އިނގިރޭސިވިލާތުން އިޒްރޭލާ އެކު ކުރިއަށް ގެންދިޔަ ވިޔަފާރީގެ މަޝްވަރާތައް ހުއްޓާލައިފި

އިނގިރޭސިވިލާތުން އިޒްރޭލަށް ފިޔަވަޅު އަޅައި އެމީހުންނާ އެކު ކުރިއަށް ގެންދިޔަ މިނިވަން ވިޔަފާރީގެ މަޝްވަރާތައް ހުއްޓާލައިފިއެވެ.

އިނގިރޭސިވިލާތުން މި ނިންމުން ނިންމާފައި މިވަނީ، އިޒްރޭލުން ޣައްޒާގައި ހިންގަމުންދާ ޤަތުލުއާއްމު ހުއްޓާލުމަށް ގޮވާލައި، އެފަދައިން ކަން ނުކޮށްފި ނަމަ ދަތިކުރުމުގެ ފިޔަވަޅު އަޅާނެ ކަމަށް ބުނިތާ 24 ގަޑިއިރުވެސް ނުވަނީސްއެވެ.

މި ފިޔަވަޅު ތަކާއި ގުޅިގެން އިނގިރޭސިވިލާތުގެ ފޮރިން ސެކްރެޓަރީ ޑޭވިޑް ލެމީ ބުނީ، ޣައްޒާ އަދި ހުޅަނގުއައްސޭރީގައި އިޒްރޭލުން ހިންގަމުންދާ ޖަރިމާތަކުގެ ސަބަބުން، އެމީހުންނާ އެކު މިހާރު އޮތް ވިޔަފާރީގެ އެއްބަސްވުން އިތުރަށް ފުޅާކުރުމުގެ މަޝްވަރާތައް ކުރިއަށް ގެންދެވޭނެ ކަމަކަށް ނުފެންނަ ކަމަށެވެ.

"ޣައްޒާއަށް އެހީ ފޯރުކޮށްދޭ މަގު ބަންދުކުރުމާއި، ޤަތުލުއާއްމު ފުޅާކުރުމާއި، އިޒްރޭލުގެ ބައިވެރިންގެ ކަންބޮޑުވުންތައް އެއްފަރާތްކޮށްލުމަކީ ބަލައިގަނެވޭނެ ކަމެއް ނޫން. މިކަން ހުއްޓަންޖެހޭ،" އޭނާ ބުންޏެވެ.

އިނގިރޭސިވިލާތުގެ ބޮޑިވަޒީރު ކިއަރ ސްޓާމަރ ބުނީ، ޣައްޒާގައި ކުޑަކުދިން ތަހައްމަލުކުރަމުންދާ ވޭން "އެއްގޮތަކަށްވެސް ބަލައި ނުގަނެވޭނެ" ކަމަށެވެ. އަދި، ހަނގުރާމަ ހުއްޓާލުމަށް ގޮވާލަމުން އޭނާ ވަނީ، ”އިޒްރޭލުގެ އަމަލުތަކާމެދު ކަންބޮޑުވާ ކަމަށް،" ބުނެފައެވެ.

ޔޫކޭގެ އިތުރުން ފްރާންސްގެ ރައީސް އެމެނުއެލް މެކްރޯން އަދި ކެނެޑާގެ ބޮޑުވަޒީރު މާކް ކާނީވެސް ވަނީ  އިޒްރޭލުން ހަނގުރާމަ ހުއްޓާލައި، އިންސާނީ އެހީ ފޯރުކޮށްދިނުމުގެ ހުރަސްތައް ނައްތާނުލައިފިނަމަ "ވަކި ފިޔަވަޅުތަކެއް" އަޅާނެ ކަމަށް އިންޒާރުދީފައެވެ.

ޔޫކޭ އިން މި ފިޔަވަޅުތައް އަޅާފައިވަނީ ޣައްޒާއަށް ފޯރުކޮށްދޭ އެހީގެ މިންވަރު އިތުރުކުރުމަށް ބައިނަލްއަޤްވާމީ ފަރާތްތަކުން ގޮވާލަމުންދާ ދަނޑިވަޅެއްގައެވެ. އ.ދ.ގެ އިންސާނީ އެހީގެ ވެރިޔާ ޓޮމް ފްލެޗަރ ވިދާޅުވެފައިވަނީ މިހާރު ޣައްޒާއަށް ވަންނަ އެހީގެ މިންވަރަކީ "ކަނޑުގެ ތެރެއަށް އެޅޭ ފެން ތިއްކެއް" ފަދަ އެއްޗެއް ކަމަށެވެ.