ހުރަވީ ދުވަހުގެ ރަސްމީ ޖަލްސާ މިރޭ

ހުރަވީ ދުވަހުގެ ރަސްމީ ޖަލްސާ މިރޭ އޮންނާނެ ކަމަށް ދިވެހިބަހާއި ޘަޤާފަތާއި ތަރިކަ އާއި ބެހޭ ވުޒާރާއިން ބުނެފިއެވެ.

އެ ވުޒާރާއިން ބުނީ ހުރަވީ ދުވަހުގެ ރަސްމީ ޖަލްސާއަކީ، ދިވެހިރާއްޖޭގެ މިނިވަންކަމުގެ ދިފާޢުގައި ދޮންބަންޑާރައިން ކުރެއްވި ޖިހާދުގެ ހަނދާނަށް ޚާއްޞަކޮށް، ދިވެހިރާއްޖޭގެ މިނިވަންކަމާއި އިސްތިޤްލާލު ދެމެހެއްޓުމުގެ މުހިންމުކަމަށް އަލިއަޅުވާލައި، ޤައުމީ ބަޠަލުންނަށް ޝުކުރު އަދާކޮށް ޒިކުރާ އައު ކުރުމަށް ބާއްވާ ޖަލްސާއެއް ކަމަށެވެ.

ހުރަވީ ދުވަހުގެ ރަސްމީ ޖަލްސާ ބޭއްވުމަށް ހަމަޖެހިފައިވަނީ ޒުވާނުންގެ މަރުކަޒު (ސޯޝަލް ސެންޓަރު) ގައި ކަމަށް އެވުޒާރާއިން ބުނެއެވެ.

މި ޖަލްސާގައި ދިވެހިރާއްޖޭގެ ރައީސުލްޖުމްހޫރިއްޔާއާއި ދައުލަތަށް ގިނަދުވަހު ޚިދުމަތް ކުރައްވާފައިވާ ޢިއްޒަތްތެރީންނާއި ދައުލަތާއި ސަރުކާރުގެ އިސް މަޤާމުތަކުގައި ތިއްބެވި ބޭފުޅުންގެ ބައިވެރިވެވަޑައިގަތުމަށް ހަމަޖެހިފައިވާ ކަމަށް ވެސް އެ ވުޒާރާއިން ބުނެފައިވެއެވެ.

މީގެ އިތުރުން ދަޢުވަތު އެރުވިގެން ވަޑައިގަންނަވާ ފަރާތްތަކާއި ސްކޫލުތަކުގެ ދަރިވަރުން ވެސް ބައިވެރިވުމަށްވަނީ ހަމަޖެހިފައެވެ. މި ޖަލްސާ ޓީވީ އާއި ރޭޑިއޯ އިން ވަގުތުން ދުރަށް ފޮނުވުމަށް ވަނީ ހަމަޖެހިފައެވެ.

ހުރަވީ ދުވަހާ ގުޅުވައިގެން ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ކުރިއަށްގެންދާ ޙަރަކާތްތަކުގެ ތެރޭގައި، ދުވަހުގެ ރަސްމީ ޖަލްސާގެ އިތުރުން ހުރަވީ ދުވަހުގެ ޚާއްޞަ އެސެމްބްލީ އެއް ބެއްވުމަށް ވަނީ ހަމަޖެހިފައި ކަމަށް އެ ވުޒާރާއިން ބުނެއެވެ.

މީގެ އިތުރުން ކުޑަކުދިންގެ ހަވީރެއް އިއްޔެ ބާއްވައިފައިވާއިރު  "ދޮންބަންޑާރައިންގެ ހަނދާނީ މައުރަޒު" ގެ ނަމުގައި ޤައުމީ ދާރުލްއާސާރުގައި ޑިސެންބަރު 17 އިން 21 އަށް މައުރަޒެއް ކުރިއަށް ދާނެ ކަމަށްވެސް ބުނެއެވެ.