ރައީސް ޔާމީން ޖަލަށް ލުމުން އިދިކޮޅުން އޮސްޓްރޭލިޔާގެ ހައިކޮމިޝަނަށް

އިދިކޮޅު ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް ޔާމީންގެ މައްޗަށް ކްރިމިނަލް ކޯޓުން އިއްވާފައިވާ ޖަލު ހުކުމާއި ގުޅިގެން މަޝްވަރާ ކުރުމަށް އިދިކޮޅު ކޯލިޝަންގެ އިސް ލީޑަރުން އޮސްޓްރޭލިޔާގެ ހައިކޮމިޝަނަރ އާއި ބައްދަލު ކުރައްވައިފި އެވެ.

އިދިކޮޅުން ބޭއްވި މި ބައްދަލުމުގައި ޕީއެންސީގެ ނައިބް ރައީސް މުހައްމަދު ސައީދު އާއި، ރައީސް ޔާމީން ގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޑރ މުހައްމަދު ޖަމީލް އަހުމަދާއި، ޕީޕީއެމްގެ ނައިބު ރައީސް އަހުމަދު ޝިޔާމްގެ އިތުރުން ރައީސް ޔާމީން ގެ ދަރިކަލުން ޒޭން ޔާމީން ވެސް ބައިވެރިވެވަޑައިގެންނެވި އެވެ.

މިބައްދަލުވުމުގައި އަދުގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން ހިންގަމުންދާ ގާނޫނާއި ޚިލާފް، ޚުދުމުހުތާރު ޢަމަލު ތަކާއި ގުޅޭގޮތުން އޮސްޓްރޭލިޔާގެ ހައިކޮމިޝަނަރ އާއި މަޝްވަރާ ކުރެވިފައިވާ ކަމަށް އިދިކޮޅުން ބުނެއެވެ.

އަދި މީގެ އިތުރުން، ކުރިއަށް އޮތް ރިޔާސީ އިންތިހާބުގައި ރައީސް ޔާމީން އަށް ބައިވެރިވެވަޑައިގެންނެވޭނެ މަގު ބަންދު ކުރުމަށް އެމަނިކުފާނު ނުހައްގުން ޖަލަށް ލާފައިވާ ކަމަށް ބުނެ، އެކަމާއި ގުޅިގެންވެސް މަޝްވަރާތައް ކުރިއަށް ގެންދެވިފައިވާ ކަމަށް އިދިކޮޅުން ބުނެއެވެ.

ޔާމީންގެ މައްޗަށް ކްރިމިނަލް ކޯޓުން އިއްވާފައިވާ ޖަލު ހުކުމުން އެމަނިކުފާނު މިނިވަން ކުރުމަށް ބޭރު ގައުމުތަކުގެ އެހީތެރިކަން ހޯދުމުގެ މަސައްކަތް އިދިކޮޅުން ފަށާފައިވާއިރު، އެ ކޯލިޝަނުން މީގެ ކުރިން ވަނީ ޕާކިސްތާނުގެ ހައިކޮމިޝަނަރ އާއި ވެސް ބައްދަލު ކޮށް މަޝްވަރާތައް ކުރިއަށް ގެންގޮސްފައެވެ.