3700 ގެ އާބާދީ އޮތް އިހަވަންދޫއިން ޕީޕީއެމްއާއި ގުޅުނީ 3 މީހުން: ޝިފާއު

3700 ގެ އާބާދީއެއް އޮތް ހއ އިހަވަންދޫއިން ޕީޕީއެމްއާއި ގުޅުނީ އެންމެ 3 މީހުންކަމަށް އިހަވަންދޫ ދާއިރާގެ އެމްޑީޕީ މެމްބަރު މުހައްމަދު ޝިފާއު ވިދާޅުވެއްޖެއެވެ.

ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ބޮޑުތިލަދުންމައްޗަށް ކުރައްވާ ދަތުރުފުޅުގައި އިއްޔެ ހއ އިހަވަންދުއަށް ވަޑައިގެންފައިވާއިރު، އެމަނިކުފާނަށް އެރަށުން ވަނީ ހޫނު މަރުހަބާއެއް ކިޔާފައެވެ.

އެމަނިކުފާނު ރަށަށް އަރާވަޑައިގަތީ ރަސްމީ އިއްޒަތުގައެވެ. އަދި އެ ވަގުތު އެމަނިކުފާނުގެ އިސްތިގުބާލުގައި ގިނަ އަދަދެއްގެ ބަޔަކު ތިބި މަންޒަރުވެސް ފެނިގެން ދިޔައެވެ. މުޅި އިހަވަންދޫ ވަނީ ރައީސް ޔާމިންއަށް މަރުހަބާ ކިޔުމަށް ޒީނަތްތެރިކުރެވިފައެވެ.

އެއާއެކުވެސް އިހަވަންދޫ ދާއިރާގެ މެމްބަރު ޝިފާއު ވިދާޅުވީ ރައީސް ޔާމިންއަށް މަރުހަބާ ދެންނެވުމަށް އެކަށީގެންވާ އަދަދަކަށް މީހުން ނިކުމެފައި ނުވާކަމަށެވެ. އަދި ރައީސް ޔާމީންއަށް މަރުހަބާ ދެންނެވުމަށް މީހުން ނުނިކުތީ ރައީސުލްޖުމްހޫރިއްޔާ އިބުރާހިމް މުހައްމަދު ސޯލިހު މި ގައުމަށް ގެނެސްދެއްވާ ތަރައްގީ ރައްޔިތުން ބަލައިގަންނާތީކަމަށް ޝިފާއު ވިދާޅުވިއެވެ. އަދި ރައީސް ޔާމީންއަށް މަރުހަބާ ދެންނެވުމަށް މީހުން ނުނިކުތީ އަނިޔާވެރި ވެރިކަމަކަށް އިހަވަންދޫ ރައްޔިތުން އެއްބަސް ނުވާތީކަމަށް އޭނާ ވިދާޅުވިއެވެ.

އިހަވަންދޫގައި ވަނީ ރޭ ވަނީ ރައީސް ޔާމީން ބައިވެރިވެވަޑައިގެން ޚާއްސަ ޖަލްސާއެއްވެސް ބާއްވާފައެވެ. އެ ޖަލްސާގައި ގިނަ އަދަދެއްގެ ބަޔަކު ޕީޕީއެމްއާއި ގުޅި ފޯމުތައް ހަވާލުކޮށްފައި ވީނަމަވެސް އިހަވަންދޫ ދާއިރާގެ އެމްޑީޕީ މެމްބަރު ޝިފާއު ވިދާޅުވީ 3700 މީހުން ދިރިއުޅޭ އިހަވަންދޫއިން ޕީޕީއެމްއާއި އަލަށް ގުޅުނީ އެންމެ ތިން މީހުންކަމަށެވެ. އަދި އެކަމުގެ ސަބަބުންވެސް ހަގީގަތުގައި އިހަވަންދޫގެ ތާއީދު ރައީސް ޔާމީންއަށް ނެތްކަން ހާމަވާކަމަށް އޭނާ ވިދާޅުވިއެވެ.

ބޮޑު ތިލަދުންމައްޗަށް ރައީސް ޔާމީން ކުރައްވާ ދަތުރުފުޅުގައި އިހަވަންދޫއަށް ވަޑައިގަތުމުން ކީ ހޫނު މަރުހަބާ އުފަލާއެކު ބަލައިގަންނަކަމަށް ރައީސް ޔާމީން ވަނީ ވިދާޅުވެފައެވެ.

އިހަވަންދޫއަށް ގިނަ ކަންތައްތަކެއް ކޮށްދެއްވުމަށްވެސް ރައީސް ޔާމީން ވަނީ ވައުދުވެވަޑައިގެންފައެވެ.

އޭގެ އިތުރުން މި ސަރުކާރުން އިހަވަންދޫގައި ހޮސްޕިޓަލު އެޅުން ހިމެނޭހެން 14 ކަމެއް ކޮށްދިނުމަށް ވައުދުވެފައިވާއިރު، މިހާތަނަށް އެއިން އެއްވެސް ވައުދެއް ފުއްދާފައި ނުވާކަމަށް އިހަވަންދޫ ކައުނސިލްގެ ރައީސް މުހައްމަދު ސަބާހު ވަނީ ރޭގެ ޖަލްސާގައި ވާހަކަދައްކަވަމުން ވިދާޅުވެފައެވެ.

ސަރުކާރުން މަސްވެރިންނަށް ބޮޑެތި އިހުމާލުތަކެއްވާތީ، އިހަވަންދޫ މަސްވެރިންގެ ތާއީދު މި ސަރުކާރަށް ގެއްލިފައިވާކަމަށް މަޝްވެރިންގެ ޝުއޫރުތައް ފާޅުކޮށް ވާހަކަ ދެއްކެވި ބޭފުޅަކުވެސް ވަނީ ވިދާޅުވެފައެވެ.