ލޭންޑް ޔޫސް ޕްލޭން ފާސްކުރުމުގެ ފުރިހަމަ ބާރު ރައްޔިތުންނަށް ދޭނަން: ރައީސް ޔާމީން
ރަށްރަށުގެ ލޭންޑް ޔޫސް ޕްލޭން ފާސްކުރުމުގެ ފުރިހަމަ ބާރު ރަށްތަކުގެ ކައުންސިލްތަކާއި ރައްޔިތުންނަށް ދެއްވާނެކަމަށް ވާދަވެރި ސިޔާސީ ލީޑަރު އަދި ޕީޕީއެމް ރައީސް ޔާމީން އަބްދުލްގައްޔޫމު ވައުދުވެވަޑައިގެންފިއެވެ.
އެމަނިކުފާނު މިފަދައިން ވިދާޅުވެފައިވަނީ މިހާރު އެމަނިކުފާނު ބޮޑުތިލަދުންމައްޗަށް ކުރައްވާ ދަތުރުފުޅުގައި ހއ ކެލާގައި ބޭއްވި ޚާއްސަ ޖަލްސާއެއްގައި ވާހަކަދައްކަވަމުންނެވެ.
އެމަނިކުފާނު ވިދާޅުވީ މިހާރު ލޯކަލް ކައުންސިލްތައް ހިނގަމުންދާ ގޮތަށް ބަލާއިރު، އެއްވެސް ރަށަކަށް އެރަށެއްގައި އިގްތިސާދީ ކަންކަން ހިންގުމުގެ ބާރުވެރިކަން ލިބޭނެކަމަށް ގަބޫލު ނުކުރައްވާކަމަށެވެ.
"މިހާރު މި އޮތް ގޮތަށް އޮވެގެން އެއްވެސް ރަށަކުން ރަށުގެ ރައްޔިތުން ބޭނުންވެގެން އަދި އިގްތިސާދީ މަންފާއެއް ހޯދުމަށް ސިނާއީ މަސައްކަތް ކުރުމަށް ބިން ދެވޭނެ ގޮތެއް ނޯވޭ ރަށުގެ ލޭންޑް ޔޫސް ޕްލޭން ހެދިފަ ނެތީމާ"
ރައީސް ޔާމީން
ރަށްރަށުގެ ތަރައްގީއަށް ކުރެވޭ މަސައްކަތް ކުރުމަށް ކައުންސިލްތަކަށް ދިމާވެފައިވާ އެންމެ ބޮޑު ގޮންޖެހުމަކީ ލޭންޑް ޔޫސް ޕްލޭން ހަދައި އެ ޕްލޭން މައިސަރުކާރުން ފާސްކުރާ ގޮތަށް އޮންނަ އުސޫލުކަމަށް ރައީސް ޔާމިން ފާހަގަކުރެއްވިއެވެ.
ރަށްތަކުން ލޭންޑް ޔޫސް ޕްލޭން ހަދުމަށްފަހު މައު ސަރުކާރަށް ފޮނުވުމުން، އެ ފާސްނުކޮށް އެތައް ދުވަހެއް ހޭދަވެގެންދާކަމަށާއި، އެކަމުގެ ސަބަބުން ކައުންސިލްތަކުން ބޭނުންވާ މުހިންމު އިގްތިސާދީ މަސައްކަތް ނުކުރެވި ދިގުލައިގެންދާކަމަށް ރައީސް ޔާމީން ވިދާޅުވިއެވެ.
އެކަން ފާހަގަކުރައްވާ އެމަނިކުފާނު ވިދާޅުވީ، ޕީޕީއެމްއަށް ދެވަނަ ދައުރެއް ލިބިއްޖެކަމަށް ވާނަމަ މައި ސަރުކާރުން ލޭންޑްޔޫސް ޕްލޭން ފާސްކުރަން އޮންނަ އުސޫލު ނައްތާލާ، ރައްޔިތުންނަށް އެ ބާރު ފުރިހަމައަށް ދެއްވާނެކަމަށެވެ.
"އަޅުގަނޑުމެންގެ ސަރުކާރެއްގައި ކައުންސިލްތަކަށް ނޫނީ ރަށްރަށުގެ ރައްޔިތުން ބާރުވެރިކުރުމަށް ލޭންޑް ޔޫސް ޕްލޭނަކީ އެއްގޮތަކަށްވެސް ސަރުކާރުން، މައި ސަރުކާރުން ފާސްކުރާ އެއްޗެއްގެ ގޮތުގައި މިހާރު އޮންނަ އޮތުން ނައްތާލާނަން"
ރައީސް ޔާމީން
ރައީސް ޔާމީން އިތުރަށް ވިދާޅުވީ އެ ރަށެއްގެ ބިން ބޭނުންކުރަންވާ ގޮތް ނިންމުމުގެ ފުރިހަމަ ބާރު އެ ރަށެއްގެ ރައްޔިތުންނަށް ލިބެންޖެހޭކަމަށެވެ.
ރަށަށް ބޭނުންވާ އުމްރާނީ ކަންކަމާއި އެ ބޭނުންވާ މިންވަރާއި، އެ ރަށަށް ބޭނުންވާ ތަރައްގީގެ ކަންކަން ނިންމުމުގެ ފުރިހަމަ ބާރާއި އިޚްތިޔާރު ރައްޔިތުންނަށް ލިބެންވާނެކަމަށާއި، ޕީޕީއެމްގެ ވެރިކަމެއްގައި ރަށްރަށުގެ ބިން ބޭނުންކުރަންވީ ގޮތުގެ ފުރިހަމަ ބާރުވެރިކަން ރައްޔިތުންނަށް ދެއްވާނެކަމަށް ރައީސް ޔާމީން ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
