އިރާގުގައި ތިބޭތާ 12 އަހަރަށްފަހު އެމެރިކާ އާއި އިނގިރޭސި ސިފައިން އެޤައުމުން ފައިބައިފި

އެމެރިކާ އާއި އިނގިރޭސި ސިފައިން އިރާގްގައި ގާއިމްވެ ތިބޭތާ 12 އަހަރުފަހުން އެޤައުމު ދޫކޮށް ގޮސްފިއެވެ.

އުތުރު ޢިރާޤުގެ ކުރުދިސްތާން ސަރަޙައްދުގެ އިރުބީލުގައި ތިބި އިނގިރޭސިވިލާތުގެ ގާތްގަނޑަކަށް 100 ސިފައިންނާއި އެމެރިކާ ސިފައިން ފައިބާފައިވަނީ، ބޭރުގެ ސިފައިން މި މަހުގެ ނިޔަލަށް އެ ޤައުމުން ފޭބުމަށް ދެ އަހަރު ކުރިން ވެފައިވާ އެއްބަސްވުމެއްގެ ދަށުންނެވެ. މި ނިންމުމާއެކު، އައިއެސް ޖަމާޢަތާ ދެކޮޅަށް 2014 ވަނަ އަހަރު އެކުލަވައިލި ބައިނަލްއަޤުވާމީ ކޯލިޝަންގެ "އޮޕަރޭޝަން އިންހެރެންޓް ރިޒޮލްވް" މިވަނީ ރަސްމީކޮށް ނިމުމަކަށް އައިސްފައެވެ.

ކޯލިޝަން ސިފައިން ފޭބުމާ ގުޅިގެން ޢިރާޤުގެ ބޮޑުވަޒީރު ޢަލީ އަލް ޒައިދީ ވިދާޅުވީ، މިއީ ޤައުމުގެ ސަލާމަތާއި ހަމަޖެހުމުގެ ފުރިހަމަ ޒިންމާ ޢިރާޤުން އަމިއްލައަށް ނަގާ އައު މަރުޙަލާއެއްގެ ފެށުން ކަމަށެވެ. އަދި މި ތާރީޚީ ކާމިޔާބީ ފާހަގަކުރުމުގެ ގޮތުން ޢިރާޤުގައި ހަތަރު ދުވަހުގެ ޤައުމީ ބަންދެއް ވަނީ އިޢުލާނުކޮށްފައެވެ.

އިނގިރޭސި ދިފާޢީ ވުޒާރާއިން ބުނި ގޮތުގައި، ވޭތުވެދިޔަ 12 އަހަރުގެ ތެރޭގައި ޢިރާޤުގެ ސަލާމަތީ ބާރުތަކުގެ 111,000 އަށް ވުރެ ގިނަ މީހުންނަށާއި، ކުރުދީ ޕެޝްމާގާގެ 21,000 ސިފައިންނަށް ވަނީ އަސްކަރީ ތަމްރީނު ދީފައެވެ. އަދި އިނގިރޭސި ރޯޔަލް އެއާ ފޯސް އިން އައިއެސްގެ 2,300 އަށް ވުރެ ގިނަ އަމާޒަށް ވައިގެ ޙަމަލާތައް ދީފައިވާނެ ކަމަށްވެސް އެ ވުޒާރާއިން ބުންޏެވެ.

ޕެންޓަގަންގެ ތަރުޖަމާނު ޝޯން ޕާނެލް ވިދާޅުވީ، މިއީ އައިއެސް ބަލިކުރުމަށް ހިންގި ކާމިޔާބު މިޝަނެއް ކަމަށާއި، ދެން ޤައުމުގެ ސަލާމަތީ ކަންކަން ބަލަހައްޓާނީ ޢިރާޤު ސަރުކާރުން ކަމަށެވެ. އެމެރިކާގެ ސެންޓްރަލް ކޮމާންޑުން މަޢުލޫމާތު ދޭ ގޮތުގައި، ކޯލިޝަންގެ ޓާސްކް ފޯސްގެ މަސައްކަތްތައް ދެން ކުރިއަށްދާނީ ޢުރުދުންގައި ތިބެގެންނެވެ.

2017 ވަނަ އަހަރު އައިއެސް ބަލިކުރެވުނު ކަމަށް އިޢުލާނުކުރި ނަމަވެސް، އދ. ގެ ރިޕޯޓްތައް ބުނާ ގޮތުން އެ ޖަމާޢަތުގެ ސަތޭކައެއްހާ ހަނގުރާމަވެރިން އަދިވެސް އެބަތިއްބެވެ. މީގެ އިތުރުން، އީރާނުގެ ވާގިވެރިކަން ލިބޭ ހަތިޔާރުއެޅި ޖަމާޢަތްތަކުގެ ނުފޫޒު ކުޑަކުރުމަކީވެސް ޢިރާޤު ސަރުކާރަށް މިވަގުތު އޮތް ބޮޑު ގޮންޖެހުމެކެވެ.

މިއީ އެމެރިކާއާއި އިނގިރޭސި ސިފައިން ޢިރާޤުން ފޭބި ތިންވަނަ ފަހަރެވެ. މީގެ ކުރިން 1991 ވަނަ އަހަރުގެ ގަލްފު ހަނގުރާމައަށްފަހު އަދި 2003 ގެ ހަނގުރާމައަށްފަހު 2011 ވަނަ އަހަރުވެސް އެ ޤައުމުތަކުގެ ސިފައިން ވަނީ ޢިރާޤުން ފައިބާފައެވެ.