ގާސިމާއި، ކެންޕެއިން ޓީމަށް މަކުނުދޫއިން ހޫނު މަރުހަބާއެއް!
ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިހާބުގައި ޖުމްހޫރީ ޕާޓީގެ ފަރާތުން ވާދަކުރައްވާ އެ ޕާޓީގެ ލީޑަރ އަދި މާމިގިލީ ދާއިރާގެ މެންބަރު ގާސިމް އިބްރާހިމް، ކެންޕެއިނަށް ހދ. މަކުނުދޫއަށް ވަޑައިގެންނެވުމުން އެރަށުން، އެމަނިކުފާނަށް ހޫނު މަރުހަބާއެއް ދަންނަވައިފިއެވެ.
ރިޔާސީ ކެންޕެއިނަށް ގާސިމަށް މަކުނުދޫއަށް ވަޑައިގެންނެވުނީ މިއަދު ހެނދުނު ގާތްގަނޑަށް 10:10 ކަން ހާއިރުއެވެ.
ގާސިމް އަށް މަރުހަބާ ދެންނެވުމަށް ޖުމްހޫރީ ޕާޓީގެ ދިދަ ތަށް ބަނދަރުގައި ދަމާލެވިފައިވާއިރު، އެ ޕާޓީގެ ކުލަ, ރަތް ކުލައިގެ ހެދުމުގައި މަކުނުދޫގެ ގިނަ އަދަދެއްގެ ރައްޔިތުން ވަނީ ބަނދަރު ސަރަހައްދަށް އެއްވެފައެވެ. އެމީހުންނާއި ގާސިމް އާއި ޓީމުގެ ބޭފުޅުން ވަނީ ސަލާމްކުރައްވާފައެވެ.
ރިޔާސީ ކެންޕެއިނަށް ބޮޑުތިލަދުންމައްޗަށް ފެއްޓެވި މި ދަތުރުފުޅުގައި ޤާސިމް ވަޑައިގަތުމަށް ހަމަޖެހިފައިވަނީ މަކުނުދޫ، ނޮޅިވަރަމް، ނޮޅިވަރަމްފަރު، ހަނިމާދޫ އަދި ކުޅުދުއްފުއްޓަށެވެ.
ހދ. އަށްފަހު ދެން ޤާސިމް ވަޑައިގަތުމަށް ހަމަޖެހިފައިވަނީ ށ. އަތޮޅަށެވެ. ށ.އަތޮޅުން
ކަނޑިތީމާއި ގޮއިދު އާއި ކޮމަންޑު އާއި ފުނަދު އާއި މިލަންދޫ އަދި ފޯކައިދުއަށް ވަޑައިގަތުމަށް ހަމަޖެހިފައިވާ ކަމަށް ޖޭޕީ އިން މަޢުލޫމާތު ދެއްވި އެޕާޓީގެ ތަރުޖަމާނު ޢަލީ ޞާލިޙް ވިދާޅުވިއެވެ.
ޢަލީ ޞާލިޙް ވިދާޅުވީ ދުވަސްކޮޅު މަދުވެފައި ވީ ނަމަވެސް ޖޭޕީގެ ކެންޑިޑޭޓާއި ރަނިންގމޭޓު ރާއްޖޭގެ ހުރިހާ ރަށްތަކަކަށް ވަޑައިގަންނަވާނެ ކަމަށެވެ. ބައެއް ރަށްރަށަށް ދެބޭފުޅުން އެކުގައިވެސް ވަޑައިގަންނަވާނެ ކަމަށް ޢަލީ ޞާލިޙް ވިދާޅުވިއެވެ.
މީގެއިތުރުން ޢަލީ ޞާލިޙް ވިދާޅުވީ ޤާސިމް ބައެއް ރަށްރަށުގައި ރައްޔިތުންނާއި ބައްދަލު ކުރައްވާނީ ޖަލްސާ ތަކުން ކަމަށާއި އަދި ބައެއް ރަސް ރަށުން ގޭގެއަށް ގޮސްވެސް ބައްދަލު ކުރައްވާނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
