ދަރަނި އަދާކުރާކަށް އެއްވެސް ދައްޗެއް ނެތް: އަމީރު

ދައުލަތުން އަދާކުރަންޖެހޭ ދަރަނި ދެއްކުމަށް އެއްވެސް ކަހަލަ ހުރަހެއް ނެތްކަމަށް ފިނޭންސް މިނިސްޓަރު އިބުރާހިމް އަމީރު ވިދާޅުވެއްޖެއެވެ.

އަމީރު މިފަދައިން ވިދާޅުވެފައިވަނީ މިއަދު އަމީރު މަޖިލީހަށް ހާޒިރުކުރައްވާ މެމްބަރުން ކުރި ސުވާލަށް ޖަވާބުދެއްވަމުންނެވެ.

ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަހުމަދު ސަލީމު ވަނީ ރާއްޖޭގެ ދަރަނި ދެއްކޭނެ ކަމުގެ ޔަގީންކަން އޮތްތޯއާއި ދައުލަތުގެ ރިޒާވްގެ ސްޓޭޓަސް އަކީ ކޮބައިތޯ އައްސަވާ މިނިސްޓަރު އަރިހުން ސުވާލުކުރައްވާފައެވެ.

"ރާއްޖޭގެ ދަރަންޏާއި އާމްދަނިއާއި ގުޅޭގޮތުން ކަންބޮޑުވުން އުފެދޭގޮތަށް ބައެއް ފަރާތްތަކުން އެބަ ވާހަކަފުޅު ދައްކަވާ. އެގޮތުން ރާއްޖޭގައި ދަރަނި ދައްކާނެ ގޮތުގެ ޕްލޭންއެއް ނެތްކަމަށާއި، އަދި ޑިފޯލްޓުވުމުގެވެސް ފުރުސަތު އޮތްކަމަށް އެބަ އަޑުއިވޭ. މިނިސްޓަރ އަޅުގަނޑުމެންނަށް ޔަގީންކޮށް ދެއްވަފާނަންތޯ ދަރަނިދެއްކުމުގައި އެއްވެސް މައްސަލައެއް އެބަ އުޅޭތޯ؟ އަދި ރާއްޖެއަށް ލިބެންޖެހޭ އާމްދަނީއާއި ބޭރު ފައިސާގެ ރިޒާވްގެ ހާލަތު އޮތީ ކިހެނެއްތޯ؟

ހޯރަފުށީ ދާއިރާގެ މެމްބަރު ސަލީމު

ސަލީމުގެ އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ ރާއްޖޭގެ އިގްތިސާދު ސަރުކާރުން އަންދާޒާ ކުރި ވަރަށް ވުރެވެސް ރަނގަޅުވަމުން އަންނަކަމަށެވެ. އެއާއެކު ރާއްޖޭގެ ފަތުރުވެރިކަމުގެ ސިނާއަތުވެސް އަންދާޒާކުރި ވަރަށްވުރެ ކުރިއަރާފައިވާކަމަށެވެ.

ދުނިޔޭގެ ނިސްބަތުންވެސް ކޯވިޑްއަށްފަހު އެންމެ ބާރަށް ކުރިއަރަމުން އަންނަ ގައުމުތަކުގެ ތެރޭގައި ދިވެހިރާއްޖެ ހިމެނޭކަމަށް މިނިސްޓަރު ވިދާޅުވިއެވެ. އަދި ވިދާޅުވީ ރާއްޖޭގެ އިގްތިސާދު ހުރީ ރަނގަޅު ފައްތަރެއްގައި ކަމަށެވެ.

އެވާހަކަތައް ފާހަގަކުރައްވާ މިނިސްޓަރު ވިދާޅުވީ ދަރަނި ސާރވިސްކުރުމަށް އެއްވެސް ދައްޗެއް ނެތްކަމަށެވެ. ކޯވިޑްގެ އެންމެ ނާޒުކު ހާލަތުގައިވެސް، ދވެހި ދައުލަތުން ދައްކަން ޖެހުނު ދަރަނިތައް ދައްކާފައިވާކަން މިނިސްޓަރު ފާހަގަކުރެއްވިއެވެ.

"ކޮވިޑާއެކު ދައުލަތުގެ އާމްދަނީ 60 އިންސައްތަ ދަށްވެފައި އޮތް އިރުވެސް ރަނގަޅަށް ބަލައިގެން އަޅުގަނޑުމެން މިވަނީ ދަރަނި އަދާކޮށްފައި، އެހެންވީމަ ޑެޓް ސާރވިސިންގައި އެއްވެސް ރިސްކެއް ނެތްކަން އަޅުގަނޑު ފާހަގަކުރަން"

ފިނޭންސް މިނިސްޓަރު އަމީރު

މިނިސްޓަރު އަމީރު އިތުރަށް ވިދާޅުވީ، މިހާރު ހުށައަޅާފައިވާ ފިސްކަލް ސްޓްރެޓެޖީގައި ދައުލަތަށް ލިބޭ އާންދަނީ އިތުރުކޮށް ޚަރަދުތައް ކުޑަކުރުމަށް ޕޮލިސީސްތައް އެކުލަވާލާފައިވާނެކަމަށެވެ. އެ ޕޮލިސީސްތަކުގެ ތެރެއިން ދައުލަތަށް ލިބޭ އާމްދަނީ މިހާރަށްވުރެ 3 އިންސައްތަ އިތުރުކުރުމާއި ޚަރަދުތައް 3 އިންސައްތަ ކުޑަކުރުމަށް ޕްލޭންތައް ހިމަނުއްވާފައި ވާނެކަމަށް މިނިސްޓަރު ވިދާޅުވިއެވެ.

އެއާއެކު އެ ހުރިހާކަމަށް ބަލާ އެއްވެސް ދައްޗަކާއި ނުލާ ދަރަނި ދެއްކޭނެކަމުގެ ޔަގީންކަން އޮތްކަމަށް ފިނޭންސް މިނިސްޓަރު ވަނީ ވިދާޅުވެފައެވެ.