2023 އަންނަ އިރު އިބްރާހިމް މުހައްމަދު ސޯލިހު ދަންނަ ސިޔާސީ ލީޑަރަކު ނުހުންނާނެ: އަބްދުއްރަހީމް
2023 ވަނަ އަަހަރުގެ ރިޔާސީ އިންތިޚާބު ބޯމަތިވާއިރު އިބުރާހިމް މުހައްމަދު ސޯލިހު ދަންނަ ސިޔާސީ ލީޑަރެއް ނުހުންނާނެކަމަށް އިދިކޮޅު އިއްތިހާދުގައި ހިމެނޭ ޕީއެންސީގެ ރައީސް އަބްދުއްރަހީމް (އަދުރޭ) ވިދާޅުވެއްޖެއެވެ.
އަބްދުއްރަހީމް މިފަދައިން ވިދާޅުވެފައިވަނީ ކެލާގައި އޮތް ޖަލްސާއެއްގައި ވާހަކަދައްކަވަމުންނެވެ.
އަބްދުއްރަހީމް ވިދާޅުވީ ގައުމު މިހާރު މި އޮތް ހާލަތަކީ ބަޔަކު ގަސްދުގައި ރާވައިގެން ވައްޓާލި ހާލަތެއްކަމަށެވެ. އަދި މި ކަމުގައި ކޯލިޝަންގެ ލީޑަރުން ފުރިހަމައަށް ޝާމިލްވާކަމަށެވެ.
އެހެން ނަމަވެސް އަނެއްކާވެސް ރިޔާސީ އިންތިޚާބު ބޯމަތިވެގެން އަންނައިރު މި މީހުން ކުރިން ދެއްކި ވާހަކަ ހަނދާން ނުހުންނާނެކަމަށާއި، އަނެއްކާވެސް އާ ކަންތައްތަކެއް ވިއްކުމަށް އެމީހުން އަންނާނެކަމަށެވެ.
ނިމިދިޔަ ރިޔާސީ އިންތިޚާބުގައި ރައީސް ސޯލިހު ޕްރޮމޯޓުކޮށް ވާހަކަދެއްކި މީހުން އަންނަ އަހަރުގެ ރިޔާސީ އިންތިޚާބުގައި އެއީ ކާކުކަންވެސް ހަނދާން ނުހުންނާނެކަމަށް އަބްދުއްރަހީމް ވިދާޅުވިއެވެ.
"މާދަމާ. ރިޔާސީ އިންތިޚާބު ބޯމަތިވަމުން އަންނަ އިރު އިބުރާހިމް މުހައްމަދު ސޯލިހު ދަންނަ އެއްވެސް ސިޔާސީ ލީޑަރަކު ހިޔެއް ނުވޭ ރާއްޖޭގައި ހުންނާނެހެނެއް"
ޕީއެންސީގެ ރައީސް އަބްދުއްރަހީމް
އަބްދުއްރަހީމް ވިދާޅުވީ ސިޔާސީ ލީޑަރުން ކޮންމެ ވާހަކައެއް ދެއްކެވި ނަމަވެސް މި ގައުމުގެ ހާލަތު ރައްޔިތުން ވަޒަންކުރަންވާނެކަމަށެވެ. ގައުމުގެ އިޖުތިމާއީ ފޭރާން ހަލާކުވެފައިވާ މިންވަރާއި އިގްތިސާދު ހީނަރުވެފައިވާ މިންވަރު އެއީ އާންމު ރައްޔިތުންނަށް ވަޒަން ކުރެވޭނެ ކަންކަމުގެ ގޮތުގައި އަބްދުއްރަހީމް ފާހަގަކުރެއްވިއެވެ.
އެއާއެި ގުޅުވާ އޭނާ ވިދާޅުވީ، ރިޔާސީ އިންތިޚާބު ބޯމަތިވީމާ ރައްޔިތުން ގުބޯ ހެއްދުމަށް އަންނަ ސިޔާސީ ލީޑަރުންނާއި މެދު ރައްޔިތުން ފާރަވެރިވާން ޖެހޭކަމަށެވެ.
އަދި އެމީހުން މީގެ ކުރިން ރައްޔިތުން ގާތުގައި ދެއްކި ވާހަކަތަކާއި ގުޅިގެން އެމީހުން ޖަވާބުދާރީ ކުރުވުމަށް އަބްދުއްރަހީމް ވަނީ އެދިވަޑައިގެންފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
