެލުމެއް ނެތި ރައްޔިތުންނަށް ޚިދުމަތް ކޮށްދިނުމަށް ކަމަށް ރައީސް ޞާލިހު ވިދާޅުވި އެވެ.

އެގޮތުން ރަތްމަންދޫގައިވެސް ފެނާއި ނަރުދަމާގެ މަސައްކަތް ކުރިއަށްދާ ކަމަށާ، އިންޖީނު ގޭގެ މަސައްކަތް ނިމި، ފެނަކަ އޮފީހުގެ މަސައްކަތް ކުރިއަށްދާކަން ފާހަގަ ކުރެއްވިއެވެ.

މީގެ އިތުރުން، އެމަނިކުފާނު ވިދާޅުވީ، ކުދި ރަށްރަށަށް ދިރުން ގެނުވާނެ އެއް ކަމަކީ ދަތުރު ފަތުރުގެ ނިޒާމުން ރަށްތަށް ގުޅާލުން ކަމުގައި ވާއިރު، މި ސަރުކާރުގެ އަމާޒަކީ 2024 ވަނަ އަހަރުގައި ރާއްޖޭގެ ހުރިހާ ރަށްތަކެއް ދަތުރުފަތުރުގެ ނިޒާމަކުން ގުޅާލުން ކަމަށެވެ.

މިފަދަ ކުދި ރަށްރަށަށް ދިރުން އަންނާނެ އެއް ކަމަކީ، ދަތުރުފަތުރުގެ ނިޒާމުން މުޅި އަތޮޅާއި މުޅި ރާއްޖެ ގުޅުމުން ކަމަށްވާތީ އެމަސައްކަތް ފަށައިގެން ކުރިއަށް އެބަދޭ. ހއ، ހދ ގެ މަސައްކަތް ނިމިއްޖެ. ހުވަދު އަތޮޅުގެ އާރްޓީއެލް ޚިދުމަތް ދޭން ޓްރައިލް ޕީރިއަޑް ގައި އެ އޮތީ. ދާދި އަވަހަަށް، މުޅި ހުވަދު އަތޮޅު އެކީގައި، އެއް ރަށް އަނެއް ރަށާއި، ގުޅިގެން ދާނެ. އަޅުގަނޑުމެންގެ އަމާޒަކީ ކުރިއަށް އޮތް އަހަރު، 2024 ވަނަ އަހަރު، މުޅި ރާއްޖެ އެކީގައި އާރްޓީއެލްގެ ޚިދުމަތުން ގުޅާލުން.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހު ވިދާޅުވީ، އާރްޓީއެލްގެ ޚިދުމަތުން ހުރިހާ ރަށްތަކެއް ގުޅާލުމާއި އެކު، ކުދި ރަށްރަށަށް ބޮޑެތި ފަސޭހަތަކެއް ވެގެން ދާނެ ކަމަށެވެ. އެގޮތުން، އެ ރަށަކުން ލިބެން ނެތް ޚިދުމަތް ހޯދުމަށް އެހެން ރަށް ރަށަށް ދިޔުމަށް ފަސޭހަ ވެގެންދާނެ ކަން ފާހަގަކުރެއްވިއެވެ.