ހުރިހާ ރަށަކަށް ކަރަންޓު ދެވިއްޖެ، ގައިމު ކަމެއްކޮށް ނިންމިއްޖެތާ: ރައީސް ޞާލިހް
މި ވެރިކަމުގައި 24 ގަޑިއިރު ކަރަންޓުގެ ޚިދުމަތް ހުރިހާ ރަށަކަށް ކަށަވަރު ކޮށްދެވިއްޖެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވެފައިވަނީ އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ހދ ކުމުންދޫއަށް ވަޑައިގެން އެ ރަށުގައި ބޭއްވި ޖަލްސާއެއްގައި ވާހަކަދައްކަވަމުން ނެވެ.
ރައީސް ސޯލިހު ވިދާޅުވީ އެމަނިކުފާނު ވެރިކަމާއި ހަވާލުވެ ވަޑައިގެންނެވިއިރު ރާއްޖޭގެ ރަށްތަކުގައި މީހުން ދިރިއުޅެމުން ދިޔައީ ވަރަށް ނިކަމެތި ހާލުގައި ކަމަށެވެ. ގިނައީ ސާފު ބޯފެނާއި ސިއްހީ ޚިދުމަތްތައް އެކަށިގެންވާ ގޮތެއްގައި ނުލިބޭ ރަށް ރަށްކަމަށް އެމަނިކުފާނު ވިދާޅުވިއެވެ.
"އަޅުގަނޑުމެން ވެރިކަމަށް އައިރުގަ ރާއްޖޭގެ ބޮޑު ބަޔަކަށް ސާފު ބޯފެނެއް ނުލިބޭ. ނަރުދަމާގެ ނިޒާމެއް ނެތް. ސިއްހީ ޚިދުމަތް ރަށްރަށުން ހޯދުމަކީ ދަތި އުނދަގޫ ބޮޑު ވޭނަކަށް ވެފަ. ސުކޫލުތަކުގެ ހާލު އޮތް ގޮތް ޚާއްސަކޮށް ކުދި ރަށްރަށުގައި އޮތް ގޮތް ވަރަށް ސާފުކޮށް އެނގެން އޮތީ"
ރައީސް ސޯލިހު
އެކަން ފާހަގަކުރައްވާ ރައީސް ސޯލިހު ވިދާޅުވީ އެމަނިކުފާނު އެންމެ އިސްކަންދެއްވާ ސިޔާސަތަކަށް ހެއްދެވީ ކުޑަ ރަށެއް ބޮޑު ރަށެއް ތަފާތު ކުރުމެއްނެތި ރައްޔިތުންނަށް އަސާސީ ކަންކަން ފުރިހަމަކޮށްދެއްވުން ކަމަށެވެ.
މިހާރު ރަށްތަކަށް ކުރައްވާ ދަތުރުފުޅުގައި އެއްވެސް ރަށެއްގައި ކަރަންޓުގެ ޚިދުމަތް ނުލިބޭ ކަމުގެ ޝަކުވާ ރައްޔިތުން ކުރަމުން ނުދާކަމަށް އެމަނިކުފާނު ވިދާޅުވިއެވެ. އަދި އެއީ މި ވެރިކަމުގައި ރައްޔިތުންނަށް ކަމެއް ކޮށްދެވިއްޖެ ކަމުގެ މިސާލެއްކަމަށް ރައީސް ސޯލިހު ވަނީ ސިފަކުރައްވާފަ އެވެ.
"މޫސަ އަޅުގަނޑު ގާތު ދަންނަވާލި ވާހަކައެއް... މި ރަށް ރަށަށް ދާއިރުގައި އެއްވެސް ރަށަކުން ކަރަންޓުގެ ޝަކުވާއެއް މިހާރަކު ނާދެޔޭ. ހަމަގައިމުވެސް ކަމެއްކޮށް ނިންމިއްޖެތާ"
ރައީސް ސޯލިހު
ރައީސް ސޯލިހު ވިދާޅުވީ ކަރަންޓުގެ އިތުރުންވެސް ވަރަށް ގިނަ އަސާސީ ކަންކަން ގިނަ ރަށްރަށުގައި ނިންމާލެވިފައި ވާ ކަމަށެވެ.
އެމްޑީޕީގެ ރިޔާސީ ޕްރައިމަރީގައި ތާއީދު ހޯއްދެވުމަށް ރައީސް ސޯލިހު ރަށްތަކަށް ދަތުރު ކުރައްވަމުންދާއިރު، އެ ރަށްރަށުގައި ކުރައްވާނެ މުހިންމު މަސައްކަތްތައްވެސް ގެންދަވަނީ އިއުލާނު ކުރައްވަމުންނެވެ. އަދި ދެވަނަ ދެވަނަ ދައުރެއް އެމަނިކުފާނަށް ލިބިވަޑައިގެންފި ނަމަ ގެންގުޅުއްވާނެ ސިޔާސަތުތައްވެސް އެމަނިކުފާނު ގެންދަވަނީ ހާމަ ކުރައްވަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
