ފުލުހެއްގެ ގައިގައި ސައިކަލުން ޖެއްސި މައްސަލަ؛ 4 މީހުންވެސް މަސްތުވާތަކެއްޗަށް ޕޮޒިޓިވް

ސިނަމާލެ ބްރިޖު ހައިވޭގައި ޑިއުޓީގައި ހުރި ފުލުސް އޮފިސަރެއްގެ ގައިގައި ސައިކަލުން ޖެއްސި މައްސަލައިގައި ހައްޔަރުކުރި ހަތަރު މީހުން ވެސް މަސްތުވާތަކެއްޗަށް ޕޮޒިޓިވް ކަމަށް ކްރިމިނަލް ކޯޓުން ނެރުނު ބަންދު އަމުރުތަކުން ހާމަވެއްޖެއެވެ.

ރޭ ފަތިހު ހިނގި މި ހާދިސާގައި. ފުލުސް މީހާއަށް ސީރިއަސް އަނިޔާތަކެއް ވަނީ ލިބިފައެވެ. މި އެކްސިޑެންޓާ ގުޅިގެން ފުލުހުންގެ ބެލުމުގެ ދަށުގައިތިބި މީހުންގެ ބަންދު އަމުރުތަކުން އެނގޭ ގޮތުގައި ސައިކަލު ދުއްވި މީހާއާއި ފަހަތުގައި އިން މީހާ ވެސް ވަނީ މަސްތުވާތަކެއްޗަށް ޕޮޒިޓިވް ވެފައެވެ މީގެ އިތުރުން މި މައްސަލާގައި ހިމެނޭ އަނެއް ދެ މީހުން ވެސް މަސްތުވާތަކެއްޗަށް ޕޮޒިޓިވް ކަމަށް ކޯޓު އަމުރުން ވަނީ އެނގިފައެވެ.

ހަތަރު މީހުން ވެސް ފަސް ދުވަހަށް ބަންދުކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ. ކުރު މުއްދަތަކަށް ބަންދުކުރީ އެ އެންމެން ވެސް ވަކީލެއް ހޯދުމުގެ ފުރުސަތަށް އެދުނީތީ ކަމަށް އަމުރުގައިވެއެވެ.

ސިނަމާލެ ބްރިޖް ހައިވޭގައި ރޭ ފަތިހު ހިނގި ނުރައްކާތެރި އެކްސިޑެންޓަކީ ފުލުހުންގެ ގާނޫނީ ވާޖިބަށް ހުރަސްއަޅައި، ފުލުހުން ފަހަތަށް ޖެއްސުމަށްޓަކައި ބަޔަކު ގަސްދުގައި ހިންގި އަމަލެއް ކަމަށް ބެލެވޭ ކަމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ނެރުއްވި ބަޔާނުގައި ވަނީ ވިދާޅުވެފައެވެ.

ކޮމިޝަނަރު ވިދާޅުވީ، މި ނުރައްކާތެރި ހާދިސާގައި ވާޖިބު އަދާކުރަން ހުރި ފުލުސް އޮފިސަރަށް ވަނީ ސީރިއަސް ބޮޑެތި އަނިޔާތަކެއް ލިބިފައިވާކަމަށެވެ. އެގޮތުން އޮފިސަރުގެ އަނގަމަތި ފަޅައިގެންގޮސް ދަތްތައް ބިނދިފައިވާކަމަށް ވިދާޅުވިއެވެ. މި އަމަލު ހަރުކަށި އިބާރާތުން ކުށްވެރިކުރައްވައި ސީޕީ ވިދާޅުވީ، މިއީ މަގުމަތީގައި ނުރައްކާތެރިކޮށް އުޅަނދު ދުއްވާ ފަރާތްތަކާ ދެކޮޅަށް ފުލުހުން ފަށާފައިވާ ހާއްސަ އޮޕަރޭޝަން ހުއްޓުވައި، ފުލުހުން ނަފްސާނީ ގޮތުން ބަލިކަށިކޮށްލުމަށް ބަޔަކު ރާވައިގެން ހިންގި އަމަލެއް ކަމަށް ބެލެވޭ ކަމަށެވެ.

މި ހާދިސާ ހިނގި ވަގުތު އެ ސަރަހައްދުގައި އިތުރު ތިން ސައިކަލެއް ހަރަކާތްތެރިވިކަން ފާހަގަކުރެވިފައިވާ ކަމަށް ފުލުހުން ބުނެއެވެ.

އަނިޔާވި ފުލުސް އޮފިސަރުގެ ޙާލު، ހޯމްލޭންޑް ސެކިއުރިޓީ މިނިސްޓަރު ޢަލީ އިޙްސާން ވަނީ ބައްލަވައިލައްވާފައެވެ.