ރިޒުވާންގެ ހެޓްރިކާއެކު ޔޫވީ އަތުން އީގަލްސްއަށް ތަފާތުބޮޑު މޮޅެއް

ދިވެހި ޕްރެމިއާ ލީގުގެ މިއަދު ހަވީރު ޔުނައިޓެޑް ވިކްޓަރީ އާއި ދެކޮޅަށް ކުޅުނު މެޗު 8-1 ގެ ތަފާތުބޮޑު ނަތީޖާއަކުން ކުލަބް އީގަލްސް އިން ކާމިޔާބުކޮށްފި އެވެ.

ގާތްގަނޑަކަށް ތިން މަހެއްހާ ދުވަހު ލީގުގެ ކުޅުން މެދުކެނޑިފަ އޮތުމަށްފަހު މިއަދު ހަވީރު ލީގުގެ ކުޅުން އަލުން ފެށިއިރު، މިމެޗުގެ ފުރަތަމަ ހާފުގައި އީގަލްސް އިން ވަނީ ދެލަނޑު ލީޑެއް ނަގާފައެވެ. އެޓީމުގެ މި ދެ ލަނޑު ވެސް ކާމިޔާބުކޮށްދިން ކެޕްޓަން އަހުމަދު ރިޒުވާން އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ކުލަބު އީގަލްސް ކުރީގައި އޮވެގެންނެވެ.

މެޗުގެ ދެވަަނަ ހާފު ފެށިގެން ފުރަތަމަ މިނެޓުގައި ރިޒުވާން ވަނީ އީގަލްސްގެ ތިންވަނަ ލަނޑު ކާމިޔާބުކޮށް މިމެޗުގައި އޭނާގެ ހެޓްރިކް ފުރިހަމަކޮށްފައެވެ. އަދި މިއީ މިސީޒަނުގައި އޭނާ ލީގުގައި ކާމިޔާބުކުރި 14 ވަނަ ލަނޑެވެ. މިހާފުގައި އީގަލްސް އިން އިތުރު ފަސް ލަނޑު ކާމިޔާބުކުރިއިރު އެޓީމުގެ އިސްމާއިލް އީސާ، ޕެޓްރޯވިކް މިލޮވަން، އަބްދުﷲ ޒުހާން، ޒައިން ޒަފަރު އަދި އިބްރާހިމް މަހުދީ ހުސެއިން މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ.

މިމެޗުގައި ޔުނައިޓްޑް ވިކްޓްރީ އިން ކާމިޔާބުކުރި ހަމައެކަނި ލަނޑު ދެވަނަ ހާފުގެ 79 ވަނަ މިނެޓުގައި ކާމިޔާބުކޮށްދިނީ އެޓީމުގެ ޝަނާން ރަޝާދު އެވެ. މިއާއެކު މެޗުގެ ކުޅުން ނިމިގެންދިޔައީ 8-1 ގެ ނަތީޖާއަކުން ކުލަބް އީގަލްސް ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ލީގުގައި ކުޅުނު 10 މެޗުން ކުލަބް އީގަލްސްއަށް 26 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ އެއްވަނައިގައެވެ. އަދި މިމެޗުން ބަލިވި ޔުނައިޓްޑް ވިކްޓްރީ ލީގުގައި ކުޅުނު 11 މެޗުން ލިބުނު 6 ޕޮއިންޓާއެކު އެޓީމު މިވަގުތު އޮތީ ލީގު ތާވަލްގެ 6 ވަނައިގައެވެ.