އަލަމްގިރީގެ މައްޗަށް އިތުރު 40 ދައުވާ އުފުލައިފި

އެއްޖިންސުން ގުޅުން ހިންގިކަން ސާބިތުވުމާއި ގުޅިގެން ޖަލު ހުކުމް ތަންފީޒުކުރަމުން އަންނަ ބަންގްލަދޭޝްގެ ރައްޔިތެއްކަމަށްވާ އެމްޑީ އަލަމްގިރީގެ މައްޗަށް އިތުރު 40 ދައުވާއެއް އުފުލައިފިއެވެ.

ޕްރޮސެކިއުޓަރ ޖެނެރަލްގެ އޮފީހުން ބުނީ އަލަމްގިރީގެ މައްޗަށް އުފުލާފައިވަނީ އެއްޖިންސުން ގުޅުން ހިންގާ އެކަން ކުރަމުން ދިޔަ ވަގުތު ވީޑިއޯތައް ހެދިކަމުގެ ދައުވާއެވެ.

ޕީޖީ އޮފީހުން ބުނީ ބަނގްލަދޭޝް ރައްޔިތެއްކަމަށްވާ އަލަމްގިރްގެ މައްޗަށް ދިވެހިރާއްޖޭގެ ގާނޫނުލްއުގޫބާތުގެ 622 ވަނަ މާއްދާގެ (ހ) ގެ ހަތް ވަނަ ނަންބަރާ ހަވާލާދީ، އެ މާއްދާގެ (ބ) ގެ ދެ ވަނަ ނަންބަރުގެ ދަށުން އޮރިޔާން ކާޑު ހެދުމުގެ ކުށުގެ 40 ދައުވާ މިއަދު ކްރިމިނަލް ކޯޓަށް ހުށަހަޅާފައިވާ ކަމަށެވެ.

އަލަމްގިރީގެ މައްސަލަ ފުލުހުން ބަލަން ފަށާފައިވަނީ އޭނާ އެތައް ބަޔަކާއެކު އެއްޖިންސުން ގުޅުން ހިންގާ މަންޒަރު ފެނިގެންދާ ވީޑިއޯތަކެއް ސޯޝަލް މީޑިއާގައި އާންމުވުމާއި ގުޅިގެންނެވެ.

އެ ވީޑިއޯތަކުގައި އަލަމްގިރި ރާއްޖޭގެ މަޝްހޫރު ސިޔާސީ ފަރާތްތަކާއެކު އެއްޖިންސުން ގުޅުން ހިންގާތަން ފެނިގެންދެއެވެ.

އަލަމްގިރިއާއެކު އެއްޖިންސުން ގުޅުންހިންގި މީހުންގެ ތެރޭގައި ދިފާއީ ބާރުތަކުގައި މަސައްކަތް ކުރާ ފަތާތްތަކާއި، ސަރުކާރުގެ އެކި އިދާރާތަކުގެ އިތުރުން ބައެއް ސުކޫލުތަކުގެ މުދައްރިސުންވެސް ހިމެނެއެވެ.

އެ މައްސަލައާއި ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮއްކޮ ނާޒިމް ސައްތާރުގެ މައްޗަށް ވަނީ 3 މަސް ދުވަހުގެ ޖަލު ހުކުމެއް ކޮށްފައެވެ. އަދި އެ މައްސަލައިގައި ޝާމިލުވާ އިތުރު ބައެއް މީހުންގެ މައްޗަށް ވަނީ ދައުވާކޮށްފައެވެ.

އާންމު ވީޑިއޯތަކާއި ގުޅިގެން އަލަމްގިރި ފުލުހަށް ހާޒިރުކޮށް ހިންގި ތަހުގީގަށް ދިން ބަޔާނުގައި އޭނާވަނީ 50އަށްހުރެ ގިނަ މީހުންނާއެކު އެއްޖިންސުން ގުޅުން ހިންގިކަމަށާއި، އޭގެ ތެރެއިން 40 އަށް ވުރެ ގިނަ މީހުންނާއެކު އެއްޖިންސުން ގުޅުން ހިންގި ވަގުތު ވީޑިއޯކުރިކަމަށް އިއުތިރާފުވެފައެވެ.

އެހެން ނަމަވެސް އެ ވީޑިއޯތައް ބޭނުންކޮށްގެން އެއްވެސް މީހަކު ބްލެކްމެއިލް ކުރަން މަސައްކަތްކޮށްފައި ނުވާނެކަމަށް އަލަމްގިރި ވަނީ ބުނެފައެވެ. އަދި އެ ވީޑިއޯތައް ހެދީ އޭނާ ގެންގުޅުނު ފޯނެއް ބޭނުންކޮށްގެންކަމަށާއި، އެފަހުން އެ ފޯނުގައި ހުރި ވީޑިއޯތައް ޑިލީޓުކޮށްފައިވާނެކަމަށް އަލަމް ގިރި ވަނީ ބުނެފައެވެ.

އޭގެ އިތުރުން އަލަމްގިރި ބުނީ އޭނާ ނާޒިމް ސައްތާރާއެކު އެއްޖިންސުން ގުޅުން ހިންގާތަން ފެންނަ ވީޑިއޯ ސޯޝަލް މީޑިއާގައި އާންމުވުމާއި ގުޅިގެން، އޭނާގެ ފޯނު އޮތްތޯ ބެލިއިރު، އެ ނެތް ކަމަށާއި، ވީޑިއޯތައް ބޭނުންކޮށްގެން ބަޔަކު ބްލެކްމެއިލްކުރީ ފޯނު ވަގަށް ނެގި ފަރާތުން ކަމަށް ބެލެވޭކަމަށެވެ.

ބްލެކްމެއިލްކުރި މައްސަލައާއި ގުޅިގެން ފުލުހުންގެ އޮފިސަރެއްވެސް ވަނީ މުސާރަ ލިބޭގޮތަށް ސަސްޕެންޑުކޮށްފައެވެ. އެމީހާއަކީ އަލަމްގިރި ދިރިއުޅެމުން ދިޔަ ގޭގެ ވެރިފަރާތުގެ ކޮއްކޮގެ ފިރިމީހާކަމަށް މައުލޫމާތު ލިބެއެބެ. އެހެން ނަމަވެސް އަލަމްގރިީގެ ފޯނު ވަގަށް ނެތީ ސީދާ އެމީހާކަމެއް މިހާތަނަށް ފުލުހުން ހާމަކޮށްފައެއް ނުވެއެވެ.