ކުރީގެ ސިފައިންނަށް މަލާމާތް: މިހާރު ތައްޔާރު ކުރާ ސިފައިން ފިނިކޮޓަރިއަށް ލައިގެން ރޯކަށް ނުފަށާނެ: މާރިޔާ

ބޭސްފަރުވާއަށް އިންޑިއާއަށް ދިޔުމުން ޑީޕޯޓުކޮށްލި ޕީޕީއެމް ހުޅުމާލެ ދާއިރާގެ ރައީސް އަބްދުއް ޞަމަދަށް ޑިފެންސް މިނިސްޓަރު މާރިޔާ ދީދީ މަލާމަތް ކުރައްވައިފި އެވެ.

ޞަމަދު އާއިލާއާއެކު އިންޑިއާއަށް ބޭސްފަރުވާއަށް ކުރި ދަތުރުގައި، އިންޑިއާގެ މަނިޕާލް ހޮސްޕިޓަލުން ހައްޔަރުކޮށް އިމިގްރޭޝަންގެ ބެލުމުގެ ދަށުގައި ދެ ދުވަސް ބަހައްޓާފައިވާއިރު، އޭނާ ބަހައްޓާފައި ހުރީ ފިނި ކޮޓަރިއެއްގައި ކަމަށް ޞަމަދު ވަނީ ކިޔައިދީފަ އެވެ.

އެތަނުގައި އޭނާ ބަހައްޓާފައި ހުރިއިރު، އޭނާއަށް ގަޑިން ގަޑިއަށް ދޭން ޖެހޭ ބޭސްތައް ނުދީ، ކާން ނުދިނުމުގެ ސަބަބުން އަނބުރައިގަނެ އަވަސް ފަރުވާދޭން ޖެހުނުމަށް ޞަމަދު ވިދާޅުވެފައި ވެއެވެ.

ރައީސް އިބްރާހިމް މުހައްމަދު ޞާލިހަށް ރިޔާސީ ޓިކެޓު ދިނުމަށް ބޭއްވި ހަފްލާގައި ވާހަކަފުޅު ދައްކަވަމުން ޑިފެންސް މިނިސްޓަރު މާރިޔާ ދީދީ ވަނީ އެ ހާދިސާއަށް އަލިއަޅުވާލައްވާފަ އެވެ.

މާރިޔާ ވިދާޅުވީ އެކަމަނާއާއި އެ މިނިސްޓްރީ ހަވާލުކުރައްވަމުން، ގައުމީ ދިފާއީ ބާރަކީ ފަޚުރުވެރި ގާބިލު ސިފައިން އުފައްދާ ތަނަކަށް ހެއްދެވުމަށް ރައީސް ޞާލިހު އެދިވަޑައިގެންނެވި ކަމަށެވެ.

ދިފާއީ ބާރުގައި ގިނަ ދުވަސްތަކެއް ވަންދެން މަސައްކަތް ކުރިކަމަށް ވިދާޅުވާ ޞަމަދު އިންޑިއާއިން އަނބުރާ ފޮނުވާލުމާއި ގުޅިގެން ހިއްސާކުރި ވާހަކަތަކަމަށް ބަލާއިރު، މި ސަރުކާރުގައި ގާބިލު ސިފައިން އުފެއްދިފައިވާކަމުގެ އިހުސާސް ކުރެވޭކަމަށް މާރިޔާ ވިދާޅުވި އެވެ.

"މި ދޭތެރޭން މީޑިއާތަކުގައި އުޅުނު.. ކޮންމެ ރެއަކު ވަރަށް ބާރަށް އަޅުގަނޑުމެންގެ އަވައްޓެރި ގައުމުގެ މިލިޓަރީއާއި ދިމާލަށް އެކި ގޮތްތަކަށް ގޮން ޖައްސަވާ ވާހަކަދެއްކެވި ބޭފުޅުންގެ ތެރޭގައިވެސް އެފައުޖުގެ ކުރީގައި ދިދަ ހިއްަވައިގެން ހުންނަވާ ބޭފުޅެއް.. ތުނބުޅިބާލައްވާ ކުޑަކޮށް ތައްޔާރުވެލައްވައިގެން އާއިލާއާއެކު އެ ގައުމަށް ވަޑައިގެންނެވީ. ދެން ފެނިގެން ދިޔައީ އަނބރާ ވަޑައިގަތްތަން.. ކެމެރާތައް ހުރީ އަޅުވާފަ.. ވިދާޅުވީ މުޅި އުމުރު ތިމަންނާ ހޭދަކުރީ ސިފައިންނާއި ފުލުހުންގެ ތެރޭގައޭ. ދިދަ ހިއްޕަވައިގެން ކުރީގައި ޖަޑިބެއްހެން ހުންނަވާތަން ފެނޭ. ވަޑައިގެން ހޭދަކުރެއްވީ މިލިޓަރީ ކީއްކުރަންތޯ އިމިގްރޭޝަންގެ ފިނި ކޮޓަރިއެއްގައި. އެކަމަކު އަނބުރާ ވަޑައިގެންނެވީ ކީރިތި ކުރައްވަމުން"

ޑިފެންސް މިނިސްޓަރު މާރިޔާ ދީދީ

ޞަމަދަކީ ކުރިން ދިފާއީ ބާރުގައި މަސައްކަތް ކުރެއްވި ނަމަވެސް މިހާރު ރިޓަޔާޑް ބޭފުޅެކެވެ. އަދި ހިތުގެ ބައްޔަށް ބޭސްކުރަމުންދާ ބޭފުޅެކެވެ.

މިއަދު ސިޔާސީ މައިދާނުގައި ހަރަކާތްތެރިވަމުން ދާއިރު، ޞަމަދަކީ ގަވައިދާއި ޚިލާފަށް ރާއްޖޭގެ އެކި ކަންކޮޅުތަކުގައި ގާއިމުވެތިބި އިންޑިއާ ސިފައިން އަނބުރާ ފޮނުވާލުމަށް ގޮވާލާ ކުރިއަށް ގެންދާ ހަރަކާތްތަކުގައި އިސްކޮށް ހަރަކާތްތެރިވާ ބޭފުޅެކެވެ.

"އިންޑިއާ އައުޓު" ކެމްޕޭނުގައި ބައިވެރިވެ އިންޑިއާ ސިފައިން ތިބުމާއި ދެކޮޅަށް އަޑުއުފުލާ ފަރާތްތަކަށް އިންޑިއާއިން ބޭނުން އަދަބެއް ދިނުމަކީ މައްސަލައެއް ނޫންކަމަށް ދޭހަވާ މޭރުމުން ވާހަކަފުޅު ދައްކަވަމުން މާރިޔާ ވިދާޅުވީ ޞަމަދު އިމިގްރޭޝަންގެ ފިނި ކޮޓަރެއްގައި ބަހައްޓާލުމުން، އެކަމަށް ކެތް ނުކުރެވުނީ ފިނޑިކަމުން ކަމަށެވެ.

އެއާއި ޚިލާފަށް މިހާރު ސިފައިންގެއިން ތަމްރީނު ކުރާ ސިފައިންނަކީ ފިނިކޮޓަރިއަކަށް ލައިގެން ރޯނެ ބައެއް ނޫން ކަމަށް މާރިޔާ ވިދާޅުވި އެވެ.

"މިއަދު އިރާދަކުރެއްވިއްޔާ އަޅުގަނޑުމެންގެ ސިފައިންނާއި ފުލުހުންގެ އެ ހިތްވަރު ހުންނާނެ.. އިމިގްރޭޝަންގެ ފިނި ކޮޓަރިއެއްގައި ތިބިފަކައެއް އައިސް ރޮއެއް ނުގަންނާނެ.. ހެދެނީ ނެހެދެނީ ކިހެނެއްކަމެއް ނޭގިގެން އުޅޭނެ ބައެއް ނޫން އަޅުގަނޑުމެން މި ތައްޔާރުކުރަމުން ދަނީ"

ޑިފެންސް މިނިސްޓަރު މާރިޔާ ދީދީ

އޭގެ އިތުރުން ރައީސް ޞާލިހުގެ ދިފާއީ ސިޔާސަތަށްވެސް މާރިޔާ ވަނީ ތައުރީފުކުރައްވާފަ އެވެ.

އެކަމަަނާ ވިދާޅުވީ ރައީސް ޞާލިހުގެ ޙާރިޖީ ސިޔާސަތަކީ ހުރިހާ ގައުމުތަކާއިވެސް އެކުވެރިކަން ބާއްވާ ސިޔާސަތެއް ކަމަށެވެ.

އެ ސިޔާސަތުގެ ތެރެއިން ދޭ ދޭ ގައުމުތަކާއި އޮންނަ ގުޅުން ހީނަރުކުރުމަށް އެއްވެސް މީހަކަށް ފުރުސަތު ނުދެއްވާނެކަމަށް އެކަމަނާ ވަނީ ވިދާޅުވެފަ އެވެ.