ސަރުކާރާ ދެކޮޅު ޕީޕީއެއް މީހަކު ފެނަކައިން ވަކިކުރީ ގާނޫނާ ހިލާފަށް ކަމަށް ނިންމައިފި!

ހއ.އިހަންވަންދޫ ފެނަކަ ބްރާންޗުގައި މަސައްކަތްކުރި، އިދިކޮޅު ޕީޕީއެމަށް ނިސްބަތްވާ މުވައްޒަފަކު ވަޒީފާއިން ވަކިކުރީ ގާނޫނާ ހިލާފަށް ކަމަށް ނިންމައި އޭނާއަށް އަނބުރާ ވަޒީފާ ދޭން، ވަޒީފާއާބެހޭ ޓްރައިބިއުނަލުން އަންގައިފިއެވެ.

ހއ. އިހަވަންދޫ ފެނަކަ ބްރާންޗުގެ އެސިސްޓެންޓް މެނޭޖަރގެ ވަޒީފާ އަދާކުރަމުން ދިޔަ އެރަށު ހިޔަލީބާއު، މުހައްމަދު ސިރާޖު، ވަޒީފާއިން ވަކި ކުރި މައްސަލަ އޭނާ ޓްރައިބިއުނަލަށް ލާފައިވާއިރު، އޭނާ ވަކިކުރި ސަބަބެއް ކަމަށް ފެނަކައިން ޓްރައިބިއުނަލްގައި ބުނެފައިވާ ސަބަބު ތަކުގެ ތެރޭގައި ހިމެނެނީ ޕީޕީއެއްގެ ސިޔާސީ ހަރަކާތްތަކުގައި ބައިވެރިވެ ސަރުކާރަށް ފާޑު ކިޔުމެވެ.

ސިރާޖު ވަޒިފާއިން ވަކިކުރި ސަބަބު ކަމަށް ޓްރައިބިއުނަލްގައި ފެނަކައިން ބުނެފައިވާ ކަންކަން:

- ސަރުކާރާ ރައްޔިތުންގެ މެދުގައި ނަފުރަތު އުފެއްދުމަށް މަސައްކަތްކުރުން

- ކުންފުނީގެ މުވައްޒަފަކަށްވެހުރެ ސަރުކާރާ ދެކޮޅަށް ހިންގޭ މުޒާހަރާތަކުގައި އަމަލީ ގޮތުން އިސްވެ ބައިވެރިވެ އުޅުން

- އެހެން މުވައްޒަފުންގެ މެދުގައި ސީނިއާ މެނޭޖްމަންޓަށް އޮންނަ އިތުބާރު ގެއްލުވާލަން މަސައްކަތްކުރުން
އެގޮތުން ސިރާޖު ވަޒީފާއިން ވަކިކުރީ ސަރުކާރާ ދެކޮޅަށް ހިންގޭ ސިޔާސީ ހަރަކާތްތަކުގައި ބައިވެރިވެގެންކަން ސާބިތުކުރުމަށް ޕީޕީއެމްއިން ބޭއްވި މުޒާހަރާއެއްގައި ޕޯސްޓަރެއް ހިފައިގެން ތިބި ފޮޓޯއެއް ފެނަކައިން މި މައްސަލައިގައި ހުށައަޅާފައިވެ އެވެ. އަދި ސަރުކާރަށް ފާޑުކިޔާ އޭނާ ކޮށްފައިވާ ކަމަށްބުނާ މެސެޖެއްގެ ސްކްރީން ޝޮޓްވެސް ހުށައަޅާފައިވެއެވެ. ނަމަވެސް އެކަންކަން އޭނާގެ މައްޗަށް ސާބިތުވާނެ ހެއްކެއް ފެނަކައަށް ނުދެއްކޭ ކަމަށް މި މައްސަލައިގައި ޓްރައިބިއުނަލްއިން ބުނެފައިވެ އެވެ.

މި މައްސަލާގައި ޓްރައިބިއުނަލުން ކުރި ހުކުމުގައި ބުނީ، ސިރާޖު އިހަންވަންދޫ ފެނަކަ ބްރާންޗުގައި 15 ޑިސެމްބަރު 2014 އިން ފެށިގެން ވަޒީފާ އަދާކުރަމުން ދަނިކޮށް 8 ޖުލައި 2021ގައި ވަޒީފާއިން ވަކިކުރީ ވާޒީފާއާ ބެހޭ ގާނޫނާ ހިލާފަށް ކަމަށެވެ. އަދި އޭނާ ވަކިކުރުމުގައި މައުޞޫއީ އަދުލުވެރިކަމާއި އިޖްރާއީ އަދުލުވެރިކަން ގާއިމުކޮށްފައިނުވާ ކަމަށް ކަނޑައަޅައި އޭނާ ވަޒީފާއިން ވަކިކުރިއިރު އަދާކުރަމުންދިޔައިރު ހުރި މަގާމަށް ނުވަތަ އެ މަގާމާ އެއްފެންވަރުގެ މަގާމަކަށް އަނބުރާ ރުޖޫއަކުރުމަށްވެސް ވަނީ އަމުރުކޮށްފަ އެވެ.

އަދި މީގެ އިތުރުން، ސިރާޖުއަކީ ވަޒީފާއިން މީގެ ކުރިން ވަކިވެފައިވާ ފަރާތެއްކަމަށް ނުބެލުމަށާއި އޭނާ ވަޒީފާއިން ވަކިކުރި ތާރީހުން ފެށިގެން އެފަރާތުގެ ވަޒީފާގެ ކަންތައް އަލުން ހަމަޖެހޭ ތާރީހާ ހަމައަށް އޭނާ ވަކިކުރިއިރު ލިބެމުންދިޔަ މުސާރައާ އިނާޔަތްތައް ދެމުން ގެންދަންވެސް ފެނަކަ ކޯޕަރޭޝަނުގެ މައްޗަށް ޓްރައިބިއުނަލުން ވަނީ އަމުރުކޮށްފައިވެ އެވެ.