ވެރިކަމުގެ ފުރަތަމަ 10 ދުވަހުގެ ތެރޭގައި ވާނުވާ ޖަހާފައި ތިބި މީހުން މިނިވަން ކުރާނަން: ރައީސް ޔާމީން

މާތް ރަސްކަލާނގެ ގެ ވާގިފުޅާއި ރައްޔިތުންގެ ތާއިދާއެކު ކުރިއަށް އޮތް ރިޔާސީ އިންތިޚާބު ކަމިޔާބުވެ ވެރިކަމަށް ވަޑައިގެންނެވިއްޖެ ނަމަ، ފުރަތަމަ 10 ދުވަހުގެ ތެރޭގައި ވާނުވާ މުއްދަތު ޖަހާފައި ޖަލުތަކުގައި ބަންދުކޮށްފައި ތިބި އެންމެން ދޫކޮށްލާނެކަމަށް ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ހއ އިހަވަންދޫގައި ބޭއްވި ޚާއްސަ ޖަލްސާއެއްގައި ވާހަކަ ދައްކަވަމުންނެވެ.

އެ ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ ކުދި ކުށްތަކުގެ ތުހުމަތުގައި ހައްޔަރުކުރެވޭ މީހުންނަކީ ޝަރީއަތް ނިމެންދެން ބަންދުގައި ބަހައްޓަން ޖެހޭ މީހުންކަމަށް ގަބޫލު ނުކުރައްވާކަމަށެވެ.

އެހެން ނަމަވެސް މިހާރުވެސް މާފުށީ ޖަލުގައާއި އެހެންވެސް ތަންތަނުގައި ވާނުވާ މުއްދަތު ޖަހާފައި އެތައް ބަޔަކު ތިބިކަމަށް އެމަނިކުފާނު ވިދާޅުވިއެވެ.

މުއްދަތު ޖަހާނަމަ މުއްދަތު ޖަހަންވާނީ އެމީހަކު މުޖުތަމައަށް ދޫކޮށްލާފައި ބެހެއްޓުމުގެ ސަބަބުން މުޖުތަމައަށް ގެއްލުމެއް ލިބިދާނެ ކަމުގެ ބިރު އޮތް މީހުން އެކަނިކަމަށް އެމަނިކުފާނު ވިދާޅުވިއެވެ.

"މުއްދަތު ޖައްސަވާ އެކަމަކު މުއްދަތު ޖައްސަވަންވާނީ ބޮޑެތި ބޮޑެތި ކުށްތައް ހިންގާކަމަށް ތުހުމަތުވާ މުޖުރިމުންގެ. ބޮޑެތި ޓެރަރިޒަމްގެ އަމަލު ހިންގާ މީހުން ނުވަތަ ބޮޑެތި މާރާމާރީގައި މީހުންގެ ގުނަވަން ބުރިކުރާ މީހުން ނުވަތަ މީހާގެ ޖިސްމަށް ބޮޑެތި ގެއްލުންދޭ މީހުން. މި ފަރާތްތައް ދޫކޮށްލާފައި ތިބުމަކީ މުޖުތަމައަށް އޮތް ނުރައްކަލެއް ކަމުގައިވާނަމަ މުއްދަތުޖަހާ"

ރައީސް ޔާމީން

ރައީސް ޔާމީން ވާނުވާ މުއްދަތު ޖަހާފައި ބަންދުގައި ބަހައްޓައިގެން ގޮސް ޝަރީއަތް ނިމޭއިރު، ހުކުން ކުރާ މުއްދަތަށްވުރެ ގިނަ ދުވަހުވެސް ޖަލުގައި ތިބޭ މީހުން މަދު ނޫން ކަން ފާހަގަކުރެވޭކަމަށެވެ. އަދި އެފަދަ ހާލަތްތަކުގައި އެމީހުންގެ ބޮޑު އަސާސީ ހައްގެއް ގެއްލިގެން ދިޔަ ނަމަވެސް އެމީހުންނަށް އެ ލިބުނު ގެއްލުމުގެ ބަދަލު ދައުލަތަށް ނުދެވޭކަމަށެވެ.

އެހެންކަމަށް ވާއިރު މިއީ ގާނޫނީ ހައްލެއް މިކަމުގައި ބޭނުންވާކަމެއްކަން އެމަނިކުފާނު ފާހަގަކުރެއްވިއެވެ.

އެކަންކަން ފާހަގަކުރައްވާ ރައީސް ޔާމީން ވިދާޅުވީ، އެމަނިކުފާނުގެ ވެރިކަމުގައި އެ މައްސަލައަށް ދާއިމީ ހައްލެއް ގެނެސްދެއްވާނެކަމަށެވެ. އަދި ވެރިކަމަށް ވަޑައިގަންނަވާތާ ފުރަތަމަ 10 ދުވަހުގެ ތެރޭގައި ވާނުވާ މުއްދތު ޖަހާފައި ތިބި މީހުން ދޫކޮށްލާނެކަމަށް ރައީސް ޔާމީން ވިދާޅުވިއެވެ.

އެއާއެކު އެމަނިކުފާނު ވަނީ ރަބަރު ތައްގަނޑު ޖަހާ އުސޫލުން ކޯޓުތަކުންވެސް މީހުން ބަންދުގައި ބޭތިއްބުމަށް އަމުރު ނުދެއްވުމަށް އިލްތިމާސްކުރައްވާފައެވެ. ކުށެއްގެ ތުހުމަތުގައި މީހުން ބަންދުކުރާ ހާލަތްތަކުގައި، އެ ބަންދު މުއްދަތު އިތުރުކުރަންވާނީ ދައުވާއެއް ކުރުމަށްފަހުގައިކަމަށް ރައީސް ޔާމީން ވިދާޅުވިއެވެ.

ތަހުގީގަށް މީހުން ބަންދުކޮށް އެ މުއްދަތު 10 ދުވަހުން 15 ދުވަހުން ގޮސް 45 ދުހަކަށް އިތުރު ކުރުމަކީ މީހުންގެ ހައްގުތައް ގެއްލިގެންދާ ކަމެއްގެ ގޮތުގައި އެމަނިކުފާނު ފާހަގަކުރެއްވިއެވެ. އަދި އެއީ ކޮންމެހެން ނިމުމަކަށް އަންނަން ޖެހޭ ކަމެއްކަމަށް އެމަނިކުފާނުގެ ވާހަކަފުޅުގައި ވަނީ ވިދާޅުވެފައެވެ.