އިހަވަންދޫ އަލިފާނުގެ ހާދިސާގައި ހާލުގައި ޖެހުނު އާއިލާއަށް "އެހީ" ޖަމުއިއްޔާއިން އެހީވަނީ!

ސެޕްޓެމްބަރު މަހު ކުރީކޮޅު ހއ. އިހަވަންދޫގައި ހިނގި އަލިފާނުގެ ހާދިސާއެއްގައި ހާލުގައި ޖެހުނު އާއިލާއަކަށް އެހީ ޖަމުއިއްޔާއިން އެހީތެރިކަން ފޯރުކޮށްދީފިއެވެ.

އެ ހާދިސާގައި ގެއެއް ވަނީ އަނދާފައެވެ.

އެހީ ޖަމުއިއްޔާގެ ނައިބުރައީސް ހަސަން ހަބީބު ވޮއިސްއަށް މައުލޫމާތު ދެއްވި ގޮތުގައި، އެ ޖަމުއިއްޔާއިން ވަނީ ހާދިސާ ހިނގުމާއި ގުޅިގެން އާއިލާއަށް ލިބުނު ގެއްލުމާއި އެކު، އަސާސީ ވަސީލަތްތައް ފޯރުކޮށްދީފައެވެ.

އަނދައިގެން ދިޔަ ގެއަކީ 3 ކޮޓަރީގެ އެޕާޓުމަންޓެއްގޮތަށް ހަދާފައި ހުރި ގެއެއްކަމަށާއި، އަލިފާނުގެ ހާދިސާއާއި ގުޅިގެން އޭގެ ތެރެއިން 2 ކޮޓަރި އެއްވެސް ވަރަކަށް ބޭނުން ނުކުރެވޭ މިންވަރަށް ހަލާކުވެފައިވާކަމަށް ހަބީބު ވިދާޅުވިއެވެ.

އަދި އެ ގެއަކީ ވަޑާންކޮށްގެން އާމްދަނީ ހޯދަމުން ދިޔަ ބަޔަކު ދިރުއުޅެމުން ދިޔަ ގެއެއްކަމަށާއި، އަލިފާނުގެ ހާދިސާގައި، ވަޑާންކުރުމަށް ގެންގުޅުނު ހުރިހާ އާލާތްތަކެއް އެއްކޮށް ހަލާކުވެފައިވާކަންވެސް ހަބީބު ފާހަގަކުރެއްވިއެވެ.

އެހީ ޖަމުއިއްޔާއިން ބުނީ އާއިލާ މިހާރު ދިރިއުޅެމުން ދަނީ އެމީހުންގެ ތިމާގެ މީހެއްގެ ގެއެއްގައި ކަމަށެވެ. އަދި އެ ޖަމުއިއްޔާއިން މިހާރު މަސައްކަތް ކުރަމުންދަނީ އާއިލާއަށް އަނބުރާ ދިރިއުޅުން ފެށޭނެ މިންވަރަށް ގެ މަރާމާތުކޮށްދިނުމުގެ މަސައްކަތްކަމަށް އެހީ އިން ވަނީ ބުނެފައެވެ.

އެހީ ޖަމުއިއްޔާއިން އެ މަސައްކަތް ކުރަމުންދަނީ ރަށު ކައުންސިލާއި ގުޅިގެންނެވެ.

އާއިލާއަށް އެހީތެރިކަން ފޯރުކޮށްދިނުމަށް ފަންޑު ރެއިޒިން އިވެންޓެއް ބޭއްވުމަށް ޖަމުއިއްޔާއިން ގެންދަނީ ތައްޔާރުވަމުންނެވެ.

އެހީ ޖަމުއިއްޔާއިން ބުނީ ޖަމުއިއްޔާއިން އިސްނަގައިގެން ކުރި ނަމަވެސް، އެ ކަމަށް އާންމުންގެ އެއްބާރުލުމާއި އެހީތެރިކަން ބޭނުންވާނެކަމަށެވެ. އަދި ވީ ވަރަކުން އެ އާއިލާއަށް އެހީތެރިކަން ފޯރުކޮށްދިނުމަށް އެ ޖަމުއިއްޔާއިން ވަނީ އެދިފައެވެ.

ފަންޑު ރެއިޒިން އިވެންޓު ފަށާނެ ސީދާ ތާރީހެއް އަދި އެ ޖަމުއިއްޔާއިން ހާމަކޮށްފައެއް ނުވެއެވެ. އެހެން ނަމަވެސް މި ހަފްތާގެ ތެރޭގައި އެ ހަރަކާތް ފެށުމަށް އެހީ ޖަމުއިއްޔާއިން ގެންދަނީ މަސައްކަތްކުރަމުންނެވެ.

BML ISLAMIC

7770000014819

EHEE JAMIYYA