ބީއެމްއެލްގެ "ސްޓާ އެވޯޑްސް" 20 މުވައްޒަފަކަށް ދީފި
މުވައްޒަފުންގެ އަގު ވަޒަންކުރުމުގެ ގޮތުން ބޭންކް އޮފް މޯލްޑިވެސް އިން ދެމުން އަންނަ "އެމްޕްލޯއީ ސްޓާ އެވޯޑްސް" 20 މުވައްޒަފަކަށް ދީފިއެވެ.
އެ ބޭންކްގެ ފަރާތުން ކޮންމެ މަހަކުވެސް ދެމުން އަންނަ މި އެވޯޑް ލިބުނު މުވައްޒަފުންނަށް އެވޯޑް ދީފައި ވަނީ ބީއެމްއެލްގައި ބޭއްވި ޚާއްސަ ރަސްމިޔާތެއްގައެވެ.
މި އެވޯޑަކީ ބޭންކަށާއި މުޖުތަމައަށް އަގުހުރި މަސައްކަތްތަކެއް ކޮށްދީފައިވާ މުވައްޒަފުންނަށާއި މަސައްކަތާއި އަހުލާގުގައި ލާމަސީލު މުވައްޒަފުން އަދި ތައުލީމާއި ކުޅިވަރުގެ އިތުރުން އެކި ހަރަކާތްތަކުން މުވައްޒަފުން ހޯދާ ކާމިޔާބީތައް ފާހަގަކޮށް، ދެމުން އަންނަ އެވޯޑެއް ކަމުގައި ބޭންކް އޮފް މޯލްޑިވްސް އިން ބުނެއެވެ.
"އެމްޕްލޯއީ ސްޓާ އެވޯޑު" ދިނުމަށް އޮތް ރަސްމިއްޔާތުގައި ބޭންކުގެ ސީއީއޯ އަދި މެނޭޖިން ޑިރެކްޓަރު ކާލް ސްޓުމްކަ ވިދާޅުވީ މިއީ ބޭންކުގެ ކަސްޓަމަރުންނާއި ބޭންކުގެ ހިދުމަތް ލިބޭ މުޖުތަމައުގެ ލާބަ އާއި މަންފާއަށްޓަކައި ބޭންކުގެ މުވައްޒަފުން ކުރާ ބުރަ އަދި ފަރުވާތެރި މަސައްކަތް ފާހަގަކުރުމަށް ދޭ މުހިންމު އެވޯޑެއް ކަމަށެވެ.
މިއީ ގަވައިދުން ދެމުން އަންނަ އެވޯޑެއްކަން ފާހަގަކުރައްވައި އޭނާ ވިދާޅުވީ މި އެވޯޑަކީ މުވައްޒަފުން ދުވަހުން ދުވަހަށް ކުރާ މަސައްކަތްތައް އިތުރަށް ފުރިހަމަކުރުމަށް ހިތްވަރު ދިނުމުގެ ގޮތުން ދޭ އެވޯޑެއް ކަމަށެވެ.
މިއީ އެ ބޭންކުން 2017 ވަނަ އަހަރު ދޭން ފެށި އެވޯޑެކެވެ. މި އެވޯޑްގެ އިތުރުން ބޭންކުގައި އެންމެ ރަނގަޅަށް މަސައްކަތްކުރާ މުވައްޒަފުންގެ އަގުވަޒަންކުރުމަށް "ސްޓާފް އެވޯޑްސް" އަދި ބޭންކަށް ދިގު މުއްދަތަކަށް ހިދުމަތްކޮށްފައިވާ މުވައްޒަފުންގެ އަގުވަޒަންކުރުމަށް "ލޯންގް ސާވިސް އެވޯޑްސް" ވެސް އަންނަނީ ދެމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
