ގިނަމީހުން ތިބީ ލިބޭ 1000ރ އިން 20 ރުފިޔާ ތަރައްޤީއަށްޓަކައި ދޭން ތައްޔާރަށް: ނިހާދު

ދިމާވާ ގިނަ މީހުން ތިބީ އެމީހުންނަށް ލިބޭ 1000 ރުފިޔާ އިން 20 ރުފިޔާ ތަރައްގީއަށްޓަކައި ހޭދަކުރާން ތައްޔާރަށް ކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު މުހައްމަދު ނިހާދު ވިދާޅުވެއްޖެެއެވެ.

ޓެކްސް ދިވެހިރައްޔިތުންގެ އަތުން ނަގާ ޓެކްސް ބޮޑު ކުރުމާއި ދެކޮޅަށް އިދިކޮޅު ކޯލިޝަނުން ނާއި ސަރުކާރު ނިސްބަތްވާ އެމްޑީޕީގެ ބައެއް މަޖިލިސް މެންބަރުން ވެސް ވާހަކަ ދައްކަވަމުންދާ ދަނޑިވަޅެއްގައި ނިހާދު ކުރެއްްވި ޓުވީޓެއްގައި ވިދާޅުވީ، އޭނާއާއި ދިމާވާ ގިނަ މީހުން ތިބީ، އެމީހުންނަށް ލިބޭ 1000 ރުފިޔާ އިން 20 ރުފިޔާ ތަރައްގީއަށްޓަކައި ހޭދަކުރާން ތައްޔާރަށް ކަމަށެވެ.

އަދި ޓެކްސް އާއި ގުޅިގެން އެކި ދުވަހު އެކިގޮތަށް ވާހަކަ ދައްކައި ރައްޔިތުންގެ މެދުގައި ފިތުނަ އުފައްދަން މަސައްކަތް ކުރަނީ، އެގޮތަށް ވާހަކަ ދައްކާ މީހުން ބޭނުން ކަންކަން ބޭނުން ގޮތަށް ސަރުކާރުގެ ތެރެއިން ނުކުރެވޭތީ ކަމަށްވެސް ނިހާދު ތުހުމަތުކުރައްވައެވެ.

ސަރުކާރުން ކުރީން ވަނީ މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހު ގެނައުމަށް ނިންމާ އެކަން އިއުލާނު ކޮށްފައެވެ.

އެގޮތުން ޖުލައި ހަތްވަނަ ދުވަހު ރައީސް އޮފީހުގައި އޮތް ނޫސްވެރީންގެ ބައްދަލްވުމުގައި ފިނޭންސް މިނިސްޓަރު އިބްރާހިމް އަމީރު ވިދާޅުވި ގޮތުގައި ޓީޖީއެސްޓީ 12 އިންސައްތައިން 16 އިންސައްތަ އަށް ބޮޑު ކުރަން ސަރުކާރުން ވަނީ ނިންމާފައެވެ. އަދި ޖީއެސްޓީ 6 އިންސައްތައިން 8 އިންސައްތަ އަށް ބޮޑު ކުރުމަށްވެސް ވަނީ ނިންމާފައެވެ.

އެގޮތުން، މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހު ގެނައުމަށް ރައްޔިތުންގެ މަޖިލީހަށް އޮގަސްޓު 28 ވަނަ ދުވަހު ވަނީ މަޖިލީހަށް ހުށަހަޅާފައެވެ.