ޖާހް ކޮންސްޓްރަކްޝަންގެ ފްލެޓްތަކުގެ މަސައްކަތް ކުރުމަށް އަރބަންކޯއިން ހަވާލުވެއްޖެ

ހުޅުމާލޭގައި ޖާހް ކޮންސްޓްރަކްޝަންގެ ފަރާތުން ތަރައްޤީ ކުރަމުންދާ ހައުސިންގ ޔުނިޓްތަކުގެ މަސައްކަތް ނިންމުމަށް އަރބަންކޯއިން ހަވާލުވެއްޖެއެވެ.

މިކަމާއި ގުޅިގެން އަރބަންކޯއިން ނެރެފައިވާ ނޫސް ބަޔާނުގައި ބުނެފައިވަނީ މި ޔުނިޓްތައް ނުނިމި ގިނަ ދުވަސްތަކެއް ވެފައިވާއިރު، މިކަމުގެ ސަބަބުން ފުލެޓްތައް ގަނެފައިވާ ފަރާތްތަކަށްވާ ގެއްލުންތައް ކުޑަކޮށް، ވީހާވެސް އަވަހަކަށް މަސައްކަތް ނިންމުމަށް އަރބަންކޯއިން އެ މަސައްކަތް ކުރުމަށް މިހާރު ވަނީ ނިންމާފައި ކަމަށެވެ.

އެގޮތުން، މި ޕްރޮޖެކްޓަކީ 91 އިންސައްތަ މަސައްކަތް ނިމިފައިވާ ޕްރޮޖެކްޓެއްކަމުން، ޑިވެލޮޕަރު ބަދަލުކޮށް އައު ޑިވެލޮޕަރެއް ހޯދައި، މިހާރު ހުރި މަސައްކަތްތައް ކުރުމަކީ އެންމެ އެކަށީގެންވާ ގޮތް ނޫން ކަމަށް އަރބަންކޯއިން ވަނީ ފާހަގަކޮށްފައެވެ.

އެހެންކަމުން އަރބަންކޯއިން އެ ކުންފުންޏާއި ފުލެޓްތައް ގަނެފައިވާ ފަރާތްތަކާއި އެކު ވެވޭ އެއްބަސްވުމެއްގެ ދަށުން މަސައްކްތައް ކުރިއަށް ގެންގޮސް ވީހާވެސް އަވަހަކަށް ނިންމުމަށް ހަމަޖެހިފައިވާ ކަމަށް އަރބަންކޯއިން ވަނީ ބުނެފައެވެ.

މިއާއިއެކު އަރބަންކޯގެ އަމާޒަކީ މި މަސައްކަތުގައި މިހާރު ވެވިފައިވާ އެއްބަސްވުންތަކާއި ޑިވެލޮޕަރުގެ ފަރާތުން ފުލެޓްތައް ގަނެފައިވާ ފަރާތްތަކާއި ދެމެދު ވެފައިވާ މުޢާމަލާތްތައް ބަލާ ދެ ފަރާތައްވެސް ގެއްލުން ނުވާނެހެން ވީހާވެސް އަވަސް މުއްދަތެއްގެ ތެރޭގައި މަސައްކަތްތައް ނިންމާލުންކަމަށް އެ ކޯޕަރޭޝަންއިން ވަނީ ފާހަގަކޮށްފައެވެ.

ޖާހު އިންވެސްޓްމަންޓުން އިމާރާތް ކުރަމުންދާ ހައުސިންގ މަޝްރޫޢު ނިންމުމަށް އެކުންފުންޏަށް 30 ދުވަހުގެ ނޯޓިސް އެއް މިދިޔަ މަހު ފެށުން ކޮޅު ވަނީ ދީފައެވެ.

އެގޮތުން 2017 ވަނަ އަހަރު މި ފްލެޓްތައް ހެދުމަށް ޖާހު އިންވެސްޓްމަންޓާއި ހަވާލު ކުރެވިފައިވާ މަޝްރޫޢު ނުނިމި ގިނަ ދުވަސްތަކެއް ވުމުގެ ސަބަބުން މައްސަލަ އިތުރަށް ބެލުމަށް ފަހު ޖާހު އިންވެސްޓްމަންޓަށް މަސައްކަތް ނިންމުމަށާއި، އަރބަންކޯއަށް ދައްކަން ޖެހޭ ބިމުގެ އަގު ދެއްކުމަށް 30 ދުވަހުގެ މުއްދަތެއްދީ ނޯޓިސް ދީފައެވެ.

މިހާާރު މި މަޝްރޫއާއި އަރބަންކޯއިން ހަވާލުވެފައިވަނީ 30 ދުވަހުގެ މުއްދަތު ހަމަވެފައިވުމުގެ ސަބަބުންނެވެ.

މި އަަހަރުގެ ޖެނުއަރީ މަހުގެ ތެރޭގައި ޖާހު ކުންފުނީގެ 49 ބިދޭސީ މަސައްކަތް ތެރިއަކު މުސާރަ ނުދޭ މައްސަލައެއްގައި މަސައްކަތް ހުއްޓާލައި ހަޅުތާލުވެސް ކޮށްފައިވެއެވެ.