ރައީސް ޔާމިނަށް އިންސާފު ލިބުން ލަސްވުމުގެ ޒިންމާ ރައީސް ޞާލިހު އުފުލަން ޖެހޭނެ: ޣައްސާނު

މިވަގުތު ޖަލުހުކުމެއް ތަންފީޒުކުރައްވަން ޖެހިވަޑައިގެންފައިވާ ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމަށް އިންސާފު ލިބުން ލަސްވެގެންދާ ދިއުމުގެ ޒިންމާ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އުފުއްލަވަން ޖެހިވަޑައިގަންނަވާނެ ކަމަށް ޕީޕީއެމްގެ ނައިބު ރައީސް އަދި މަޖިލީހުގެ ގުރައިދޫ ދާއިރާގެ މެމްބަރު މުޙައްމަދު ޣައްސާނު މައުމޫނު ވިދާޅުވެއްޖެ އެވެ.

ޣައްސާނު މިފަދައިން ވިދާޅުވެފައި ވަނީ ވ އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ ރައީސް ޔާމިނުގެ މައްޗަށް ކޮށްފައިވާ 11 އަހަރުގެ ޖަލުހުކުން، އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފު ކޮށްފައިވާއިރު، އެ މައްސަލަ ދިގުލައިގެން ދާތީ އިދިކޮޅު ލީޑަރުން ކަންބޮޑުވުން ފާޅުކުރަމުންދާ ދަނޑިވަޅެއްގައި ކުރެއްވި ޓްވީޓެއްގަ އެވެ.

ޣައްސާނު ވިދާޅުވީ ރައީސުލްޖުމްހޫރިއްޔާގެ މަޤާމުގައި ހުންނަވާ ބޭފުޅަކީ ދައުލަތުގެ އެންމެ އިސް ވެރިޔާ ކަމަށެވެ. އަދި ދައުލަތުގެ އެއްވެސް ބާރެއްގެ ހިންގުން ހީނަރުވެއްޖެނަމަ އެކަން ބައްލަވާ އެ މުއައްސަސާއެއްގެ މަސައްކަތް އަވަސްކުރުވުމަކީ ރައީސުލްޖުމްހޫރިއްޔާގެ މަސްއޫލިއްޔަތެއް ކަމަށެވެ.

ރައީސް ޔާމިނުގެ ފަރާތްޕުޅުން އާރަށު މައްސަލައިގައި އެމަނިކުފާނުގެ މައްޗަށް ކޮށްފައިވާ ހުކުމް މި ދިޔަ އޭޕްރިލް މަހު އިސްތިއުނާފުކޮށްފައި ވީ ނަމަވެސް މިހާތަނަށް އެ މައްސަލަ ނިންމާފައެއް ނުވެއެވެ. އިސްތިއުނާފު މައްސަލައަކީ ވަރަށް އަވަސް މުއްދަތެއްގެ ތެރޭގައި ނިންމަން ޖެހޭ މައްސަލަތަކަކަށް ވީ ނަމަވެސް ރައީސް ޔާމިނުގެ މައްސަލަ ދިގުލައިގެންދާތީ އިދިކޮޅުން ގެންދަނީ ބޮޑެތި ކަންބޮޑުވުންތަކެއް ފާޅުކުރަމުން ނެވެ.

އެކަމާއި ގުޅޭގޮތުން ޣައްސާނު ރައީސް ޔާމިނަށް އިންސާފު ނުލިބި ލަސްވެގެންދާ ދިއުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ފުރިހަމަޔަށް ޒިންމާ ނަންގަވަން ޖެހިވަޑައިގަންނަވާނެ ކަމަށެވެ.

"ދިވެހި ދައުލަތުގެ އެންމެ އިސް ފަރާތަކީ ރައީސުލްޖުމްހޫރިއްޔާ. ދައުލަތުގެ އެއްވެސް ބާރެއްގެ ހިންގުން ހީނަރުވިޔަސް އަވަސްކުރަން ޤާނޫނު ތަކުގެ ތެރެއިން ރައީސުލްޖުމްހޫރިއްޔާ އެންގުމަކީ މަޤާމުގެ މަސްއޫލިއްޔަތެއް. ރައީސް ޔާމިނަށް އިންސާފު ލިބުން ލަސްވުމުގެ ޒިންމާ ރައީސް ޞާލިހު އުފުލަން ޖެހޭނެ"

ޕީޕީއެމްެގ ނައިބު ރައީސް ޣައްސާނު މައުމޫނު

ރައީސް ޔާމިނުގެ އިސްތިއުނާފު ލަސްވަމުންދާތީ އިދިކޮޅުން ގެންދަނީ ކަމާގުޅުންހުރި މުއައްސަސާތަކަށް ވަޑައިގެން އިސްވެރިންނާއި ބައްދަލުކުރެއްވުމަށް މަސައްކަތް ކުރައްވަމުން ނެވެ.

އެގޮތުން މި ހަފްތާތެރޭގައި އެބޭފުޅުންވަނީ ޕްރޮސެކިއުޓާ ޖެނެރަލްގެ އޮފީހުގެ މުއައްސިސުންނާއި، ޖުޑިޝަލް ސާވިސް ކޮމިޝަންގެ މެމްބަރުންނާއި ބައްދަލުކުރުމަށް މަސައްކަތްކޮށްފައެވެ.

އެހެން ނަމަވެސް އެއިން އެއްވެސް އިދާރާއެއްގެ ބޭފުޅަކާއި އިދިކޮޅު ލީޑަރުންނާއި ބައްދަލުކުރެވޭގޮތް ވެފައި ނުވާއިރު، މި ހައްސާސް ދަނޑިވަޅުގައި އޮފީސް ހުސްކުރައްވާ މިނިވަން މުއައްސަސާތަކުގެ ވެރިން އުޅުއްވަނީ ރައީސް ޞާލިހުގެ ރިޔާސީ ކެމްޕޭނުގައިކަމަށް އިދިކޮޅުން ވަނީ ބުނެފައެވެ. އަދި އެއީ އިދިކޮޅުގެ އޮތް ބޮޑު ކަންބޮޑުވުމެއްގެ ގޮތުގައި އެބޭފުޅުން ފާހަގަކުރައްވަ އެވެ.