ކުރިއަށް އޮތް ފަސްއަހަރުގައި، ޒުވާން އައު ޖީލަށް ފުރުސަތުތައް ހުޅުވާލާނަން: ރައީސް ޞާލިހު

މިއަހަރުގެ ރިޔާސީ އިންތިހާބު ކާމިޔާބު ކުރައްވައި, ކުރިއަށް އޮތް ދައުރަށް އިންތިހާބުވެ ވަޑައިގެންފި ނަމަ، އެ ފަސް އަހަރުގެ ތެރޭގައި، ޒުވާން އައު ޖީލަށް ފުރުސަތުތައް ހުޅުވާލައްވާނެ ކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް ޞާލިހުގެ ރިޔާސީ ކެމްޕެއިނަށް މ. މަޑުއްވަރީ އަށް ވަޑައިގެން އެ ރަށު ރައްޔިތުންނާ ބައްދަލު ކުރައްވާ ވާހަކަ ދައްކަވަމުން ވިދާޅުވީ، މި ސަރުކާރުން ހުޅުވާލާފައިވާ ހިލޭ ޑިގްރީގެ އެހީގައި، 17,858 ދަރިވަރުން ތައުލީމް ހާސިލް ކުރަމުންދާ ކަމަށެވެ. އަދި ކުރިއަށް އޮތް ތިނެއް ނުވަތަ ހަތަރު އަހަރުގެ ތެރޭގައި އެކުދިން ކިޔަވައި ނިމިގެން މަސައްކަތުގެ މާހައުލަށް ނުކުނާނެ ކަން ރައީސް ޞާލިހު ފާހަގަކުރެއްވިއެވެ.

އެ 17,858 ދަރިވަރުން، ކުރިއަށް އޮތް ތިން ނުވަތަ ހަތަރު އަހަރުގެ ތެރޭގައި ކިޔަވައި ނިންމައި މަސައްކަތުގެ މަހައުލަށް ނުކުންނާނެ. މިހާތަނަށް އައި އިރުގައި 6,540 ދަރިވަރުން ކިޔަވައި ނިމިއްޖެ. ސްޓޫޑެންޓް ލޯން އަޅުގަނޑުމެން ދޫކުރުން. ރާއްޖެއިން ބޭރަށް ކިޔަވަންދާން ބޭނުންވާ ދަރިވަރުންނަށް. މިހާތަނަށް 3000 އަށްވުރެ ގިނަ ދަރިވަރުން އެ ސްކީމުގައި ރާއްޖެއިން ބޭރުގައި ކިޔަވަމުން އެބަދޭ. އޭގެ އިތުރުން ސްކޯލާޝިޕް ސަރުކާރުން އެބަ ދެން. 1265 ދަރިވަރުން ރާއްޖެއިން ބޭރުގައި ސްކޯލާޝިޕް އަށް ކިޔަވަމުން އެބަދޭ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހު ވިދާޅުވީ ދިވެހިރާއްޖޭގެ މުސްތަޤުބަލު ވަރަށް އުޖާލާ ކަމަށެވެ. އެގޮތުން ރާއްޖެއިން ބޭރުގަޔާއި ރާއްޖޭގައި ތައުލީމް ހާސިލްކުރަމުންދާ އެ ދަރިވަރުންތައް ރާއްޖެ އައިސް، މި ދިވެހި ރާއްޖެ އެހެން މަރުހަލާ އަކަށް ގެންދާނެ ކަމަށް އުއްމީދު ކުރައްވާ ކަމަށްވެސް ވިދާޅުވި އެވެ.

އަޅުގަނޑުމެން މިކުރާ މަސައްކަތަކީ މި ކުދިން އައިސް، މި ގައުމު މުޅިން އެހެން މަރުހަލާ އަކަށް ގެންދިޔުން. އަޅުގަނޑުމެން މި ބޭނުންވާ އުފާވެރި އަމާން ރާއްޖެ އަޅުގަނޑުމެންނަށް ހޯދައި ދެވޭނީ، މި ޒުވާން އައު ޖީލަށް ފުރުސަތުތައް ދީގެން. ޒުވާން އައު ޖީލަށް އަޅުގަނޑުމެންގެ ކުރިއަށް އޮތް 5 އަހަރު ތެރޭގައި ފުރުސަތު ތައް ހުޅުވާލާނަން.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

އެ ފުރުސަތު ތައް ހުޅުވާލައި، ދިވެހިރާއްޖެއަށް އަމާން ރާއްޖެއެއް ހޯދައި ދެވޭނީ އެމަނިކުފާނަށް ވޯޓު ލައި، ވެރިކަމަށް އިންތިޚާބު ކުރުމުން ކަމަށްވެސް ރައީސް ޞާލިހު ވިދާޅުވި އެވެ.