އެމްޑީޕީއަކީ މިހާރު ސިޔާސީ ޕާޓީއެކޭ ބުނަން ދަތި: އަމްރު
ރާއްޖޭގެ އެންމެ ގިނަ ދުވަސްވީ ސިޔާސީ ޕާޓީ އަދި މިހާރު ވެރިކަން ކުރަމުންދާ މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަކީ މިހާރު ސިޔާސީ ޕާޓީއެއްކަމަށް ދަންނަވަން ވެސް ދަތިވާކަމަށް އެސްޓީއޯގެ ކުރީގެ މެނޭޖިން ޑިރެކްޓަރު އަދި އެ ޕާޓީގެ ސިޔާސަތު ކޮމިޓީގެ މުޤައްރިރުކަން ކުރެއްވި ހުސެއިން އަމްރު ވިދާޅުވެއްޖެ އެވެ.
އެމްޑީޕީގެ ފިކުރެއްގެ ދިރުން ގޮފިން މިއަދު ބޭއްވި ޕްރެސް ކޮންފަރެންސްގައި ވާހަކަދައްކަވަމުން އަމްރު ވަނީ އެމްޑީޕީން ވަކިވި ސަބަބު ސާފުކޮށްދެއްވާފަ އެވެ.
އަމްރު ވިދާޅުވީ އެމްޑީޕީ އުފެއްދީ އަދި އެ ޕާޓީގައި މަސައްކަތް ކުރައްވަމުން ގެންދިޔައީ ރާއްޖޭގެ ރައްޔިތުންނަށް ތާހިރު ދިރިއުޅުމެއް ހޯދާދިނުމަށް ކަމަށެވެ. އެއީ އިންތިޒާމުވެގެން ހިންގޭ ސިޔާސީ ހަރަކާތްތަކެއް ތެރެއިން ހިންގޭ މަސައްކަތެއްކަން އަމްރު ފާހަގަކުރެއްވި އެވެ.
އެއާއެކު އޭނާ ވިދާޅުވީ އެމްޑީޕީ މަސައްކަތް ކުރަމުން އައި ގޮތްތައް މިހާރު ބޮލާލާ ޖަހާފައިވާ ކަމަށެވެ.
ރައްޔިތުންނަށް ތާހިރު ދިރިއުޅުމެއް ހޯދާދިނުމަށް ބޭނުންވާ ހުރިހާކަމެއް މި ސަރުކާރަށް ލިބިފައި އޮވެމެ ސަރުކާރުން މަސައްކަތް ކުރަމުންދަނީ ރައްޔިތުންގެ އަތުން އެކި ގޮތްތަކަށް ފައިސާ ނެގުމަށްކަމަށް އަމްރު ވިދާޅުވި އެވެ. އަދި މުޅި ސަރުކާރު ކޮރަޕްޝަންގެ ހާއްޔަކަށް ބަދަލުވެފައިވާކަމަށް އަމްރު ވިދާޅުވި އެވެ.
"މިއަދު ރައްޔިތުންނަށް ތާހިރު ރަނގަޅު ދިރިއުޅުމެއް ހޯދާދިނުމަށްޓަކައި ތަންމިނަށް ފުރުސަތު ލިބިފައި މިވަނީ. އެހެން ނަމަވެސް އަޅުގަނޑުމެންނަށް ފެންނަމުން މިދަނީ އިންތިޒާމުވެގެން ހިންގޭ ސިޔާސީ ހަރަކާތް ހިންގުމުގެ ބަދަލުގައި ރައްޔިތުންގެ ފައިސާއިން ވައްކަން ކުރުމާއި، ދައުލަތުގެ ބައިތުލްމާލު ހުސްކޮށްލުމާއި، ރައްޔިތުންގެ އަތުން ނަގާ ޓެކްސް ބޮޑުކުރުމާއި، ރައްޔިތުން ބިކަކޮށް ނިކަމެތި ކުރުމާއި، ވަކި މަދު ބަޔަކަށް ތާއީދު ނުކުރާކަމަށް ވަނީވިއްޔާމު ވަޒީފާގެ ބިރުދެއްކުމާއި މިކަހަލަ ނުބައި ނުލަފާ ކޮށްގެން ނުވާނެ ހުރިހާކަމެއް ކުރަމުންދާތަން"
އެސްޓީއޯގެ ކުރީގެ އެމްޑީ އަމްރު
އަމްރު ވިދާޅުވީ އެމްޑީޕީ މިހާރު ހިންގަމުންދާ ގޮތަށް ބަލާއިރު، އެ ޕާޓީ ވަނީ ސިޔާސީ ޕާޓީއެއްގެ ސިފަ ގެއްލިފައި ކަމަށެވެ. ހަޤީގަތުގައި މިހާރު އެމްޑީޕީއަކީ ސިޔާސީ ޕާޓީއެއްކަމަށް ނުދެންނެވޭނެކަމަށް އަމްރު ވިދާޅުވި އެވެ.
"މިއަދު އެމްޑީޕީއަކީ ސިޔާސީ ޕާޓީއެއްގެ ސިފަ ގެއްލި މުޅިން އެހެން ކަހަލަ މަސައްކަތްތަކެއް ކުރާ ބައެއްގެ ސިފަ ޖެހިފައި ވަނީ. އެހެންވީމަ މިއަދު އަޅުގަނޑަކަށް ހަމަގައިމުވެސް ނެތް ބުނެވޭކަށް އެމްޑީޕީ އަކީ ސިޔާސީ ޕާޓީއެކޭ"
އެސްޓީއޯގެ ކުރީގެ އެމްޑީ އަމްރު
ޒަމާނުއްސުރެ އެމްޑީޕީ ދަމަހައްޓަމުން އައި އަސާސްތައް ދޫކޮށް ޕާޓީގެ ރައީސް މުޙައްމަދު ނަޝީދާއި، އޭނާއަށް ވަފާތެރި މެމްބަރުން އެކަހެރިކޮށް، އެ މެމްބަރުންނަށް ބިރުދައްކާ އިންޒާރުތައް ދެމުންދާކަމަށް ބުނެ ރައީސް ނަޝީދަށް ތާއީދުކުރައްވާ ގިނަ މެމްބަރުން ވަނީ މިއަދު ޕާޓީން ވަކިވެ، އާ ޕާޓީއެއް އުފައްދާނެކަން އިއުލާނު ކޮށްފަ އެވެ.
އަދި އެ ޕާޓީން ކުރިއަށް އޮތް ރިޔާސީ އިންތިޚާބުގައި ވެސް ވާދަކުރާނެކަން ވަނީ އިއުލާނުކޮށްފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
