ޓެކްސްބިލާއި ދެކޮޅަށް ވޯޓުދިން އެމްޑީޕީގެ މެމްބަރުންނަށް ފިޔަވަޅު އަޅަނީ!

ސަރުކާރުން ހުށައަޅާފައިވާ ގޮތަށް ރައްޔިތުންގެ އަތުން ނަގާ ޓެކްސް ބޮޑުކުރުމާއި ދެކޮޅަށް ވޯޓުދިން އެމްޑީޕީގެ މެމްބަރުންނާއި ދޭތެރޭގައި ފިޔަވަޅު އަޅުއްވާނެކަމަށް އެމްޑީޕީގެ ޕީޖީ ލީޑަރު މުހައްމަދު އަސްލަމް ވިދާޅުވެއްޖެއެވެ.

އަންނަ އަހަރުގެ ޖެނުއަރީއިން ފެށިގެން ޖީއެސްޓީއާއި ޓީޖީއެސްޓީ ބޮޑުކުރުމަށް ސަރުކާރުން މަޖިލީހަށް ބިލު ހުށައެލިތާ ކުޑަ ދުވަސްކޮޅެއްގެ ތެރޭގައި އެމްޑީޕީގެ ޕީޖީގެ ލީޑަރޝިޕުން ވަނީ ސަރުކާރުން އެދޭގޮތަށް އެ ބިލު ފާސްކޮށްދިނުމަށް ވިޕްލައިން ނެރެފައެވެ. އަދި އެ ބިލާއި ދެކޮޅަށް ވޯޓުދޭ މެމްބަރުންނާއި މެދު ފިޔަވަޅު އަޅާނެކަމަށް އެމްޑީޕީގެ ޕީޖީ ވަނީ ބުނެފައެވެ.

މިއަދު އެ ބިލަށް ވޯޓުލުން ކުރިއަށް ގެންގޮސްފައިވާއިރު، އެމްޑީޕީގެ 14 މެމްބަރުން ވަނީ ޓެކްސް ބިލު ބޮޑުކުރުމަށް ހުށައެޅި ބިލަށް ވޯޓުދިނުމަށް ނެރުނު ވިޕާއި ޚިލާފުވެފައެވެ. އަދި ޓެކްސް ބޮޑުކުރުމާއި ދެކޮޅަށް ވޯޓުދެއްވާފައެވެ.

ޓެކްސް ބޮޑުކުރުމާއި ދެކޮޅަށް ވޯޓުދިން އެމްޑީޕީގެ މެމްބަރުން:

1. ހެންވާރު އުތުރު ދާއިރާގެ މެމްބަރު އިބްރާހިމް މުއިއްޒު

2. މެދު ހެންވޭރު ދާއިރާގެ މެމްބަރު އަލީ އާޒިމް

3. ހެންވޭރު ހުޅަނގު ދާއިރާގެ މެމްބަރު ހަސަން ލަތީފް

4. މައްޗަންގޮޅި އުތުރު ދާއިރާގެ މެމްބަރު މުހައްމަދު ރަޝީދު

5. ގަލޮޅު އުތުރު ދާއިރާގެ މެމްބަރު އަދި މަޖިލީހުގެ ނައިބު ރައީސް އީވާ އަބްދުﷲ

6. މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި)

7. މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ)

8. އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ)

9. ތޮއްޑޫ ދާއިރާގެ މެމްބަރު ހަސަން ޝިޔާން

10. ވިލުފުށި ދާއިރާގެ މެމްބަރު ހަސަން އަފީފް

11. މަޑަވެލި ދާއިރާގެ މެމްބަރު ހުސައިން ފިރުޝާން

12. ހުޅުދޫ ދާއިރާގެ މެމްބަރު އިލްޔާސް ލަބީބް

13. ހިތަދޫ މެދު ދާއިރާގެ މެމްބަރު އަހްމަދު ރަޝީދު

14. ގައްދޫ ދާއިރާގެ މެމްބަރު އަހްމަދު ޒާހިރު

އެމްޑީޕީގެ ބައެއް މެމްބަރުން ވޯޓު ނުދެއްވި ނަމަވެސް މަޖިލީހުގެ މެޖޯރިޓީއާއެކު އެ ބިލު ވަނީ މިއަދު ފަސްކޮށްފައެވެ.

އެހެން ނަމަވެސް ބިލު ފާސްކުރުމަށް ވޯޓުދިނުމަށް ނެރުނު ވިޕާއި ޚިލާފުވި މެމްބަރުންނާއި ދޭތެރޭގައި ފިޔަވަޅު އަޅުއްވާނެކަމަށް އެމްޑީޕީގެ ޕީޖީ ލީޑަރު އަސްލަމް ވަނީ ވިދާޅުވެފައެވެ.

ސަރުކާރުން އެދުނުގޮތަށް މިއަދު ޓެކްސް ބޮޑުކުރުމަށް ހުށައެޅި ބިލު މަޖިލީހުން ފާސްކޮށްފައިވާއިރު، އެ ބިލާއިމެދު އެމްޑީޕީގެ މެމްބަރުންގެ މެދުގައި ވަނީ ވަރަށް ބޮޑަށް ޚިޔާލު ތަފާތުވުންތައް އުފެދިފައެވެ. އެގޮތުން ސަރުކާރުގެ ޚަރަދުތައް ކުޑަނުކޮށް ޓެކްސް ބޮޑުކުރުމަކީ ކޮށްގެންވާނެކަމެއް ނޫންކަން ބިލާއި ދެކޮޅު މެމްބަރުން ވަނީ ވިދާޅުވެފައެވެ.

އަދި އާމްދަނީ ހޯދާނެ އިތުރު ގޮތެއް ސަރުކާރަށް ދެއްކިފައި ނުވާއިރު ޓެކްސް ބޮޑުކުރުމަކީ ރައްޔިތުންނަށް އެންމެ ފައިދާ ބޮޑު ގޮތް ނޫންކަންވެސް މެމްބަރުން ވަނީ ފާހަގަކުރައްވާފައެވެ.