ތަރައްގީގެ ވާހަކަ ދައްކަންވާނީ ގައިން ތާހިރުވެ ތިބެގެން: ރައީސް ޞާލިހު

ތަރައްގީގެ ވާހަކަ ދައްކަންވާނީ ގައިން ތާހިރުވެ ތިބެގެން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރިޔާސީ ކެމްޕެއިނަށް މ އަތޮޅަށް ކުރައްވަމުންދާ ދަތުރުފުޅުގައި ރަތްމަންދޫއަށް ވަޑައިގެން އެ ރަށު ރައްޔިތުންނާ ބައްދަލު ކުރައްވާ ވާހަކަ ދައްކަވަމުން ރައީސް ޞާލިހް ވިދާޅުވީ ރަތްމަންދޫ އަކީ އާބާދީގެ ގޮތުން ގާތްގަނޑަކަށް 100 އާއި 118 އާއި ދެމެދުގެ މަދު މީސްކޮޅެއް ދިރިއުޅޭ ރަށެއް ކަމަށެވެ. އޭގެ ސަބަބުން، މީގެ ކުރީ ސަރުކާރު ތަކުން އެ ރަށަށް އެއްވެސް ވަރަކަށް އަޅާލާފައި ނުވާ ކަމަށް އެމަނިކުފާނު ވިދާޅުވިއެވެ.

ރާއްޖޭގެ ޖީޑީޕީއަށް ބަލާއިރު، މީހެއްގެ ބޮލަކަށް ގާތްގަނޑަކަށް 12000 އަށްވުރެ ގިނަ ޑޮލަރު ޖެހޭއިރުގައި، ރާއްޖޭގެ އެއްވެސް ރައްޔިތަކު އަސާސީ ޚިދުމަތްތަކުން މަހުރޫމްވެފައި ހުރެގެން ނުވާނެ. މިސަރަހައްދުގައި އެންމެ ބޮޑު، ބޮލަކަށްޖެހޭ ނިސްބަތް އެންމެ ބޮޑު ގައުމަކީ ދިވެހިރާއްޖެ. އަޅުގަނޑުމެން ޖަޒީރާ ރާއްޖެ އެއްގެ ގޮތުގައި މެނިފެސްޓޯ އެއް ހިފައިގެން ނުކުތް އެއް ސަބަބަކީ ދައުލަތަށް މި ލިބޭ އާމްދަނީ ހަމަހަމަ ގޮތެއްގައި ރައްޔިތުންނަށް ފޯރުކޮށްދިނުން.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހު ވިދާޅުވީ، ޖަޒީރާ ރާއްޖެ މެނިފެސްޓޯގެ އެންމެ މުހިންމު އަމާޒަކީ އަސާސީ ޚިދުމަތްތައް ނުލިބި ހުރި ރަށްރަށަށް އެކަންކަން ކޮށްދިނުން ކަމަށެވެ. އެގޮތުން ރަތްމަންދޫ އަކީވެސް މިސަރުކާރުން އިސްކަންދިން ރަށެއް ކަމަށެވެ.

އަޅުގަނޑުމެން އަބަދުވެސް ދައްކާ ވާހަކައެއް. ތަރައްޤީގެ ވާހަކަ ދައްކަން ފަށަންވާނީ ގައިން ތާހިރުވެ ތިބެގެންނޭ. ފުރަތަމަ މީހާއަށް ސާފު ބޯފެނާއި، ނަރުދަމާ އާއި، ލަފާފުރުމުގެ ފަސޭހަ ކަމާ، ސިއްހީ ޚިދުމަތާއި، ދަރިންނަށް ތައުލީމް ދެވޭނެ ގޮތެއް ނެތި ދެން ކޮން ތަރައްގީގެ ވާހަކަ އެއްތޯ ދައްކާނީ؟

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހު ވިދާޅުވީ ކުދި އާބާދީ ތަކުގައި އެފަދަ އަސާސީ އެއްވެސް ޚިދުމަތެއް އެމަނިކުފާނުގެ ވެރިކަން ފެށުނުއިރު ނެތް ކަމަށެވެ. އެހެނީ ކުދި އާބާދީގެ ރަށްތަކަކީ ވޯޓުގެ ގޮތުން ބަލާއިރު މާ ގިނަ ވޯޓު ލިބޭނެ ރަށްތަކެއް ނޫން ކަމަށާ، އެހެން ނަމަވެސް، އެމަނިކުފާނުގެ ސަރުކާރުން މަސައްކަތް ކުރީ ވޯޓުދޭ މީހުންގެ އަދަދަށް ބެލުމެއް ނެތި ރައްޔިތުންނަށް ޚިދުމަތް ކޮށްދިނުމަށް ކަމަށް ރައީސް ޞާލިހު ވިދާޅުވި އެވެ.

އެގޮތުން ރަތްމަންދޫގައިވެސް ފެނާއި ނަރުދަމާގެ މަސައްކަތް ކުރިއަށްދާ ކަމަށާ، އިންޖީނު ގޭގެ މަސައްކަތް ނިމި، ފެނަކަ އޮފީހުގެ މަސައްކަތް ކުރިއަށްދާކަން ފާހަގަ ކުރެއްވިއެވެ.

އަދި މި އަހަރު ތެރޭގައި، ރަތްމަންދޫ ބަނދަރު ތަރައްގީކޮށް އެ މަސައްކަތާއިއެކު ގުރާ ސަރަހައްދު ހިމާޔަތް ކުރުމުގެ މަސައްކަތް ވެސް ފަށްޓަވާނެ ކަމަށް ރައީސް ޞާލިހު ވިދާޅުވި އެވެ. އަދި މީގެ އިތުރުން، ރަތްމަންދޫ ގައި މިވަގުތު ގުރޭޑް 6 އާއި ހަމައަށް ކިޔަވައި ދިން ނަމަވެސް، އެ ރަށު ރައްޔިތުން ބޭނުން ނަމަ، ސެޓްލައިޓް ސުކޫލު މެދުވެރިކޮށް ރަށުގައި ތިބެގެން ގުރޭޑް 10 އަށް ކިޔެވުމުގެ ފުރުސަތު ވަރަށް އަވަހަށް ފަހި ކޮށްދެއްވާނެ ކަމަށް ރައީސް ޞާލިހު ވިދާޅުވި އެވެ.