މާފަންނު ގޭންގެއްގެ މީހަކު ފުލުހަކަށް މަރުގެ އިންޒާރުދީފި
ގޭންގަކަށް ނިސްބަތްވާ މީހަކު މާފަންނު ޕޮލިސް ސްޓޭޝަނަށް ވަދެ ފުލުހަކަށް މަރުގެ އިންޒާރުދީފިއެވެ.
ކޮމިޝަނާ އޮފް ޕޮލިސް މުހައްމަދު ހަމީދު ކުރެއްވި ޓުވީޓެއްގައި ވިދާޅުވެފައިވަނީ މާފަންނުގައި ޖަމާއަތް ހަދައި ރާވައިގެން ކުށްކުރާ ގުރޫޕަކަށް ނިސްބަތްވާ މީހަކު ވައްކަންކުރިކަމުގެ ތުހުމަތަށް ހައްޔަރުކުރުމުން އެގުރޫޕަށް ނިސްބަތްވާ މީހަކު މާފަންނު ސްޓޭޝަނަށް ވަދެ އެ ސްޓޭޝަނުގައި ހުރި ފުލުހަކަށް މަރުގެ އިންޒާރުދީފައިވާ ކަމަށެވެ.
މި މައްސަލައިގައި މަރުގެ އިންޒާރު ދިން މީހާ ފުލުހުން ހައްޔަރުކޮށްފައިވާ ކަމަށްވެސް ހަމީދު ވަނީ ވިދާޅުވެފައެެވެ.
މީގެއިތުރުން އެމީހާ ހައްޔަރުކުރުމާއި ގުޅިގެން ޕޮލިސް ސްޓޭޝަން ދޮށަށް އެއްވި އެ އެގްރޫޕުގެ މީހުނާމެދުވެސް ފިޔަވަޅު އެޅޭނެ ކަމަށްވެސް ކޮމިޝަނާ ހަމީދުގެ ޓުވީޓުގައި ބުނެފައިވެއެވެ. އަދި މިގޮތަށް ގްރޫޕު ހަދައިގެން ކުށްކުރާ ފަރާތްތަކަށް ކޮމިޝަނާ ވަނީ ވަރުގަދަ އިންޒާރެއްވެސް ދީފައެވެ.
“ ޖަމާއަތް ހަދައި، ކުށްކުރުމާއި، އާންމު އިޖުތިމާއީ މިންގަނޑުތަކާއި ޚިލާފް އަމަލްތައް ހިންގާ އަދި ރައްޔިތުންގެ ހިތްތަކަށް ބިރުވެރިކަން ވަންނަ ގޮތަށް ހަރަކާތްތެރިވާ ގުރޫޕުތަކާ ދެކޮޅަށް ފިޔަވަޅު އަޅާނަން! “
ކޮމިޝަނާ ހަމީދު ވިދާޅުވެފައެވެ.
މި ފަހުން މާލޭގައި ތިން ފުލުހުންނަށް ހަމަލާދިން މައްސަލައަށްފަހު ފުލުހުން އަންނަނީ މާލޭގައި ހިންގާ ގޭންގުތައް ހުއްޓުވުމަށް ވަރުގަދަ އޮޕަރޭޝަނެއް ވަނީ ފަށާފައެވެ. މި އޮޕަރޭޝަނުގައި މިހާތަނަށް 10 މީހަކު ވަނީ ފުލުހުން ހައްޔަރުކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
