"ފަސް އަހަރު ސަރުކާރަކުން ނުކުރާހާ މަސައްކަތް މި ލިބުނު ދެ އަހަރުގައި ކޮށްފިން"

ފަސް އަހަރު އެއްވެސް ސަރުކާރަކުން ނުކުރާހާ މަސައްކަތް މި ލިބުނު ދެ އަހަރުގައި މި ސަރުކާރުން ކޮށްފައިވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

އެމްޑީޕީގެ ރިޔާސީ ޕްރައިމަރީގެ ކެންޕެއިންގައި ހއ އަށް ކުރައްވަމުންދާ ދަތުރުގައި އެ އަތޮޅުގެ އިހަވަންދޫގެ އެމްޑީޕީ މެންބަރުންނާއި ބައްދަލު ކުރައްވައި ވާހަކަ ދައްކަވަމުން ރައީސް ޞާލިހު ވިދާޅުވީ، އެމަނިކުފާނު ވެރިކަމަށް ވަޑައިގެންނެވީ ގިނަ ވައުދު ތަކެއް ވެވަޑައިގެންނެވުމަަށް ފަހުގައި ކަމަށެވެ.

އެގޮތުން ހއ އަތޮޅުގެ ރަށްތަކަށް ވެސް ގިނަ ވައުދުތަކެއް ވެވަޑައިގެންފައިވާ ކަން ފާހަގަކުރައްވައި ރައީސް ޞާލިހު ވިދާޅުވީ ސަރުކާރުގެ ފާއިތުވެދިޔަ 4 އަހަރުގައި، އެތަނުން ގިނަ ވައުދުތަކެއް ފުއްދުމުގެ މަސައްކަތް ފެށި، އަނެއްބައި މަސައްކަތް ނިމިފައިވާ ކަމަށެވެ.

އަދި މިސަރުކާރުގެ ޕްލޭންގައި އޮތީ ފަހު އަހަރު އަންނައިރު އެއްވެސް މަސައްކަތެއް ނުފަށައި ނުބޭއްވޭ ގޮތަށް މަސައްކަތް ކުރިއަށް ގެންދިޔުމަށް ކަމަށާ، އެހެންނަމަވެސް އެފަދައިން މަސައްކަތްތައް ކުރިއަށް ނުދިޔައީ ކޮވިޑްގެ ޢާލަމީ ވަބާގެ ސަބަބުން ކަމަށްވެސް ރައީސް ވިދާޅުވި އެވެ.

"އަޅުގަނޑުމެންގެ ބައެއް ބޭފުޅުން އެ ހަނދާނެއް މިއަދަކު ނެތް. 4 އަހަރު އެކީގައި އަޅުގަނޑުމެން އާއްމު ހާލަތުގައި އުޅުނުކަމަށް ދެކިވަޑައިގެން ވާހަކަފުޅު ދައްކަވަމުން އެބަދޭ. އެހެން ނަމަވެސް، މި ލިބުނު ގާތްގަނޑަކަށް ދެ އަހަރުތެތޭގައި، އެއްވެސް ސަރުކާރަކުން މި ވޭތުވެދިޔަ ތަނުގައި 5 އަހަރުތެރޭގައި ނުކުރާ ވަރުގެ ގިނަ މަސައްކަތްތަކެއް ރާއްޖޭގެ އެކި ކަންކޮޅުތަކުގައި އަޅުގަނޑުމެންނަށް ހިންގިއްޖެ" ރައީސް ޞާލިހު ވިދާޅުވިއެވެ.

އެގޮތުން ރައީސް ޞާލިހު ވިދާޅުވީ ހަމައެކަނި އިހަވަންދޫ އަށްވެސް ދައުލަތުގެ ބަޖެޓުން 129.7 މިލިއަން ރުފިޔާ ޚަރަދުކޮށްފައިވާ ކަމަށާ، އިހަވަންދޫ ދާއިރާގައި ހިމެނޭ މާރަންދޫއަށް 34 މިލިއަން އަދި މޮޅަދޫއަށް 49 މިލިއަން ރުފިޔާ ޚަރަދު ކުރެވިފައިވާ ކަމަށެވެ. އެ އެންމެހައި ޚަރަދަކީވެސް އިހަވަންދޫ ދާއިރާގެ ރައްޔިތުންގެ ދިރިއުޅުމުގެ ކަންކަން ރަނގަޅު ކޮށްދިނުމަށް ޓަކައި ކޮށްދިން ކަންކަން ރައީސް ފާހަގަކުރެއްވިއެވެ.