ވޯލްޑް ކަޕް ބޮޑުއަގުގައި މީޑީއާނެޓަށް: "ބްރޯޑްކޮމް ކޮންޓްރޯލް ކުރަނީ ފައްޔާޒްކަން އެނގޭ"

ބްރޯޑްކާސްޓް ކޮމިޝަން ކޮންޓްރޯލް ކުރަނީ އިކޮނަމިކް މިނިސްޓަރ ފައްޔާޒް އިސްމާއިލްކަމަށް ރައްޔިތުން މަޖިލީހުގެ މަހިބަދޫ ދާއިރާގެ މެންބަރު އަހްމަދު ތޯރިގު (ޓޮމް) ތުހުމަތު ކުރައްވައިފިއެވެ.

ތޯރިގު މިފަދައިން ވިދާޅުވެފައިވަނީ ނައިފަރު ދާއިރާގެ މެމްބަރު އަހުމަދު ޝިޔާމް މަޖިލީހަށް ހުށަހެޅި ގަރާރަށް ވާހަކަދައްކަވަމުންނެވެ. އެ ގަރާރަކީ ތަފާތުކުރުމެއް ނެތި ވިޔަފާރި ކުރެވޭނެ މާހައުލެއް ގާއިމްކޮށްދިނުމަށާއި ރީބްރޯޑްކާސްޓް ކުރުމުގެ ވިޔަފާރީގެ ވާދަވެރިކަން ހަލާކުކޮށްލަން ދައުލަތުގެ މުއައްސަސާތައް މެދުވެރިކޮށް އަޅާފައިވާ ހުރަސްތައް ނައްތާލުމަށް ގޮވާލައި ހުށަހަޅާފައިވާ ގަރާރެކެވެ.

އެ ގަރާރުގައިވާ ގޮތުން ބޭރުގެ ހިއްސާއެއް އޮންނަ ކުންފުނިތަކަށް ރީބްރޯޑްކާސްޓިން ހިދުމަތް ނުދެވޭ ގޮތަށް ބްރޯޑްކާސްޓިން ކޮމިޝަނުން ހެދި ގަވައިދަކީ މީޑިއާނެޓް ކުންފުންޏާ ވާދަކުރާ ދިރާގު އެ ވިޔަފާރިން ބޭރުކުރުމަށް ގާނޫނާ ހިލާފަށް ހެދި ގަވައިދެކެވެ.

އެ ގަވައިދު ހެދުމާ އެކު އަންނަ އަހަރު ޖެނުއަރީ މަހުން ފެށިގެން ދިރާގުގެ ލައިސަންސް ބާތިލް ވާނެ އެވެ.

"އަޅުގަނޑުމެނަށްވެސް އެނގޭ ބްރޯޑްކާސްޓިންގ ކޮމިޝަން ކޮންޓްރޯލް ކުރަނީ މިނިސްޓަރ ފައްޔާޒްކަން. މީގަނެތް އިތުރަށް ފޮރުވާނެ އެއްޗެއް"

މެންބަރު އަހްމަދު ތޯރިގު (ޓޮމް) ވިދަޅުވިއެވެ.

ތޯރިގު މި ގަރާރަށް ވާހަކަ ދައްކަވަމުން ވިދާޅުވެފައިވަނި މި މައްސަލާގައި ބްރޯޑްކާސްޓިންގ ކޮމިޝަން އެންޓި ކޮރަޕްޝަން ކޮމިޝަނަށް ހާޒިރުކުރަން ޖެހޭނެކަމަށް ވިދާޅުވެފައެވެ.

މަޖިލީހުގައި މި ގަރާރަށް ވާހަކަ ދެއްކެވި ގިނަ މެންބަރުން ވަނީ ކޭބަލް ހިދުމަތް ދެމުން އަންނަ ކުދި ވިޔަފާރިތައް ނައްތާލަން މީޑީއާނެޓުން ކުރަމުން އަންނަ މަސައްކަތް ހުއްޓުވަން ގޮވާލާފައެވެ. އަދި މިކަން ކަމަށް ހައްލު ގެނައުމަށް އަވަސް މަސައްކަތްތަކެއް ކުރަން ޖެހެކަމަށް ވެސް މެންބަރުން ވިދާޅުވެފައިވެއެވެ.

ތޯރިގު އިތުރަށް ވިދާޅުވިގޮތުގައި ފައްޔާޒްގެ ނުފޫޒު ފޯރުވާ ބްރޯޑްކޮމްއިން މީޑިއާނެޓް ދެކެނީ ކުޑަ ވިޔަފާރިއެއްގޮތުގައި ކަމަށް ވިދާޅުވެފައެވެ. މި މައްސަލާގައި ބްރޯޑްކޮމް ވަނީ މަޖިލިސް ކޮމިޓީއަށް ހާޒިރުކޮށް ސުވާލުކޮށްފައިކަން ފާހަގަކޮށްލަންޖެހެއެވެ.

ރާއްޖޭގައި އާންމުންގެ ހާއްސަ ޝައުގުވެރިކަން ހުންނަ އިވެންޓްތައް ހިލޭ ބެލޭނެ އިންތިޒާމް ހަމަޖައްސަން ބްރޯޑްކާސްޓް ކުރުމުގެ ގަަވައިދުގެ ދަށުން ކަނޑައަޅާ އިވެންޓްތަކުގެ ލިސްޓުގައި މީގެ ކުރިން ވޯލްޑް ކަޕްގެ ހުރިހާ މެޗެއް ހިމެނިޔަސް، އެ ގަވައިދަށް ބަދަލު ގެނެސް، ވޯލްޑް ކަޕްގެ ފުރަތަމަ މެޗާއި ފައިނަލް މެޗު އެކަނި ހިމަނައިފި އެވެ. މި ގަވައިދު ބަދަލު ކުރީ މިދިޔަ މަހުގެ 19 ވަނަ ދުވަހު އެވެ.