ދީނީ ޕްރޮގްރާމްތައް ހުށަހެޅުމާ ދީނީ ނަސޭހަތް ދިނުމަކީ ދެކަމެއް: ޑރ.އަލީ ޒާހިރު

ދީނީ ޕްރޮގްރާމުތައް ހުށަހެޅުމާއި ދީނީ ނަސޭހަތް ދިނުމަކީ ދެކަމެއް ކަމަށް ރާއްޖޭގެ ފުންނާބު އުސް ދީނީ އިލްމުވެރިޔާ ޑރ ޢަލީ ޒާހިރު ވިދާޅުވެއްޖެއެވެ.

ޖަމިއްޔަތުއްސަލަފުގެ ޗީފް މާކެޓިންގ އޮފިސަރ އަދި ދާރިސް ޓީވީގެ ސްޓޭޝަން މެނޭޖަރ ޢަލީ ރަމީޒަކީ ދީނީ ޢިލްމް ވެރިއެއް ނޫން ކަމަށްބުނެ، އޭނާ ދައުވަތުގެ މައިދާނުގައި ކުރައްވަމުން ގެންދާ ހަރަކާތްތަކާއި ގުޅޭގޮތުން އޮންލައިން ނޫހަކުން ލިޔެފައިވާ ޚަބަރަކާއި ގުޅިގެން ޑރ. ޢަލީ ޒާހިރު މިއަދު ކުރެއްވި ޓުވީޓެއްގައި ވިދާޅުވީ، ދީނީ ޕްރޮގްރާމުތައް ހުށަހެޅުމާއި ދީނީ ނަސޭހަތް ދިނުމަކީ ދެކަމެއް ކަމަށެވެ.

އަދި ދީނީ ނަސޭހަތް ދިނުމުގެ ހުއްދަ ބޭނުންވާނީ އެކަން ކުރާމީހުންނަށް ކަން ފާހަގަކުރައްވައި ޑރ. ޢަލީ ޒާހިރު ވިދާޅުވީ، ޢަލީ ރަމީޒަކީ ދީނީ ނަސޭހަތް ދެއްވާ ބޭފުޅެއް ނޫން ކަމަށެވެ.

ޢަލީ ރަމީޒާއި ގުޅޭގޮތުން އޮންލައިން ނޫހަކުން ލިޔެފައިވާ ޚަބަރުގައި ވަނީ އޭނާ އަކީ ދީނީ ނަސޭހަތް ދިނުމުގެ ހުއްދަ ނެތް މީހެއް ނަމަވެސް ރަށްރަށަށް ގޮސް ދީނީ ނަސޭހަތްދީ އޭނާގެ ނަން ބޭނުން ކޮށްގެންވެސް ހަރަކާތް ބާއްވާ ކަމަށެވެ. އަދި ދީނީ ޗެނަލެއް ކަމުގައިވާ ދާރިސް ޓީވީ ގައިވެސް ޢަލީ ރަމީޒު މަސައްކަތް ކުރައްވާ ކަން އެ ޚަބަރުގައި ފާހަގަކޮށްފައިވެއެވެ.

އެ ނޫހުން އެފަދައިން ރިޕޯޓް ކޮށްފައިވީ ނަމަވެސް، ޖަމިއްޔަތުއްސަލަފްގެ ފަރާތުން ރަށްރަށުގައި ހިންގާ ޕްރޮގްރާމް ތަކުގައި ޢަލީ ރަމީޒު ބައިވެރިވި ނަމަވެސް ދަރުސްތައް ދެއްވަނީ ދީނީ ހުއްދަ ލިބިފައިވާ ދީނީ ޢިލްމުވެރިންނެވެ. އަދި ދީނީ ފޯރަމް ތަކާއި ޕްރޮގްރާމް ތައް ހުށަހެޅުމުގައި އޭނާ ބައިވެރިވާ ނަމަވެސް އެފަދަ ޕްރޮގްރާމްތަކުގައި ވެސް ދަރުސް ދެއްވަނީ ދީނީ ޢިލްމު ވެރިންނެވެ.

އަދި މީގެ އިތުރުން، ޢަލީ ރަމީޒާއެކު ނަމުގައި ރަށް ރަށުގައި ކުރިއަށް ގެންދާ ޕްރޮގްރާމަކީވެސް ދީނީ ދަރުސް ދޭ ޕްރޮގްރާމެއް ނޫނެވެ. އެހެނެއްކަމަކު އެއީ އޭނާގެ ޙަޔާތާއި ގުޅޭ ކަންކަމާއި، މިއުޒިކުގެ ދުނިޔެއިން ހިދަޔާތުގެ މަގަށް އޭނާ ކުރި ދަތުރުގެ ވާހަކަތައް ކިޔައިދޭ ޕްރޮގްރާމެކެވެ.