އެމްޑީޕީ، ރައީސް ޔާމީނަކަށް ދުވަހަކުވެސް ހެވެއް ނޭދޭނެ، އެކަން ރައްޔިތުން ވިސްނާތި: އިދިކޮޅު

ސަރުކާރު ހިންގާ މައި ޕާޓީ އެމްޑީޕީއަކީ ދުވަހަކުވެސް ޕީޕީއެމްގެ ރައީސް, ޔާމީން އަބްދުލްގައްޔޫމަށް ހެޔޮއެދޭނެ ޕާޓީއެއް ނޫންކަން ރައްޔިތުން ހަނދާން ނައްތާނުލުމަށް އިދިކޮޅުން އެދިއްޖެ އެވެ.

ޕީޕީއެމް އޮފީސް ދޮރު މަތީގައި އޮތް ޖަލްސާއެއްގައި ވާހަކަދައްކަވަމުން އިދިކޮޅު އިއްތިހާދުގައި ހިމެނޭ ޕީއެންސީގެ ރައީސް އަބްދުއްރަހީމް ވަނީ ރައީސް ޔާމީންއަކީ ވިޝަނަރީ ލީޑަރެއްކަމަށް ނަޝީދު ވިދާޅުވި ސަބަބާއި ގުޅޭގޮތުން ވާހަކަފުޅު ދައްކަވާފައެވެ.

އެގޮތުން އަބްދުއްރަހީމް ވިދާޅުވީ ރައީސް ޔާމީންއަކީ ކިޔަވާވިދާޅުވެގެން ހުންނެވި، ވިޝަނަރީ ލީޑަރެއްކަން ނަޝީދު ވިދާޅުވުމުގެ މާ ކުރިންވެސް ރައްޔިތުންނަށް އެނގޭކަމަށެވެ. އެމަނިކުފާނުގެ ދުރުވިސްނުންފުޅާއެކު ކުރެއްވި މަސައްކަތުން ވެރިކަމުގެ ފަސް އަހަރު ގެނެސްދެއްވި ތަރައްގީއަކީ ރައްޔިތުން މިއަދުވެސް އޭގެ ފޮނި މީރުކަން ހޯދަމުންދާ ތަރައްގީއެއްކަމަށް އަބްދުއްރަހީމް ވިދާޅުވި އެވެ.

އެއާއެކު އަބްދުއްރަހީމް ވިދާޅުވީ ނަޝީދު ރައީސް ޔާމީންގެ ނަންފުޅު ބޭނުން ކުރެއްވީ މި ދަނޑިވަޅުގައި ސިޔާސީ ތާއީދު ހޯއްދެވުމަށެވެ. އަދި ނަޝީދުގެވެސް އެމްޑީޕީގެ ހުރިހާ ލީޑަރުންގެވެސް އަމާޒަކީ ރައީސް ޔާމީންއަށް އަނިޔާވެރިވުން ކަމަށާއި، އެމްޑީޕީގެ އެންމެ ފުރަތަމަ ވެރިކަމުގައި ނަޝީދު ހުންނަވައިގެންވެސް ރައީސް ޔާމީނަށް ބޮޑެތި އަނިޔާތަކެއް ދީފައިވާކަމަށް އަބްދުއްރަހީމް ވިދާޅުވިއެވެ.

"އޭރު އަޅުގަނޑުމެން ތިބީ ޕީއޭ ކިޔާ ޕާޓީއެއްގައި، ޕީއޭގެ ލީޑަރަކީ ރައީސް ޔާމީން.. ޕީޖީ ލީޑަރަކީ ނާޒިމް. ރައީސް ޔާމީންއާއި އަޅުގަނޑާއި އޭރު ކިނބިދޫ ދާއިރާގެ މެމްބަރު މޫސާ ޒަމީރާއި ދިއްގަރު ދާއިރާގެ މެމްބަރު ނާޒިމާއި ތިބީ ނާޒިމްއާއި ވާހަކަދައްކާލަން. ތިއްބާ ކުއްލިއަކަށް ބަރު ހަތިޔާރާއެއްކޮށް އެތަނަށް އައީ.. ޓޭންކަރުތަކާއެކު އެތަނަށް އައީ.. އައިގޮތަށް އައިސް ރައީސް ޔާމީން އުފުރާލައިގެން ގެންދިޔައީ ގޭ ދޮރު ތަޅުލާފަ ހުއްޓާ ދޮރު ވައްޓާލާފަ.. އެހެންވީމަ ދަންނަވަން މި އުޅޭ ވާހަކައަކީ އެމްޑީީޕީއެއް ރައީސް ޔާމިނަށް ހެވެއް ނޭދޭނެ"

ޕީއެންސީގެ ރައީސް އަބްދުއްރަހީމް

އަބްދުއްރަހީމް ވިދާޅުވީ އެމްޑީޕީގެ ޕްރައިމަރީ އާއި ދޭތެރޭގައި އިދިކޮޅުގެ އެއްވެސް ޝައުގުވެރިކަމެއް ނެތް ކަމަށެވެ. އެމްޑީޕީގެ ދެ ރައީސުންކުރެ ކޮންމެ ބޭފުޅަކު އެ އިންތިޚާބު ކާމިޔާބު ކުރެއްވި ނަމަވެސް އެމީހުންނަކީ އެއް ބައެއް ކަމަށާއި، އެމީހުންގެ އަމާޒަކަށް ވާނީ ރައީސް ޔާމީންއަށް އަނިޔާވެރިވުން ކަމަށް އަބްދުއްރަހީމް ވިދާޅުވިއެވެ.

އެކަން ހަނދާނުގައި ބެހެއްޓުމަށް ރައްޔިތުންގެ ކިބައިން އެދިލައްވަމުން އަބްދުއްރަހީމް ވަނީ ރައީސް ޔާމީން ޖަލަށް ވަޑައިގަތުމުގެ ކުރިން ދޫކޮށްފައި ފިޔަ ނަސޭހަތުގައި ރައްޔިތުން ބާރަށް ހިފެހެއްޓުމަށް ގޮވާލައްވާފަ އެވެ.

މި ގައުމާއި ރައްޔިތުންނަށް އެމްޑީޕީގެ ފަރާތުން ހެޔޮ ގޮތެއް ނުވާނެކަން އެމްޑީޕީގެ ވެރިކަންތަކުން ހާމަވެގެން ގޮސްފައިވާއިރު، ކުރިއަށް އޮތް އިންތިޚާބަކީ ގައުމީ ފިކުރު އިސްކޮށް ވޯޓު ދޭ އިންތިޚާބަކަށް ހައްދަވާދެއްވުމަށް ރައީސް ޔާމީން ވިދާޅުވި ވާހަކަފުޅު ހަނދާން ނައްތާނުލުމަށް އަބްދުއްރަހީމް ވަނީ ރައްޔިތުންގެ ކިބައިން އެދިވަޑައިގެންފަ އެވެ.