ބޮޑު އެއްވެސް މައްސަލައެއް ހައްލެއް ނުވޭ، އެކަން އެއްވެސް ޕާޓީއަކުން ނުކުރާނެ: އުމަރު

ރާއްޖޭގައި އޮތް އިޖްތިމާއީ ބޮޑު އެއްވެސް މައްސަލައަކަށް ހައްލެއް ނުހޯދުނު ކަމަށާ މިހާރު ހުރި ސިޔާސީ ޕާޓީއަކުން އެ މައްސަލަތަކަށް ހައްލު ހޯދާނެ ކަމަށް ގަބޫލުކުރަން ޖެހޭ އެއްވެސް ސަބަބެއް ނެތް ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.

އުމަރު މިހެން ވިދާޅުވީ ސޯޝަލް މީޑިއާގައި އާންމުކުރެއްވި ވީޑިއޯ މެސެޖެއް ހިމެނޭ ޕޯސްޓެއްގަ އެވެ. އުމަރު ވިދާޅުވީ ބައެއް ނާތަހުޒީބު މުޖްތަމައުތަކުގައި ރޭޕް ކުރުމުން އެކަންކުރި ފިރިހެން މީހާއާ އަނިޔާ ލިބުނު އަންހެން މީހާ ކައިވެނިކުރުވާ ކަމަށެވެ. އެކަން ކުރުވަނީ ރޭޕް ހުއްޓުވުމުގެ ނަމުގައި ކަމަށެވެ.

މި ސަރުކާރުން މަސްތުވާތަކެއްޗާއި ގޭންގު ކުށްތައް ހުއްޓުވުމަށް ގެންގުޅެނީ ވެސް އެފަދަ ސިޔާސަތެއް ކަމަށެވެ. އެގޮތުން ގޭންގުތަކުގެ މީހުންނަށް ނުހައްގު ފުރުސަތު ފަހިކޮށްދޭ ކަމުގައި ތުހުމަތު ކުރެއްވި އެވެ.

"ގޭންގު މީހުންނަށް ސަރުކާރުގެ ހުރިހާ ވަޒީފާތަކަކާއި ސަރުކާރުގެ ކޮންޓްރެކްޓްތަކަކާއި ސަރުކާރުގެ ބިންތައް ދީގެން ވިޔަފާރި ކުރުވާފައި މި ބުނަނީ މިހާރު އެއް ގޭންގު އަނެއް ގޭންގަކަށް މިހާރު ވަޅިއެއް ނުހަރައޭ,"

80 ކިލޯގެ މަސްތުވާތަކެތި ރާއްޖެ އެތެރެކުރި މީހަކު 20 އަހަރު ދުވަހުގެ މުއްދަތަށް ޖަލަށްލާފައި ވަނިކޮށް ދާދި ފަހުން ދޫކޮށްލާފައިވާ ކަމަށާ މި ސަރުކާރުން ވެސް ކަން ކުރަނީ ކުރީ ސަރުކާރުތަކެކޭ އެއްފަދައިން އެއްވެސް ސިޔާސަތެއް ނެތި ކަމަށް އުމަރު ވިދާޅުވި އެވެ.

އުމަރު ވިދާޅުވީ މައްސަލަތައް ހައްލުކުރުމުގެ ނަމުގައި ހުރިހާ ޕާޓީތަކުން ވެސް ދައްކަނީ އެއް ވާހަކައެއް ކަމަށެވެ. އަދި އެއިން އެއްވެސް ޕާޓީއަކަށް ބޮޑެތި މައްސަލަތައް ހައްލެއް ނުކުރެވޭނެ ކަމުގައި ވިދާޅުވި އެވެ.

"އެއްވެސް ޕޮލިޓިކަލް ޕާޓީއަކަށް އިތުބާރުކުރަން ޖެހޭ ސަބަބެއް ނެތް. އެ މީހުންގެ އައު ހިޔާލެއް ނެތް. އެ މީހުން އިތުރަށް ކޮށްދޭނެ ކަމެއް ނެތް. ދިވެހިރާއްޖެއަށް ބޭނުންވަނީ ސްޓްރޯންގް އަދި އޮނެސްޓް ލީޑަރެއް 2028 ވަނަ އަހަރަށް," އުމަރު އާންމުކުރެއްވި ވީޑިއޯގައި ވިދާޅުވެފައިވެ އެވެ.