އެފްއޭއެމްގެ އިންތިހާބު އަންނަ މަހު ބޭއްވުމަށް ނިންމައިފި

ފުޓްބޯލް އެސޯސިއޭޝަން އޮފް ދަ މޯލްޑިވްސް (އެފްއޭއެމް)ގެ އިންތިހާބު އަންނަ އަހަރުގެ ޖެނުއަރީ މަހުގެ 31 ގައި ބާއްވަން ނިންމައިފިއެވެ.

އެފްއޭއެމުން ބުނީ އެއިދާރާގެ ހިންގާ ކޮމިޓީގެ 20 ވަނަ ބައްދަލުވުމުގައި އެ އިދާރާގެ އަސާސީ ގަވާއިދާ އެއްގޮތްވާގޮތުގެ މަތިން މިއަދުން ފެށިގެން 45 ދުވަހުގެ ތެރޭގައި އެ އިދާރާގެ އިންތިހާބު ބޭއްވުމަށް ނިންމާފައިވާ ކަމަށެވެ.

މި އިންތިހާބަށް ކުރިމަތި ލުމުގެ ފުރުސަތު އެފްއޭއެމުން ވަނީ ހުޅުވާލާފައެވެ. އެ އިދާރާގެ އަސާސީ ގަވާއިދުގެ ދަށުން އެފްއޭއެމްގެ މަގާމުތަކަށް ކުރިމަތިލާ ފަރާތްތަކުން މިމަހުގެ 27 ވަނަ ދުވަހުގެ 14:00 ގެ ކުރިން އެ އެސޯސިއޭޝަނަށް ލިޔެކިޔުންތައް ހުށަހެޅުމަށް ވަނީ އެދިފައެވެ. އަދި އެ ހުށަހަޅާ ލިޔެކިޔުންތައް ސިޓީ އުރައަކަށްލައި، ސީލް ކުރެވިފައި ހުންނަން ވާނެ ކަމަށް އެފްއޭއެމުން ބުނެފައިވެއެވެ.

މިހާރު އެފްއޭއެމް ގެ ރައީސް ގެ މަގާމުގައި ހުރި ބައްސާމް ޖަލީލް މި މަގާމަށް އައްޔަނު ކުރެވުނީ 2016 ވަނަ އަހަރު މިހާރު މަހިބަދޫ ދާއިރާގެ މަޖިލިސް މެމްބަރު އަހުމަދު ތޯރިގް (ޓޮމް) އާއި ވާދަކޮށް ކުރިހޯއްދަވައިގެންނެވެ. މިއީ އޭނަ އެފްއޭއެމްގެ ރައީސް ކަމުގައި ހުންނަވާތާ ދެވަނަ ދައުރެވެ.

ބައްސާމަށް ވަނީ ކޮރަޕްޝަންގެ ބޮޑެތި ތުހުމަތުކެއް ކޮށްފައެވެ. މިގޮތުން  އެފްއޭއެމަށް ބޭރުގެ ބައެއް އިދާރާތަކުން ލިބޭ ފައިސާ އަމިއްލަ އެކައުންޓްތަކަށް ޖަމާކޮށް ބޭނުންކޮށްފައިވާކަން އެނގޭ ސާފު ހެކި ބޭންކް ސްޓޭޓްމަންޓްތަކުން ފެންނަން އެބަހުރި ކަމަށްވެސް ފުލުހުން ވަނީ ބުނެފައެވެ.

ފުލުހުން ވަނީ މިދިޔަ މަހުގެ 22 ވަނަ ދުވަހު އެފްއޭއެމަށްވަނީ ވަދެ އެ އިދާރާގެ ގިނަ އަދަދެއްގެ ލިޔެކިޔުމާއި، ސާވާ ބެކަޕް އަދި ހާޑް ޑިސްކުތަކެއް ގެންގޮސްފަ އެވެ.

ދާދި ފަހުން ޕްރޮސެކިއުޓާ ޖެނެރަލް (ޕީޖީ)ގެ  އޮފީހުން ބޭއްވި ނޫސްވެރިންގެ ބައްދަލުވުމުގައި ޕީޖީ ޝަމީމް ވަނީ ބައްސާމް އަދީލް ޖަލީލާއި އެއިދާރާގެ އެހެން ވެރިންނަށްވެސް ދައުވާ ކުރެވޭ ވަރަށް ހެކި ލިބޭނެ ކަމަށް ވިދާޅުވެފައެވެ.

ދުނިޔޭގެ ފުޓުބޯޅަ ފެޑެރޭޝަން (ފީފާ) އިން ފޮނުވާ ފައިސާ ނަހަމަ ގޮތުގައި ބޭންކުރާ ކަމަށް ކުރެވޭ ތުހުމަތުތަކާ ގުޅިގެން މީގެ ކުރިން އެފްއޭއެމް އިން ނެރުނު ބާޔާނެއްގައި ބުނެފައިވަނީ އެފްއޭއެމަށް ލިބިފައިވާ އެއްވެސް ފައިސާއަކަށް އެއިދާރާއަށް ނިސްބަތްވާ އެއްވެސް ފަރާތަކުން ހިޔާނާތްތެރިވެފައި ނުވާނެ ކަމަށާއި، މިއީ ޒާތީ ބޭނުމަށް ހާލަތުގެ ފައިދާ ނެގުމުގެ ގޮތުން ބަޔަކު ކޮށްގެން އުޅޭކަމެއް ކަމަށެވެ.