އަދުލުއިންސާފު ޤާއިމުކުރުމުގެ މަސައްކަތް މި ކުރަނީ ވަރަށް އިޚްލާޞްތެރި ކަމާއިއެކު: އުއްތަމަ ފަނޑިޔާރު

ދިވެހިރާއްޖޭގެ ކޯޓު ތަކުގައި އަދުލު އިންސާފު ގާއިމް ކުރުމުގެ މަސައްކަތް ކުރަމުންދަނީ ވަރަށް އިޚްލާޞްތެރި ކަމާއި އެކުގައި ކަމަށް އުއްތަމަ ފަނޑިޔާރު އަލް އުސްތާޒު މުޢުތަސިމް އަދުނާނު ވިދާޅުވެއްޖެއެވެ.

ކޯޓަށް ފަރިތަ ކެންޕެއިން އިފްތިތާޙް ކުރުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން އުއްތަމަ ފަނޑިޔާރު ވިދާޅުވީ، ރާއްޖޭގެ ދެކުނުގެ ބައެއް ރަށްތަކަށް މިފަހުން ކުރެވުނު ދަތުރުގެ ތެރެއިން, އެ ރަށް ރަށުގެ ކޯޓުގައި މީގެ ގާތްގަނޑަކަށް 70 ވަރަކަށް އަހަރު ކުރިން ކޮށްފައިވާ ޝަރީއަތްތައް ބަލާލުމުގެ ފުރުސަތު ލިބިގެން ދިޔަ ކަމަށެވެ. އަދި އެ ޝަރީއަތް ތައް ބަލާލުމުން އެކަންކަން ކުރިއަށް ގެންގޮސްފައިވާ ފުރިހަމަކަން އެނގިގެން ދިޔަ ކަމަށް ވިދާޅުވި އެވެ.

އެގޮތުން ދެފަރާތުގެ ވާހަކައާއި، މައްސަލައާއި ގުޅިގެން މީހުން ގެނެސް ކޮށްފައިވާ ސުވާލުތައްވެސް ފެންނަން ހުރި ކަމަށް އުއްތަމަ ފަނޑިޔާރު ވިދާޅުވި އެވެ. އެ ޝަރީއަތް ތަކުން އެންމެ ބޮޑަށް ފާހަގަވި އެއް ކަމަކީ، ފަނޑިޔާރު ކުރާ ސުވާލު ތަކަށް، އެ މައްސަލަ އާއި ގުޅިގެން ގެނެސްފައިވާ މީހާ ދީފައިވާ ތެދު ޖަވާބުކަން އުއްތަމަ ފަނޑިޔާރު ފާހަގަކުރެއްވިއެވެ.

"މިހާރުވެސް އަޅުގަނޑުމެން މި ކުރާ ކަމަކީ އަދުލު އިންސާފު ގާއިމް ކުރުން. އަޅުގަނޑުމެން މި ކުރާ މަސައްކަތް މިކުރަނީ ޚިދުމަތެއްގެ ގޮތުގައި. ވަރަށް އިޚްލާޞްތެރި ކަމާއި އެކު، ދެ ފަރާތުން މިދައްކާ ވާހަކަތައް އަހައި، އަޅުގަނޑުމެން ކުރިމަތީގައި މިހުންނަ ގާނޫނު ތަކަކީ ކޮބައިތޯ ބަލައި، އެ ގާނޫނު ތައް، ތަތުބީގުކޮށް، ދެފަރާތުގެ ދެމެދުގައި އުފެދިފައިވާ ޚުސޫމަތް، ނުވަތަ އެ ދައުވާ އަށް ހައްލެއް މި ހޯދައި ދެނީ."

އުއްތަމަ ފަނޑިޔާރު އަލް އުސްތާޒު މުޢުތަސިމް އަދުނާނު

އުއްތަމަ ފަނޑިޔާރު ވިދާޅުވީ ކޯޓަށް ފަރިތަ ކެންޕެއިނާއި އެކު ފެށިގެންދިޔައީ ވަރަށް މުހިންމު މަސައްކަތެއް ކަމަށެވެ. އެގޮތުން، އޭގެ ސަބަބުން ކޯޓު ތަކަށް ޚިދުމަތް ހޯދަން އަންނަ ފަރާތްތަކަށް، އެ ޚިދުމަތް ލުއި ފަސޭހަ ކަމާއިއެކު ހޯދޭނެ މަގު ފަހިވެގެންދާނެ ކަން އުއްތަމަ ފަނޑިޔާރު ފާހަގަކުރެއްވިއެވެ.