އެއްޖިންސުން ގުޅުން ހިންގި ތާރީޚް ނޭނގޭތީ ނަސީރު ގެ މައްސަލަ ބަލައެއްނުގަތް!

އެއްޖިންސުން ގުޅުން ހިންގި ކަމުގެ ތުހުމަތުގައި ދައުލަތުން ދައުވާ އުފުލާފައިވާ ރާއްޖެޓީވީގެ ކުރީގެ ނޫސްވެރިޔާ، ނަސީރު އިބްރާހިމް، އެ ކުށް ކުރި ތާރީޚް ނޭނގޭތީ، އެ މައްސަލަ ބަލައި ނުގަނެ އަނބުރާ ޕްރޮސެކިއުޓާ ޖެނެރަލްގެ އޮފީހަށް ކްރިމިނަލް ކޯޓުން ފޮނުވާލައިފި އެވެ.

ނަސީރު ކަމަށް ތުހުމަތު ކުރެވޭ މީހަކު އެއްޖިންސުން ގުޅުން ހިންގާ މަންޒަރު ފެންނަ ވީޑިއޯއެއް މީސްމީޑިއާގައި އާންމުވީ ޖޫން މަހުގެ ތެރޭގަ އެވެ. އެހެން ނަމަވެސް އެއީ ކޮން އިރެއްގެ ވީޑިއޯ އެއް ކަމެއް ސާފެއް ނުވެއެވެ.

އެ މައްސަލަ އާއި މިދިޔަ ޖުލައި މަހު ފުުލުހުން ނަސީރު ހައްޔަރުވެސް ކުރިއެވެ. އެހެން ނަމަވެސް ބަންދުގައި ދުވަސްކޮޅަކު ބެހެއްޓުމަށްފަހު ފުލުހުން އޭނާ ދޫކޮށްލީ ދައުވާކޮށްދިނުމަށް އެދި ޕްރޮސެކިއުޓާ ޖެނެރަލް (ޕީޖީ) އަށް މައްސަލަ ފޮނުވުމަށްފަހު އެވެ.

މައުލޫމާތު ލިބިފައިވާ ގޮތުގައި، ނަސީރުގެ މައްސަލާގައި ދައުވާ ކޮށްދޭން އެދި ފޮނުވިއިރު އޭނާ ކުށްކުރި [އެއްޖިންސުން ގުޅުން ހިންގި] ތާރީހު އެނގެން ނެތުމުން ކްރިމިނަލް ކޯޓުގެ ރަޖިސްޓްރާ ވަނީ އެމައްސަލަ ބަލައި ނުގަތުމަށް ނިންމާފަ އެވެ. އެގޮތުން ނަސީރުގެ މައްޗަށް އުފުލި ދައުވާ ބަލައިނުގަންނަން ރަޖިސްޓްރާ ނިންމެވީ ޖުނަހުގެ ކުށެއްގެ [މެދު މިނުމުގެ ކުށްތައް] ތުހުމަތުގައި ދައުވާ އުފުލާނަމަ އެކުށެއް ކުރި ތާރީހުން ފެށިގެން ތިން އަހަރުތެރޭ ދައުވާ ކުރަން ޖެހޭނެ ކަމަށް ގާނޫނުލްއުގޫބާތުގައި ކަނޑައަޅާފައިވާތީ މި މައްސަލާގައި ކުށްކުރި ތާރީހެއް އެނގެން ނެތުމުން ކަމަށްވެސް މައުލޫމާތު ލިބެއެވެ.

އެހެންކަމުން އެނިންމުން ރިވިއުކޮށް ދިނުމަށް އެދި ޕީޖީ އޮފީހުން މިހާރު ވަނީ މައްސަލަ ކްރިމިނަލް ކޯޓުގެ ގާޒީންގެ މަޖިލީހަށް ހުށަހަޅައިފަ އެވެ.

ނަސީރުގެ އިތުރުންވެސް ގިނަ ބަޔަކު ބަންގުލަދޭޝަށް ނިސްބަތްވާ އެމްޑީ އަލަމްގިރި ނަމަކަށް ކިޔާ ޒުވާނަކާއެކު އެއްޖިންސުން ގުޅުންހިންގާ ވީޑިއޯތައް މިދިޔަ ޖޫން މަހުގެ ތެރޭގައި އާންމުވި އެވެ. އެ މައްސަލަތަކުގައި ޝާމިލްވާ ބައެއް މީހުންނަށް ދައުވާ ކުރަން ޕީޖީ އޮފީހުން ފޮނުވާފައިވާއިރު، އެ އޮފީހުން އެ މީހުންގެ މައްޗަށް ދައުވާކުރީ ގާނޫނުލްއުގޫބާތުގެ ދަށުންނެވެ. އެގޮތަށް ދައުވާ ކުރުމުން ކުށުގެ އަސާސީ އަދަބީ 9 މަހާއި 18 ދުވަހުގެ ޖަލު ހުކުމެކެވެ.
އެގޮތުން ދައުވާ ކުރަން ފޮނުވި މީހުންގެ ތެރެއިން ގާނޫނީ ވަކީލު ނާޒިމް އަބްދުއްސައްތާރާއި ބަންގްލަދޭޝްގެ އަލަމްގީރަށް ކުށްސާބިތުވެ މިހާރު ވަނީ ހުކުމްކޮށްފަ އެވެ.