މުއައްސަސާތަކުގެ ވެރިން ވީ ކެމްޕޭނަށް ގޮސް، ޖަވާބުދޭނެ މީހަކު ނެތް: އަބްދުއްރަހީމް

ދައުލަތުގެ މުއައްސަސާތަކުގެ އިސްވެރިން އޮފީސް ހުސްކުރައްވާ ވަޑައިގެން އުޅުއްވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ކެމްޕޭނުގައި ކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެވަޑައިގެން ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމުގެ އިސްތިއުނާފު މައްސަލަ ލަސްކުރަމުންދާ ދިއުމާއި ގުޅިގެން އިދިކޮޅުގެ އޮތް ކަންބޮޑުވުންތަކާއެކު، އެ ކޯލިޝަނުން މިއަދު ވަނީ ޖުޑިޝަލް ސާވިސް ކޮމިޝަނާއި ޕީޖީ އޮފީހަށް ވަޑައިގެން އެތަނުގެ އިސް ފަރާތްތަކާއި ބައްދަލުކުރުމަށް މަސައްކަތްކޮށްފަ އެވެ.

އެހެން ނަމަވެސް މިއަދުގެ 11:00 ފެށިގެން އެބޭފުޅުން އެ އޮފީސްތަކުގައި ގިނަ އިރުތަކެއް ވަންދެން ތިއްބެވި ނަމަވެސް އެއިން މުއައްސަސާއެއްގެ އިސް ބޭފުޅަކާއި ބައްދަލުވާގޮތް ވަނީ ނުވެފައެވެ.

އެކަން ހާމަކުރައްވާ ޕީއެންސީގެ ރައީސް އަބްދުއްރަހީމް އަބްދުﷲ މީޑިއާއަށް ވިދާޅުވީ ރައީސް ޞާލިހު އުޅުއްވަނީ މުއައްސަސާތަކުގެ އިސްވެރިން ގޮވައިގެން ކެމްޕޭނު ދަތުރުފުޅުގައި ކަމަށެވެ. އެހެންކަމުން މިހާރު މިނިވަން މުއައްސަސާއެއްގައި ޖަވާބުދާރީވާނެ އެއްވެސް ފަރާތެއް ނެތްކަމަށާއި، އެއީ އިންތިހާއަށް ހިތާމަކުރާ ކަމެއްކަމަށް އަބްދުއްރަހީމް ވިދާޅުވި އެވެ.

"ޤަބޫލުފުޅު ކުރައްވާ ރިޔާސީ އިންތިޚާބަށް 58 ދުވަސް އޮތް އިރު އަޅުގަނޑުމެން މި އަންނަނީ އަޅުގަނޑުމެންގެ ރިޔާސީ ކެންޑިޑޭޓު މި މީހުން ވަގަށް ނަގައިގެން ގެންގޮސް ހައްޔަރުކޮށްގެން އަނިޔާކުރަމުން ގެންދާތީ އެކަމާއި ކަންބޮޑުވެގެން. އެމަނިކުފާނު މިނިވަން ކުރުމަށްޓަކައި ކުރަންޖެހޭ މަސައްކަތްތަކަށް މިބޭފުޅުން ހުރަސްއަޅާތީ.. ރައީސް ޞާލިހު މި ހައްދަވާގޮތަކީ މި ހުރިހާ މުއައްސަސާތަކުގައި ތިބި މިވަގުތު މާލޭގައި ތިބި ވެރިން ގޮވައިގެން ކެމްޕޭނު ކުރައްވަނީ. ކައިރީގައި ޖޭއެސްސީގެ ރައީސް، އަނެއް ފަރާތުގައި އަނެއް ބޭފުޅަކު ބައިންދައިގެން މި ވިދާޅުވަނީ އިތުރު މީހަކަށް ފުރުސަތެއް ނުދެއްވާނަމޭ"

ޕީއެންސީގެ ރައީސް އަބްދުއްރަހީމް އަބްދުﷲ

އަަބްދުއްރަހީމްގެ ވާހަކައިގައި ވަނީ ރިޔާސީ ކެމްޕޭނުގެ ދަތުރުފުޅުގައި ރައީސް ޞާލިހު ރައީސް ޔާމިނަށް ނިސްބަތްކުރައްވާ ދައްކަވާ ވާހަކަތަކަށް ވެސް ރައްދުދެއްވާފަ އެވެ.

އެގޮތުން އަބްދުއްރަހީމް ވިދާޅުވީ ސިޔާސީ ގޮތުން ތައީދު އިތުރުކުރުމަށް ރައީސް ޔާމީނުގެ އިސްތަށިފުޅުގައި ސާބިތުނުހިފޭ ތުހުމަތުތައް އެޅުވުމަކީ ރައީސް ޞާލިހު ކުރައްވާ ވަރަށް ދަށު ދަރަޖައިގެ ކަމެއް ކަމަށެވެ.

ރައީސް ޔާމިނު ނުހައްގުން ޖަލުގައި ބަންދުކޮށް، މިނިވަން މުއައްސަސާތަކުގެ ބޭނުން ކަނޑުވާލައިގެން ރައީސް ޞާލިހު މަސައްކަތްޕުޅު ކުރައްވަނީ ގިނިކަންޏާ ރިޔާސީ އިންތިޚާބަށް ނިކުންނަންތޯ އައްބުއްރަހީމް އެއްސެވި އެވެ.

މިފަދައިން އަބދުއްރަހީމް ވިދާޅުވެފައިވާއިރު، އިދިކޮޅުން ބުނަމުންދަނީ ރައީސް ޞާލިހަށް ޕީޕީއެމްގެ ރިޔާސީ ކެންޑިޑޭޓު ރައީސް ޔާމިނާއި ވާދަކޮށްލަން ކެރިވަޑައި ނުގަންނަވާ ކަމަށެވެ. އަދި އެމަނިކުފާނުގެ މައްސަލަތަކަށް ސަރުކާރުން އިންތިހާއަށް ނުފޫޒު ފޯރުވަމުން ދަނީވެސް ރައީސް ޔާމިނާއި ވާދަކުރުމުގެ ހިތްވަރު ނެތުމުން ކަމަށެވެ.

އިދިކޮޅުން ދަނީ ރައީސް ޔާމިނަށް ރިޔާސީ އިންތިޚާބުގައި ވާދަކުރެވޭނެ ކަމުގެ ޔަގީންކަން ދެމުންނެވެ. އަދި އެމަނިކުފާނަށް އިންސާފު ހޯދައިދިނުމަށްޓަކައި، އެކި ފަހަރުމަތިން އިދިކޮޅުގެ ލީޑަރުން ވަނީ ސަރުކާރުގެ އެކި މުއައްސަސާތަކަށް ގޮސް، ރައީސް ޔާމިނުގެ އިސްތިއުނާފު އަވަސްކުރުމަށް އެ މުއައްސަސާތަކުގައި ދަންނަވާފަ އެވެ.

އޭގެ އިތުރުން އެމަނިކުފާނު މިނިވަންކުރުމަށް ގޮވާލާ އިދިކޮޅުން ދަނީ ސިލްސިލާގޮތެއްގައި ފުރަމާލޭގައި އިހުތިޖާޖު ވެސް ކުރަމުންނެވެ.