ހީފައި ޖޯކު ޖަހާ ވަރުގެ ކަންކަން ބޮޑެތި ވަޒީރު ބޭފުޅުންނަށް އެނގިވަޑައިގަންނަވަން ޖެހޭނެ: ވައްޑެ

ހީފައި ޖޯކު ޖަހާ ވަރުގެ ކަންކަން ބޮޑެތި ވަޒީރު ބޭފުޅުންނަށް އެނގިވަޑައިގަންނަވަން ޖެހޭނެ ކަމަށް އުނގޫފާރު ދާއިރަގެ މެމްބަރު މުހައްމަދް ވަހީދު(ވައްޑެ) ވިދާޅުވެއްޖެއެވެ.

ވަހީދު މިހެން ވިދާޅުވީ ރޭ ރައީސް އިބްރާހިމް މުޙައްމަދް ޞާލިޙަށް އެމްޑީޕީގެ ރިޔާސީ ޓީކެޓް ހަވާލު ކުރުމަށް ބޭއްވި ޖަލްސާގައި، ދާދި ފަހަކުން އިންޑިޔާ އަށް ބޭސް ފަރުވާ އަށް ގޮސް ހުއްޓައި ހައްޔަރު ކޮށް ޑިޕޯޓު ކޮށްލި ޕީޕީއެމް ހުޅުމާލެ ދާއިރާގެ ރއީސް އަދި އިންޑިއާ އައުޓް ހަރަކާތުގައި އެކްޓިވިސްޓް އަބްދުއްޞަމަދުގެ މައްސަލައިގައި ޞަމަދުއަށް ރައްދުވާ ގޮތަށް ވާހަކަ ދެއްކެވެމުގައި ހަޖޫޖެއްސެވުމާއި ގުޅިގެންނެވެ.

"ހީފައި ޖޯކު ޖަހާ ވަރުގެ ކަންކަމާ، ސީރިޔަސްވާން ޖެހޭ ވަރުގެ ކަންކަން ވަކިކުރާން، ބޮޑެތި ވަޒީރު ބޭފުޅުންނަށް އެނގިވަޑައިގަންނަވަން ޖެހޭނެ"

ވައްޑެ ވިދާޅުވެފައިވެއެވެ.

މިނިސްޓަރ މާރިޔާގެ ވާހަކަގައި ވިދާޅުވީ ތިޔަބޭފުޅުންނަށް މިދޭތެރެއިން މީޑިއާތަކުގައި އުޅުނު ވަރަށް ބާރަށް ކޮންމެ ރެޔަކު އަޅުގަނޑުމެންގެ އަވައްޓެރި ޤައުމުގެ މިލިޓަރީއާ ދިމާލަށް ގޮންޖައްސަވައި އެކި ގޮތްގޮތަށް ވާހަކަދެއްކެވި ބޭފުޅުންގެ ތެރޭގައިވެސް އެ ފައުޖުގެ ކުރީގައި ދިދަ ހުންނަވާ ބޭފުޅެއް، ތުނބުޅި ބާލައްވައިގެން އާއިލާއާއެކު ވަޑައިގަތީ އިންޑިއާއަށް ކަމަށެވެ. ދެން އެނބުރި ވަޑައިގެންނެވިއިރު ކެމެރާތައް ހުރީ އޭނާއަށް އަމާޒުވެފައި ކަމަށާއި، މޫނުގައި އަތް އަޅުއްވައި ކީރިތިކުރެއްވިހެން ހީވިކަމަށްވެސް މާރިޔާ ވިދާޅުވިއެވެ.

"ކެމެރާތައް ހުރީ އަޅުވާފައި. [ސަމަދުބެ] ވަޑައިގެން ވާހަކަދައްކަވަމުން އަޅުގަނޑުމެންނަށް ފެނުނީ މިހެން މޫނުގައި އަތް އަޅުއްވައި، އަޅުގަނޑަށް ހީވީ ކުޑަކޮށް ކީރިތިކުރެއްވިހެން،"

ސަމަދުއަށް ހަޖޫޖައްސަވަމުން މާރިޔާ ވިދާޅުވިއެވެ.

އެވާހަކަތައް ދިފާއުކުރައްވަމުންވެސް އެކަމަނާ ތަކުރާރު ކުރެެއްވީ އިންޑިއާ ސިފައިން ތިބުމާއި ދެކޮޅަށް އަޑުއުފުލާނަމަ އިންޑިއާއިން ބޭނުން އަދަބެއް ދެވިދާނެ ވާހަކައެވެ. އަދި އެކަން ހުރިހާ ރައްޔިތުންވެސް ދަންނަން ޖެހޭނެ ވާހަކައެވެ.

ޑިފެންސް މިނިސްޓަރު މި މޭރުމުން ވާހަކަދައްކަވަމުން ދާތީ ގިނަ ބައެއްގެ ފާޑުކިޔުން އަމާޒުވެފައިވާއިރު، ދިވެހި ސިފައިންގެ ތެރޭގައި އަގުހުރި ޚިދްމަތްތަކެއް ކޮށްދެއްވި އަލީ އިހްސާން ވަނީ މާރިޔާ ދީދީއަށް، އެކަމަނާއަކީ ދިވެހިރާއްޖޭގެ ޑިފެންސް މިނިސްޓަރުކަން ހަނދާން ކޮށްދެއްވާފަ އެވެ.