އިޒްރާއިލް ސިފައިން ފަލަސްޠީނުގެ މީހަކު ޝަހީދުވިފަހުން ހަށިގަނޑަށް ބަޑިޖަހައިފި

އިޒްރާއިލް ސިފައިން ފަލަސްޠީނުގެ މީހަކު ޝަހީދުވިފަހުން އޭނާ ގެ ހަށިގަނޑަށް ބަޑިޖަހައިފިއެވެ.

ފަލަސްޠީނުގެ ހުޅަނގު އައްސޭރީގައި އިޒްރާއިލްގެ ސިފައިން، 23 އަހަރުގެ ޔަޒާން ޢޮމަރް ޖަމީލް ކާޝިބްގެ ގަޔަށް އިޒްރާއިލް ސިފައިން ބަޑިޖަހައިފައިވަނީ އޭނާ އެމީހުންނަށް ވަޅިއަކުން ހަމަލާދިން ކަމަށްބުނެއެވެ.

ފަލަސްޠީނުގެ ހެލްތް މިނިސްޓްރީއިން ހާމަކޮށްފައިވާ ގޮތުގައި ޔަޒާން ގެ ގަޔަށް އިޒްރާއިލް ސިފައިން ބަޑިޖަހައިފައިވަނީ އަލް ބިއްރާ ޕްރޮވިންސްއަށް ވަންނަން އޮންނަ މަގުގެ އުތުރުގައި އިޒްރާއިލް ސިފައިން ދިން ބަޑިގެ ހަމަލާތަކުގެ ސަބަބުން ކަމަށެވެ. އަދި އޭނާ ޝަހީދުވިފަހުންވެސް އޭނާގެ ހަށިގަނޑަށް އިޒްރާއިލް ސިފައިން ބަޑި ހަޖައިފައިވެއެވެ.

އިޒްރާލްގެ ސިފައިން ބުނެފައިވަނީ އެމީހުންނަށް ޝައްކުކުރެވޭ މީހަކު ފެނި ސުވާލުކުރުމަށް ހުއްޓުވުމުން އޭނާ އެމީހުންނަށް ވަޅިން ހަމަލާދިން ކަމަށެވެ. ނަމަވެސް އިޒްރާއިލްގެ އެއްވެސް މީހަކަށް އަނިޔާއެއް ވެފައެއް ނުވެއެވެ.

މިއަހަރު ފެށުނުފަހުން އިޒްރާއިލުން މިހަތަނަށް ފަލަސްޠީނުގެ 84 މީހަކު ޝަހީދުކޮށްލައިފައިވެއެވެ. އޭގެ ތެރޭގައި ކުޑަ ކުދިން ވެސް ހިމެނެއެވެ.

މިދިޔަ ބުރާސްފަތި ދުވަހުވެސް އިޒްރާއިލް ސިފައިންވަނީ، ހުޅަނގު އައްސޭރީގެ ޖެނީންގައި  ފަލަސްޠީނުގެ 4 މީހަކު ޝަހީދުކޮށްލައިފައެވެ. އޭގެތެރޭގައި ފުރާވަރުގެ ކުއްޖަކުވެސް ހިމެނެއެވެ. އޭގެ ހަފްތާއެއްހާ ދުވަސްކުރިން ޖެނީންގައި ހިންގި މިލިޓަރީ ރެއިޑެއްގައި ފަލަސްޠީނުގެ 3 މީހަކު ވަނީ ޝަހީދުވެފައެވެ. އޭގެ ފަހުން 48 ގަޑިއިރު ނުވަނިސް ޖެނީންގެ ހަމަ އެހެން ސަރަހައްދެއްގައި 6 މީހަކު ވަނީ ޝަހީދުކޮށްލައިފައިވެއެވެ.

މި އަހަރުގެ ޖެނުއަރީ މަހުގެ ތެރޭގައި އިޒްރާއިލުން ވަނީ ފަލަސްޠީނުގެ ނުވަ މީހަކު ޝަހީދުކޮށްލައިފައެވެ. ޖެނީން ރެފިޔުޖީ ކޭމްޕްގައި ހިންގި ހަރުކަށި އަދި އަނިޔާވެރި ރެއިޑެއްގައި ތެރޭގައި އުމުރުންދުވަސްވީ އަންހެނަކުވެސް ޝަހީދުކޮށްލައިފައިވެއެވެ.

ހުކުރުދުވަހު ޝަހީދުވި 23 އަހަރުގެ ޒުވާނާގެ މަރާއި އެކު އިޒްރާއިލުގެ ޓެރަރިސްޓުން ފަލަސްޠީނުގައި ހިންގި އެންމެ  އަނިޔާވެރި ލޭއޮހޮރުވުންތައް ހިންގި އަހަރަށް މި އަހަރު ވެގެން ދާނެއެވެ.