ނޫސްވެރިޔާ ފުލުހެއް ގައިގާ ޖެހި ކަމުގެ ހެއްކެއް ދައްކަވަންވީ ނޫންތޯ؟: ވަހީދު
ބުރާސްފަތި ދުވަހު ބޭއްވުނު އިދިކޮޅު ކޯލިޝަންގެ މުޒާހަރާގެ ތެރެއިން ހައްޔަރު ކުރެވުނު ނޫސްވެރިޔާ ފުލުހުންގެ ގައިގައި ޖެހި ކަމުގެ ހެއްކެއް ދެއްކެވުމަށް އުނގޫފާރު ދާއިރާގެ މެމްބަރު މުޙައްމަދު ވަޙީދު (ވައްޑެ) އެދިއްޖެއެވެ.
ފުލުހުން މިއަދު ކުރި ޓްވީޓެއްގައި ބުނެފައިވަނީ މާރިޗް 16 ވަނަ ދުވަހުގެ ރޭ މާލޭގައި ކުރިއަށް ގެންދިޔަ އެއްވުމެއްގައި ނޫސްވެރިއަކު ފުލުހުންގެ ބެލުމުގެ ދަށަށް ގެނެސްފައި ވަނީ، މީހަކު ފުލުހުންގެ ބެލުމުގެ ދަށަށް ގެންނަން މަސައްކަތްކުރި ވަގުތު ނޫސްވެރިޔާ އެކަމަށް ހުރަސް އަޅައި ފުލުހެއްގެ ގައިގައި ޖަހާފައިވާ މައްސަލައާ ގުޅިގެން ކަމަށެވެ.
"ނޫސްވެރިޔާ ފުލުހެއް ގައިގާ ޖެހި ކަމުގެ ހެއްކެއް ދައްކަވަންވީ ނޫންތޯ؟" ފުލުހުން ކުރި ޓްވީޓަށް ރައްދު ދެއްވަމުން މިއަދު ވައްޑެ ކުރި ޓްވީޓެއްގައި ވިދާޅުވެފައިވެއެވެ.
އަދި އެހެން ނޫންނަމަ ކުރީއްސުރެ ކަންކުރަމުން އައި ފަދައިން މީހުންގެ ބޮލުގައި ދޮގު އިލްޒާމު އަޅުވަނީ ކަމުގައި ދެކެވުމުގެ ޖާގަ ވަރަށް ބޮޑުވާނެ ކަމަށް ވައްޑެ ވަނީ ވިދާޅުވެފައެވެ.
ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމް މިނިވަން ކުރުމަށް ގޮވާލައި އިދިކޮޅު ޕީޕީއެމް/ޕީއެންސީ ކޯލިޝަނުން ސިލްސިލާކޮށް މާލޭގެ މަގުމަތީގައި ކުރިއަށް ގެންދާ މުޒާހަރާ ކަވަރު ކުރަމުންދިޔަ "އަވަސް" ނޫހުގެ ނޫސްވެރިއެއް ކަމަށްވާ ހުސައިން ޖުމާން، ބުރާސްފަތި ދުވަހުގެ ރޭ ފުލުހުން ވަނީ ހައްޔަރުކޮށްފަ އެވެ. ނޫސްވެރިއެއް ކަން އަންގައިދޭ ކާޑުވެސް އަޅައިގެން ހުރި އެ ނޫސްވެރިޔާ ހައްޔަރު ކުރުމުގެ ތެރޭގައި ފުލުހުން އޭނާގެ މޭމަތީގައި އަތް އަޅައި ކޮށްޕާވެސް ލާފައިވާ ކަމަށް އޭނާ އާއި ހަވާލާދީ އިދިކޮޅުން ވަނީ ބުނެފައެވެ.
އިއްޔެ ޖުމާންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމަށްފަހު ކޯޓުން އޭނާ ވަނީ ދޫކޮށްލާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
