ފުލުހުންނަށް ހަމަލާދިން މައްސަލާގައި ހައްޔަރު ކުރި މީހުންގެ އަދަދު 10 އަށް!

މިދިޔަ ހުކުރު ދުވަހު މާލޭ މަޖީދީ މަގު ޓެޕްކޮން ހާޑްވެއާ ކައިރިން ތިން ފުލުހުކަށް ހަމަލާދިން މައްސަލައިގައި މިހާތަނަށް 10 މީހުން ފުލުހުން ހައްޔަރުކޮށްފައިވާ ކަމަށް ބުނެފިއެވެ.

ފުލުހުންގެ މީޑިއާ އޮފިޝަލް ރޭ ވިދާޅުވީ، ފުލުހުންނަށް ހަމަލާދިން މައްސަލައިގައި، ކޯޓު އަމުރެއްގެ ދަށުން، ބުދަ ދުވަހުގެ ރޭ އިތުރު 6 މީހަކު ހައްޔަރު ކޮށްފައިވާކަމަށެވެ.

އަދި އެމީހުންގެ ބަންދާއިމެދު ގޮތެއް ނިންމަން އިއްޔެ ކްރިމިނަލް ކޯޓަށް ހާޒިރުކުރުމުން އެތަނުން، 18 އަހަރުގެ މީހާ އާއި، 19 އަހަރުގެ މީހާ އާއި އަދި 20 އަހަރުގެ ދެ މީހުންގެ އިތުރުން 21 އަހަރުގެ މީހާ ޝަރީއަތް ނިމެންދެން ބަންދުގައި ބެހެއްޓުމަށް ކޯޓުން އަމުރު ކޮށްފައިވާ ކަމަށް ފުލުހުން ބުނެފައިވެއެވެ. އަދި ދެން ހައްޔަރު ކުރެވުނު 20 އަހަރުގެ މީހާއަށް 30 ދުވަހު ބަންދުގެ މުއްދަތު ކޯޓުން ޖަހާފައިވާ ކަމަށްވެސް ވެސް ފުލުހުން މައުލޫމާތު ދެއެވެ.

މިދިޔަ ހުކުރުދުވަހު ހެނދުނު ގާތްގަނޑަކަށް 11:52 ގައި ފުލުހުންގެ ޑްރަގް އެންފޯސްމެންޓްގައި މަސައްކަތް ކުރާ ތިން ފުލުހަކަށް ހަމަލާދިނުމާއި ގުޅިގެން އެ ތިން މީހުންނަށްވަނޫ އޭޑީކޭ ހޮސްޕިޓަލުން ފަރުވާވެސް ދީފައެވެ.

އެ ފަރުވާ ދެމުންދާ ފުލުހުންގެ ގާތަށް ޒިޔާރަތް ކުރުމަށްފަހު ސީޕީ ހަމީދު ކުރެއްވި ޓްވީޓެއްގައި ވިދާޅުވީ، އެ ތިން ފުލުހުންނަށް ހަމަލާ ދީފައިވަނީ ހެންވޭރަށް ނިސްބަތްވާ ގޭންގަކުން ކަމަށާއި، މި ހާދިސާ ހިނގާފައި ވަނީ އެ ފުލުހުން ޑިއުޓީގައި އުޅުނު ގަޑިއެއްގައި ނޫން ކަމަށެވެ.

ފުލުހުންނަށް ހަމަލާ ދިން މީހުން ހަމަލާ ދީފައިވަނީ ހަތިޔާރު ބޭނުން ކޮށްގެންކަމަށް ސީޕީ ވިދާޅުވިއެވެ. ނަމަވެސް އެއީ ކޮންބާވަތެއްގެ ހަތިޔާރެއްކަން އަދި އެކަމުގެ ތަފްސީލެއް ސީޕީ ދެއްވާފައި ނުވެއެވެ.

މީގެ އިތުރުން ހަމީދު ވިދާޅުވީ، ޑްރަގް ޓްރެފިކިންގ އާއި ގޭންގްތައް ހުއްޓުވުމަށް މަސައްކަތްތައް އިތުރަށް ހަރުދަނާ ކޮށް، ފުޅާ ކުރަންޖެހޭ ކަމަށާ، މުޖުތަމައު އަމާން ތަނަކަށް ހަދައި، މުޖުތަމައު ގައި ދިރިއުޅެމުންދާ މީހުންގެ ފުރާނަތައް ސަލަމާތް ކުރުމުގެ މަސައްކަތަށް އެހީވުމަށް، ފުލުހުންނަށްވެސް އިތުރު އެހީތެރިކަމާއި ރައްކާތެރިކަން ކަށަވަރު ކޮށްދޭން ޖެހޭ ކަމަށެވެ.