އިންޓަނެޓްގެ އަގުހެޔޮކުރަން ވީ ވައުދު ފުއްދުން 2022 ގައި!

އިންޓަނެޓްގެ އަގުހެޔޮކުރުމަށް ސަރުކާރުން ވެފައިވާ ވައުދު ފުއްދުން، އޮތީ 2022 ވަނަ އަހަރުގެތެރޭގައި ކަމަށް ރައީސުލްޖުމްހޫރިއްޔާގެ އޮފީހުން ބުނެފިއެވެ.

ރައީސް އޮފީހުން މިހެން ބުނެފައި ވަނީ، އިންޓަނެޓް އަގު ކުޑަކުރުމަށް ކޮމިއުނިކޭޝަން، ސައިންސް އެންޑް ޓެކްނޮލޮޖީން ކުރަންޖެހޭ ކަންކަން ނިންމުމަށްފަހު، މިނިސްޓަރު މަލީހު ޖަމާލު ސޮއިކުރައްވައި އެކަން ލިޔުމުން ރައީސް އޮފީހަށް އެންގުމުން، މަލީހަށް ދެއްވި ޖަވާބުގައެވެ.

ރައީސް އޮފީހުގެ ޕޮލިސީ ސެކްރެޓަރީ، އާމިނަތު ޝައުނާ ސޮއިކުރައްވައި، މި މަހުގެ 10 ވަނަ ދުވަހު މިނިސްޓަރު މަލީހަށް ފޮނުވި ސިޓީގައި ބުނެފައިވަނީ، ކަނޑައެޅޭ ވަކި ޕަސެންޓޭޖަކަށް ބިނާކޮށް އަގުތައް ދަށްކުރުމުން، އިންޓަނެޓުގެ ހުރިހާ ޕެކޭޖްތަކަކުން ރައްޔިތުން ބޭނުންވާފަދަ ހެޔޮ ބަދަލެއް ލިބިގެންދާނެ ކަމަށް ނުބެލެވޭ ކަމަށެވެ.

އަދި ރައްޔިތުންނަށް އެކަން އެދެވޭ ގޮތެއްގައި ބަލައިނުގަނެވި، މުވާސަލާތީ ހިދުމަތްތަކުން ދައުލަތަށް ލިބޭ އާމްދަނީއަށް އެގޮތަށް ބަދަލު ގެނައުމުން ބޮޑު އަސަރެއް ކުރާނެކަމަށް ބެލެވޭ ކަމަށްވެސް ސިޓީގައި ވެއެވެ.

އިންޓަނެޓުގެ އަގު ހެޔޮކުރުމުގެ މަސައްކަތް ކުރިއަށް ގެންދިއުމުގައި ސަރުކާރުގެ ސްޓްރެޓީޖިކް އެކްޝަން ޕްލޭނަށް ރިއާޔަތްކޮށް، ސެޕްގައިވާ ޓައިމްލައިންއާ އެއްގޮތަށް މަސައްކަތް ކުރުމަށް މިނިސްޓްރީއަށް ވަނީ އަންގައިފައެވެ.

އެގޮތުން އިންޓަނެޓުގެ އަގުހެޔޮކުރުމުގެ މަސައްކަތް ތަންފީޒު ކުރުމަށް ސެޕްގައި ބަލާފައިވަނީ 2022 ވަނަ އަހަރުގެ ތެރޭގައި ކަމަށްވާތީ، އެ އަމާޒަށް ވާސިލްވެވޭނެ ގޮތަށް، އެންމެ އެކަށޭނަ، ވަށާޖެހޭ ހައްލުތަކެއް ހޯދައި ހުށަހެޅުމަށް ވެސް މިނިސްޓްރީއަށް އަންގާފައި ވެއެވެ.

މީގެއިތުރުން ޑޭޓާ އެލަވަންސް އިތުރުކޮށްދިނުމަށް ބަދަލެއް ގެނައުމުގައި، މިނިސްޓްރީގެ ޕްރޮޕޯސަލްގައި ފާހަގަކޮށްފައިވާ ގޮތަށް ސޯޝަލް މީޑިއާގެ އެލަވަންސް އިން ބަދަލު ގެނައުމަކުން ރައްޔިތުންގެ ޝަކުވާތަކަށް އެކަށޭނަ ހައްލެއް ލިބި، މާބޮޑު ލުޔެއް ލިބިގެންދާނެ ކަމަށް ނުބެލެވޭ ކަމަށް ވެސް ރައީސް އޮފީހުން ފޮނުވި ސިޓީގައި ބުނެފައިވެއެވެ.

އެހެންކަމުން އިންޓަނެޓުގެ އަގަށް ބަދަލުގެނައުމުގައި، އެ ކަންކަމަށް ރިއާޔަތްކުރުން މުހިންމު ކަމަށް ރައީސް އޮފީހުން ދެކެއެވެ.

އިންޓަނެޓްގެ އަގު ހެޔޮކުރުމަކީ ރައީސް ސޯލިހުގެ ރިޔާސީ ވައުދެކެވެ. ނަމަވެސް ވެރިކަމަށް މިއަދު 15 މަސް ފުރުނު އިރު، އަދިވެސް އިންޓަނެޓްގެ އަގަށް އެއްވެސް ބަދަލެއް އައިސްފައި ނުވާތީ ރައްޔިތުން ދަނީ ކަންބޮޑުވުން ފާޅުކުރަމުންނެވެ.