މޯދީގެ އަނިޔާވެރިކަމާއި ބެހޭ ޑޮކިއުމެންޓްރީ ހެދި ބީބީސީގެ އޮފީސްތައް ބަލައި ފާސްކޮށްފި

އިންޑިއާގެ ބޮޑުވަޒީރު ނަރެންދުރަ މޯދީގެ އަނިޔާވެރި ކަމާއި ގުޅޭ ޑޮކިއުމެންޓްރީ ހެދި ބީބީސީގެ އޮފީސްތައް ބަލައި ފާސްކޮށްފިއެވެ.

އިންޑިޔާގެ މުމްބައި އަދި ވެރިރަށް ނިޔު ދިއްލީގައި ހުންނަ ބީބީސީގެ އޮފީސްތައް ސަރުކާރުގެ އެންގުމަށް ބަލައި ފާސްކޮށްފައިވާ ކަން ބީބީސީގެ ރަސްމީ ޓުވިޓާ އެކައުންޓުން ވަނީ ބުނެފައެވެ.

އެގޮތުން އިންޑިއާގެ އިންކަމް ޓެކްސް އިދާރާއިން އެ އޮފީސްތައް ބަލައި ފާސްކުރީ، އެގައުމުގައި ބީބީސީ ހިންގުމުގައި ޓެކްސްއަށް މަކަރު ހަދާފައިވާ ކަމަށް ތުހުމަތުކޮށެވެ.

މިމަހު 14 ވަނަ ދުވަހުން ފެށިގެން އިއްޔެގެ ނިޔަލަށް ކުރިއަށް ގެންދިޔަ މި ރެއިޑްގެ ސަބަބުން ބީބީސީގެ އެ އޮފީސްތަކުގައި މަސައްކަތް ކުރާ ބައެއް މުވައްޒަފުންނަށް ރޭގަނޑު އެއްކޮށް އޮފީހުގައި ހޭދަކުރަން ޖެހުނު ކަމަށް ބީބީސީން ބުނެއެވެ.

"އަހަރެމެންގެ ސްޓާފުންނަށް ހިތްވަރުދެމުން މިދަނީ. އެތަނުން އެއްބަޔަކަށް އިންކަމް ޓެކްސް އޮތޯރިޓީގެ ފަރާތުން ވަރަށް ދިގު ސުވާލުތައް ކުރެވުނު. އަނެއް ބަޔަކު މުޅި ރޭ އެއްކޮަށް އޮފީހުގައި ހޭދަކުރަންޖެހުނު. އަހަރެމެންނަށް އެންމެ މުހިންމު ކަމަކީ މުވައްޒަފުންގެ ދުޅަހެޔޮކަން." ބީބީސީން ބުނެފައިވެއެވެ.

އަދި އެ ތަހުގީގު ތެރެއިން އެ އޮފީސްތަކުގެ ބައެއް މުވައްޒަފުންގެ ފޯނު ހޯދައި، އެމީހުންގެ ކޮމްޕިއުޓަރު ވެސް ޗެކްކޮށްފައިވާ ކަމަށް މުވައްޒަފުން ބުނެފައިވެއެވެ.

މީގެ އިތުރުން އެ ނޫހުން ބުނީ، ބީބީސީ އަކީ މިނިވަން މީޑިއާ އެއް ކަމަށާ، އަދި އެފަދަ ރެއިޑް ތަކުގެ ސަބަބުން އެމީހުން ޚަބަރު ފެތުރުމަށް ކުރާ މަސައްކަތައް އެއްވެސް ބުރޫއެއް ނާރާނެ ކަމަށެވެ. އަދި ކުރިއަށް އޮތް ތަނުގައިވެސް، އެއްވެސް ބިރެއް ނެތި، ވަކި ފަރާތަކަށް ބުރަވުމެއް ނުވާ، މައުލޫމާތު ތައް ފޯރުކޮށްދިނުމުގައި ސާބިތުވެ ތިބޭނެ ކަމަށްވެސް ބުނެފައިވެއެވެ.

އިންޑިއާ ސަރުކާރުން އަންގައިގެން އެ ގައުމުގެ އިންކަމް ޓެކްސް އޮތޯރިޓީން ބީބީސީގެ އޮފީސްތައް ރެއިޑް ކޮށްފައި މިވަނީ، އެ ނޫހުން މޯދީގެ އަނިޔާވެރި ކަމާއި ގުޅޭގޮތުން ހެދި ޑޮކިޔުމެންޓްރީ އިންޑިޔާ ގައި ދެއްކުން މަނާކުރިތާ މަހެއްހާ ދުވަސް ވެފައި ވަނިކޮށެވެ.

'އިންޑިއާ: ދަ މޯދީ ކުއެޝަން' ގެ ނަން ދީފައިވާ އެ ޑޮކިއުމެންޓްރީއަކީ 2002 ވަނަ އަހަރު ގުޖުރާތުގައި ހިނގި ހަމަނުޖެހުންތަކުގައި، އޭރު ޗީފް މިނިސްޓަރުގެ ގޮތުގައި ހުރި މޯދީ އަމަލުކުރި ގޮތާ މެދު ސުވާލު އުފައްދައި ތައްޔާރުކޮށްފައިވާ ޑޮކިއުމެންޓްރީއެކެވެ.

މުސްލިމުންނަށް އަމާޒުކޮށް ހަމަލާދިން އެ ހާދިސާގައި 2،000އަށް ވުރެ ގިނަ މީހުން ނިޔާވިއިރު، އެ ހަމަނުޖެހުންތައް ހުއްޓުވަން ފިޔަވަޅު ނާޅަން ފުލުހުންނަށް މޯދީ އެންގި ކަމަށް ވަނީ ތުހުމަތުކޮށްފައެވެ. ނަމަވެސް މޯދީ ގެންދަނީ އެ ހަމަނުޖެހުންތަކުގައި އިހުމާލެއްވާ ކަމަށް ބުނެ ކުރާ ތުހުމަތުތައް ދޮގު ކުރަމުންނެވެ.

ބީބީސީން މިދިޔަ މަހުގެ 17ގައި އެ ޑޮކިއުމެންޓްރީ ދެއްކީ ހަމައެކަނި 'ބީބީސީ ޓޫ' ޗެނަލްއިންނާއި އިނގިރޭސިވިލާތުގައި ބީބީސީ އައިޕްލޭޔާއިން އެކަންޏެވެ. އެއާއެކު އިންޑިއާ ސަރުކާރުން ވަނީ އެ އެޕިސޯޑު ޔޫޓިއުބާއި ޓްވިޓާއިން ނުދެއްކުމަށް އަމުރުކޮށްފައެވެ. އެއީ އެ ގައުމުގެ އިންފޮމޭޝަން ޓެކްނޮލޮޖީގެ ގަވާއިދުގެ ދަށުން، ސަރުކާރަށް ލިބިފައިވާ ކުއްލި ބާރުތައް ބޭނުންކޮށްގެންނެވެ.

އެ އަމުރާ އެއްގޮތަށް ޔޫޓިއުބާއި ޓްވިޓާއިން އަމަލު ކުރި ނަމަވެސް، އެ ޑޮކިއުމެންޓްރީގެ ފުރަތަމަ އެޕިސޯޑު ވަނީ ސޯޝަލް މީޑިއާގެ އެހެން ޕްލެޓްފޯމްތަކުގައި ފެތުރިފައެވެ. އެގޮތުން އިންޑިއާގައި ޓެލެގްރާމްއާއި ވަޓްސްއެޕް މެދުވެރިކޮށް އެ އެޕިސޯޑު ގިނަ ބަޔަކު ހިއްސާކޮށް، ބަލާފައިވެއެވެ.