އެމްޑީޕީއަށް 2013 ގެއްލުނީ ރައީސް ނަޝީދު ނެރުނީމަ: މައުރޫފު

2013 ވަނަ އަހަރުގެ ސިޔާސީ އިންތިޚާބު އެމްޑީޕީއަށް ގެއްލުނީ އެ ޕާޓީން އެ އަހަރު ރިޔާސީ ކެންޑިޑޭޓެއްގެ ގޮތުގައި ރައީސް މުޙައްމަދު ނަޝީދު ނެރުމުންކަމަށް އެމްޑީއޭގެ ނައިބު ރައީސް އަލީ މައުރޫފު ވިދާޅުވެއްޖެ އެވެ.

މައުރޫފު މިފަދައިން ވިދާޅުވެފައި ވަނީ މ ދިއްގަރުގައި ބޭއްވި ރައީސް ޞާލިހުގެ ކެމްޕޭނު ޖަލްސާއެއްގައި ވާހަކަދައްކަވަމުން ނެވެ.

މައުރޫފު ވިދާޅުވީ އެމްޑީއޭ އުފައްދައިގެން އެންމެ ފުރަތަމަ އެ ޕާޓީން ކުރިމަތިލި އިންތިޚާބަކީ 2013 ވަނަ އަހަރު އޮތް ރިޔާސީ އިންތިޚާބު ކަމަށެވެ.

އެމްޑީޕީއަކީ އެމްޑީއޭ ގަބޫލުކުރާ ސިޔާސަތުތަކެއް ގެންގުޅޭ ޕާޓީއަކަށް ވީ ނަމަވެސް އެ އިންތިޚާބުގައި އެމްޑީއޭއިން އެމްޑީޕީގެ ފަހަތަށް ނޭރީ ޕާޓީން ނެރެފައި ހުރި ރިޔާސީ ކެންޑިޑޭޓުގެ ސަބަބުންކަމަށް މައުރޫފު ވިދާޅުވި އެވެ.

އެ އަހަރުގެ ރިޔާސީ އިންތިޚާބުގައި އެމްޑީޕީގެ ކެންޑިޑޭޓުގެ ގޮތުގައި ހުންނެވީ ރައީސް މުޙައްމަދު ނަޝީދެވެ. މައުރޫފުގެ ވާހަކައިގައި ވަނީ އެ އިންތިޚާބުގައި އެމްޑީއޭއިން ނަޝީދަށް ތާއީދު ނުކުރަން ނިންމި ސަބަބުތަކަށް ވެސް އަލިއަޅުވާލައްވާފަ އެވެ.

އެގޮތުން މައުރޫފު ވިދާޅުވީ ނަޝީދަކީ އިސްމާމްދީނަށް ކުޑައިމީސްވާ ގޮތަށް އެތައް ވާހަކައެއް ދައްކަވަމުން ގެންދެވި ބޭފުޅެއްކަމަށެވެ. އަދި ނަޝީދު ދައްކަމުންދިޔަ އިސްލާމްދީނާއި ނުކަސިޔާރު ވާހަކަތަކުގެ ސަބަބުން ރައްޔިތުންގެ ހިތްތަކުގައި ވެސް ބޮޑު ނުތަނަވަސްކަމެއް އުފެދިގައިވާކަން އޭނާ ފާހަގަކުރެއްވި އެވެ.

"އަޅުގަނޑުމެންނަކީ ސައްތައިން ސައްތަ މުސްލިމު ޤައުމެއް. އެމްޑީޕީއަކީ ހަރުދަނާ އުސޫލުތަކެއްގެ މަތީގައި ދެމިއޮތް ޕާޓީއެއް. އެހެން ނަމަވެސް އެވަގުތު (2013ގައި) ކެންޑިޑޭޓަކަށް ހުންނެވި ބޭފުޅާގެ އިސްލާމްދީނާއި ނުކަސިޔާރު ވާހަކަތަކެއް ދެއްކުމުގެ ސަބަބުން އަދި އިސްލާމީ އަގީދާއާއި ފުށުއަރާ އެތައް ވާހަކަތަކެއް ދެއްކުމުގެ ސަބަބުން ރައްޔިތުން އެމަނިކުފާނާއި ދޭތެރޭގައި ހިތެއް ރަނގަޅެއް ނޫން. ރައީސް ނަޝީދުގެ ވާހަކަ މި ދައްކަނީ"

އެމްޑީއޭގެ ނައިބުރައީސް މައުރޫފު

މައުރޫފު އިތުރަށް ވިދާޅުވީ އެމްޑީއޭއިން 2013 ގެ ރިޔާސީ އިންތިޚާބުގައި ނަޝީދުގެ ފަހަތަށް ނޭރި ދެވަނަ ސަބަބަކީ އޭނާ އަކީ ވެރިކަން ކުރައްވަން ލިބިވަޑައިގަތީމަ، އަމިއްލަފުޅަށް އިސްތިއުފާދެއްވި ބޭފުޅަކަށް ވާތީ ކަމަށެވެ. އަދި އެފަދަ ބޭފުޅަކަށް އަލުން އަނބުރާ ވެރިކަން ދޭން ރައްޔިތުން ބޭނުންނުވާތީ ކަމަށެވެ.

އެމްޑީޕީއަކީ ސިޔާސީ ކަންކަމުގައި އަބަދުވެސް ކުރީގައި އުޅޭ ޕާޓީއެއް ނަމަވެސް 2013 ގެ ރިޔާސީ އިންތިޚާބު އެ ޕާޓީއަށް ގެއްލުނީ ނަޝީދު ރިޔާސީ ކެންޑިޑޭޓެއްގެ ގޮތުގައި ނެރުމުންކަމަށް މައުރޫފު ވިދާޅުވި އެވެ. އަދި ނަޝީދާއެކު ކޯލިޝަން ހަދަން އެއްވެސް ސިޔާސީ ލީޑަރެއް ބޭނުންފުޅު ނުވިކަން އޭނާ ފާހަގަކުރެއްވި އެވެ.

"އަޅުގަނޑު ދަންނަވާލަން އޮތީ އެމްޑީޕީއަށް 2013 ގެއްލިގެން ދިޔަ އެންމެ ބޮޑު ސަބަބަކީ ރައީސް ނަޝިދު ކެންޑިޑޭޓެއްގެ ގޮތުގައި ނިކުތީމައޭ، އެހެންވެގެންނޭ އެމަނިކުފާނާއި އެކީގައި ކޯލިޝަނަކަށް ދާނެ އެއްވެސް ޕާޓީއެއް ނުވީ"

އެމްޑީއޭގެ ނައިބު ރައީސް މައުރޫފު

މައުރޫފު މީގެކުރިން ވެސް ފާހަގަކުރި ގޮތަށް ދިއްގަރު ޖަލްސާގައި ވެސް ވިދާޅުވީ އެމްޑީއޭ 2018 އިން ފެށިގެން އޮތީ ރައީސް ޞާލިހާއެކު އެކުގައި ކަމަށެވެ. އަދި އެމަނިކުފާނަށް ވެރިކަމުގެ ދދެވަނަ ދައުރެއް ހޯއްދަވާ ދެއްވުމަށް މިހާރުވެސް އެމްޑީއޭ އޮތީ ރައީސް ޞާލިހާއެކު "ގަދަކޮށް" ކަމަށެވެ.

މިހާރު މިއޮތް ކޯލިޝަނާއެކު ރައީސް ޞާލިހު ފަސޭހަކަމާއެކު ރިޔާސީ އިންތިޚާބު ނަގާތަން ފެނިވަޑައިގަންނަވާކަމަށް މައުރޫފު ވިދާޅުވި އެވެ.