ފައްތާހު ޕީޕީއެމަށް ސޮއި ކޮށްފި

ދިވެހި ފިލްމުތައް ޑައިރެކްޓް ކުރުމާއި އުފެއްދުމުގެ މަސައްކަތްތައް ކޮށްފައިވާ އަބްދުލް ފައްތާހު ޕީޕީއެމަށް ސޮއި ކޮށްފިއެވެ.

ފައްތާހު ޕީޕީއެމަށް ސޮއި ކުރި ފޯމު އިދިކޮޅު ޕީޕީއެމް/ޕީއެންސީ ކޯލިޝަނު ހިންގެވުމާއި ހަވާލުވެ ވަޑައިގެން ހުންނެވި ޕީއެންސީގެ ރައީސް އަބްދުއްރަހީމް އަބްދުالله އާއި ހަވާލު ކުރީ ރޭ އޮތް ޕީޕީއެމްގެ ރެލީގެ ތެރެއިންނެވެ.

ޕީޕީއެމާއި ގުޅުމަށްފަހު، އެކަމާއި ގުޅޭ ގޮތުން ވާހަކަ ދައްކަމުން ފައްތާހު ބުނީ، އޭނާ ޕީޕީއެމާއި ގުޅުނު އެންމެ ބޮޑު ސަބަބަކީ، އޭނާގެ ހިތުގައި ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް އަށް އިހުތިރާމާއި ލޯބި ކަމަށެވެ.

އަދި އޭނާ ބޭނުންވަނީ ކުރިއަށް އޮތް ރިޔާސީ އިންތިހާބު ރައީސް ޔާމީން ކާމިޔާބުކޮށް، ދެން އޮތް 5 އަހަރުގެ ދައުރަށް ރައީސުލްޖުމްހޫރިއްޔާ ކަމުގެ ހުވާ އެމަނިކުފާނު ކުރުން ކަމަށްވެސް ބުނެފައިވެއެވެ.

ޕީޕީއެމުން ރިޔާސީ ކެންޕެއިން ފަށައި، ޕާޓީއަށް މެންބަރުން އިތުރު ކުރުމުގެ މަސައްކަތް ވެސް ފަށާފައިވާއިރު، އެ ޕާޓީގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ހުންނެވީ ވ. އާރަށު މައްސަލާގައި އެމަނިކުފާނުގެ މައްޗަށް އުފުލާފައިވާ ދައުވާތައް ސާބިތުވާ ކަމަށް ކަނޑައަޅައި ކްރިމިނަލް ކޯޓުން ކުރި 11 އަހަރުގެ ޖަލު ހުކުމާއި ގުޅިގެން ޖަލުގައެވެ.

މިވަގުތު އެމަނިކުފާނުގެ މައްޗަށް ކޮށްފައިވާ ޖަލު ހުކުމެއް ތަންފީޒުކުރައްވަމުން ގެންދެވި ނަމަވެސް، ހައިކޯޓު މަރުހަލާއިން ރައީސް ޔާމީން މިނިވަންވެވަޑައިގަންނަވާނެ ކަމުގެ ފުރިހަމަ ޔަގީންކަން އޮތްކަމަށް ޕީޕީއެމުން ބުނެއެވެ.