އެފްރިކާގެ ޗެމްޕިއަން އަލް އަހުލީ އަތުން ބަލިވެ، އަލް އިއްތިހާދު ކުލަބް ވޯލްޑްކަޕުން ކަޓައިފި

ވޯލްޑްކަޕް ފުޓްބޯޅަ މުބާރާތުގެ ކުއާޓާ ފައިނަލުގައި ހުކުރުދުވަހުގެ ރޭ 3-1 ގެ ނަތީޖާއަކުން އެފްރިކާގެ ޗެންޕިއަން މިސްރުގެ އަލް އަހުލީ އަތުން ބަލިވެ، ސައުދީ ޕްރޮފެޝަނަލް ލީގުގެ ޗެމްޕިއަން އަލް އިއްތިހާދު މުބާރާތުން ކަޓައިފިއެވެ.

ސައުދީގައި މިހާރު ކުރިއަށްދާ މުބާރާތުގެ ކުއާޓާ ފައިނަލުން އަލް އިއްތިހާދު ޖާގަ ހޯދީ ފަސޭހަކަމާއި އެކު 3-0 ގެ ނަތީޖާއަކުން އޯޝަނިއޭގެ ޗެންޕިއަން އޮސްޓްރޭލިޔާގެ އޯކްލޭންޑް ސިޓީ ބަލިކުރުމަށްފަހު އެވެ. އަދި މިމުބާރާތުގައި ވާދަކުރުމުގެ ފުރުސަތު އެޓީމަށް ލިބުނީ މުބާރާތް ބާއްވާ ގައުމުގެ ލީގު ޗެންޕިއަނުންގެ ހައިސިއްޔަތުންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އަލް އަހްލީ އިންނެވެ. މިލަނޑު ފުރަތަމަ ހާފުގެ 21 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ ޓިއުނީޝިޔާގެ ޑިފެންޑަރު ޢަލީ މާލޫލް އެވެ.

މިހާފުގައި އަލް އިއްތިހާދުން މެޗުގެ ނަތީޖާ އެއްވަރު ކުރުމަށް އެންމެ ހުސް ފުރުސަތެއް ލިބުނީ އެޓީމުގެ ކެޕްޓަން ކަރީމް ބެންޒީމާ އަށެވެ. ފުރަތަަމަ ހާފު 45 ވަނަ މިނެޓުގައި އަލް އަހުލީގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ ވަނީ އަލް އިއްތިހާދަށް ޕެނަލްޓީއެއް ދީފައެވެ.

ނަމަވެސް އެޓީމުގެ ކެޕްޓަން ބެންޒީމާ ކުރިއަށް ފޮނުވާލި ޕެނަލްޓީ އަލް އަހްލީގެ ކީއްޕަރު މުހައްމަދު އެލް ޝެނަވީ ވަނީ ހުޝިޔާރުކަމާއެކު ދިފާއުކޮށްފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އަލް އަހުލީ ކުރީގައި އޮވެގެންނެވެ.

މެޗުގެ ދެވަަނަ ހާފު ވެސް ވަރުގަދަކޮށް ފެށީ އަލް އަހްލީ އިންނެވެ. ނަތީޖާއެއްގެ ގޮތުން ދެވަނަ ހާފުގެ 59 ވަނަ މިނެޓުގައި އެޓީމުން ވަނީ އިތުރު ލަނޑެއް ކާމިޔާބުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ޙުސައިން އެލް ޝަހަތު އެވެ. އަދި އޭގެ ތިން މިނެޓު ފަހުން އެޓީމުގެ ތިންވަނަ ލަނޑު ކާމިޔާބުކޮށްދިނީ މިޑްފީލްޑަރު އީމާމް އަޝޫރު އެވެ.

މިމެޗުގެ 90 ވަނަ މިނެޓުގައި އަލް އަހްލީގެ ފްރާންސް ފޯވާޑްއެންތަނީ މޮޑެސްޓޭ ކުރި ކުށަކާއި ގުޅިގެން މެޗުގެ ރެފްރީ ވަނީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލައިފައެވެ. މޮޑެސްޓޭ ބަދަލު ކުޅުންތެރިއެއްގެ ގޮތުގައި ކުޅެންނުކުތީ ދެވަނަ ހާފުގެ 87 ވަނަ މިނެޓުގައެވެ.

މިމެޗުގައި އަލް އިއްތިހާދުން ކަމިޔާބުކުރި ހަމައެކަނި ލަނޑު ދެވަނަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ކެޕްޓަން ކަރީމް ބެންޒީމާ އެވެ. މިލަނޑާއެކު މެޗުގެ ކުޅުން ނިމިގެންދިޔައީ 3-1 ގެ ނަތީޖާއަކުން އަލް އަހްލީ ކުރީގައި އޮވެގެންނެވެ.

މުބާރާތުގެ ސެމީ ފައިނަލުގެ ފުރަތަަމަ މެޗުގައި މިމަހުގެ 18 ވަނަ ދުވަހުގެ ރޭ ރާއްޖޭ ގަޑިން 23:00 ގައި އަލް އަހްލީ އިން ނުކުންނާނީ ބްރެޒިލްގެ ފްލުމިނެންސޭ އާއި ދެކޮޅަށެވެ. އަދި ސެމީ ފައިނަލުގެ ދެވަނަ މެޗުގައި 19 ވަނަ ދުވަހުގެ ރޭ 23:00 ގައި ޔޫރަޕުގެ ޗެމްޕިއަން މެންޗެސްޓާ ސިޓީ އިން ނުކުންނާނީ އޭޝިއާގެ ޗެންޕިއަން ޖަޕާނުގެ އުރަވާ ރެޑްސް އާއި ދެކޮޅަށެވެ.