"ހަމައެކަނި ރާއްޖެއަށް" ކަމަށް ބޭހުގައި ލޭބަލް ކޮށްފައި ހުރުމަކުން އެއްވެސް ގެއްލުމެއް ނެތް: މިނިސްޓްރީ

ރާއްޖެ އެތެރެކުރާ ޑޮކްޓަރީ ބޭހުގައި "އެކްސްޕޯޓް އޮންލީ ޓު މޯލްޑިވްސް" ނުވަތަ "ހަމައެކަނި ރާއްޖެއަށް ބޭރުކުރާ" މިފަދައިން ލޭބަލް ކޮށްފައި ހުރި ނަމަވެސް، އެ ބޭހަކުން އެއްވެސް ގެއްލުމެއް ނުވާނެ ކަމަށް ހެލްތު މިނިސްޓްރީން ބުނެފިއެވެ.

އިންޑިއާ އިން ރާއްޖެ އެތެރެކުރާ ބައެއް ބޭސްތަކުގައި "ހަމައެކަނި ރާއްޖެއަށް" ކަމަށް ލޭބަލް ކޮށްފައި ހުންނާތީ އެކަމާއި ގުޅިގެން މީސްމީޑިއާގައި މީހަކު ވަނީ ކަންބޮޑުވުން ފާޅުކޮށްފަ އެވެ. އަދި ބޭހެއްގައި އެފަދައިން ލޭބަލްކޮށް، އެ ބޭސް ހަމައެކަނި ރާއްޖެއަށް ފޯރުކޮށްދޭއިރު، އިންޑިއާއިން އުފައްދާ ބައެއް ބޭހުގެ ބެޗްތައް، ބޭނުން ކުރަން ރަނގަޅު ނޫން ކަމަށް އެ ބޭސްތައް ޓެސްޓު ކުރުމަށްފަހު ނިންމާފައިވާ ކަމަށް ވެސް އެމީހާ ބުނެފައިވެއެވެ.

އަދި އޭނާ ހިއްސާ ކުރި ފޮޓޯގައިވާ ބޭހުގެ ބެޗެއްވެސް އެ ލިސްޓުގައި ހިމެނޭ ކަމަށް އޭނާ ބުނެފައިވެއެވެ. ނަމަވެސް ރާއްޖެ އެތެރެ ކޮށްފައިވަނީ އެ ނުބައި ބެޗު ނޫންކަންވެސް އޭނާ ފާހަގަކުރިއެވެ.

މިކަމާއި ގުޅިގެން "ވޮއިސް" އިން ކުރި ސުވާލަކަށް ޖަވާބު ދެއްވަމުން ހެލްތު މިނިސްޓްރީގެ މީޑިއާ އޮފިޝަލް ވިދާޅުވީ، އެފަދައިން ލޭބަލް ކޮށްފައި ހުރުމަކީ އެއްވެސް މައްސަލައެއް ނޫން ކަމަށެވެ. އަދި އެފަދައިން ލޭބަލް ކޮށްފައި ހުރި ނަމަވެސް، ނުވަތަ ނުކޮށް ހުރި ނަމަވެސް، މޯލްޑިވްސް ފުޑް އެންޑް ޑްރަގް އޮތޯރިޓީގައި ރެޖިސްޓާރ ކޮށްފައިވާ ބޭހެއް ނަމަ އެ ބޭސް ރާއްޖެ އެތެރެ ކުރެވޭނެ ކަމަށާ، ރެޖިސްޓާރ ނުކޮށް ހުރި ބޭހެއް ނަމަ ރާއްޖެ އެތެރެ ނުކުރެވޭނެ ކަމަށް މީޑިއާ އޮފިޝަލް ވިދާޅުވި އެވެ.

މިއާއެކު މީޑިއާ އޮފިޝަލް ވިދާޅުވީ, ބޭސް ރެޖިސްޓާރ ކުރާއިރު، އެ ބޭސް އުފެއްދުމުގައި ބޭނުން ކުރާ ތަކެތީގެ ކޮލިޓީ އާއި ރައްކާތެރިކަންވެސް ބަލާ ކަމަށާ، އެހެންކަމުން، ރެޖިސްޓާރ ކޮށްފައިވާ ބޭހެއް ނަމަ ލޭބަލްއެއް ހުރުމަކުން އެއީ މައްސަލަ އެއް ނޫން ކަމަށެވެ.